ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଗତ ୨୦୧୬ ମସିହାରେ ଜଣେ ଯତ୍ନ ଓ ସୁରକ୍ଷା ଆବଶ୍ୟକ କରୁଥିବା ନାବାଳିକା ଗଜପତି ଜିଲ୍ଲା ପ୍ରଶାସନ ଦ୍ବାରା ପରିଚାଳିତ ହେଉଥିବା ଶିଶୁ ଯତ୍ନ ଓ ସୁରକ୍ଷା ଅନୁଷ୍ଠାନରେ ରହି ଆସୁଥିଲା । ଏହି ସମୟରେ ଆବଶ୍ୟକ ସହଯୋଗ ଜିଲ୍ଲା ପ୍ରଶାସନ ଯୋଗାଇ ଆସୁଥିଲା ।
ନାବାଳିକାଟିକୁ ୧୮ ବର୍ଷ ହେଲାପରେ DDUGKY , କଟକ ରେ ଡାଟା ଏଣ୍ଟ୍ରି ଓପେରାଟର ର ପ୍ରଶିକ୍ଷଣ ନେବା ପାଇଁ ଜିଲ୍ଲା ପ୍ରଶାସନ ସୁପରିଶ କରିଥିଲା। ପରବର୍ତ୍ତୀ ମୁହୁର୍ତ୍ତରେ ଯୁବତୀ ଜଣକ ହରିଆନାର ଏକ ଘରୋଇ କମ୍ପାନୀରେ ୨୦୧୯ରୁ ଡାଟା ଏଣ୍ଟ୍ରି ଓପେରାଟର ଭାବେ କାର୍ଯ୍ୟରତ ଥିଲେ। ଯୁବତୀଟିର କେବଳ ଏକକ ଅଭିଭାବକ ଥିଲେ।
ବର୍ତ୍ତମାନ ଯୁବତୀ ମୋହନା ପଞ୍ଚାୟତ ସମିତିର ଆଲିଗଣ୍ଡା ଗ୍ରାମରେ ତାଙ୍କ ବାପାଙ୍କ ପାଖରେ ରହି ଆସୁଥିଲେ । ବର୍ତ୍ତମାନ ଯୁବତୀଟିର ବାହାଘର ତାଣ୍ଡିଗୁଡା ଗ୍ରାମ , ବ୍ଲକ-ରା.ଉଦୟଗିରି ର ଏକ ଯୁବକ ସହିତ ଠିକ୍ ହୋଇ ଆଜି ବାହାଘର କାର୍ଯ୍ୟ ସମ୍ପନ୍ନ କରାଯାଇଥିଲା।
ଏହି ସମୟରେ ଭାରପ୍ରାପ୍ତ ଜିଲ୍ଲାପାଳ ଶ୍ରୀଯୁକ୍ତ ସଂଗ୍ରାମ ଶେଖର ପଣ୍ଡାଙ୍କ ନିର୍ଦ୍ଦେଶ କ୍ରମେ ବିଜୁ ଶିଶୁ ସୁରକ୍ଷା ଯୋଜନାରେ ଯୁବତୀଙ୍କୁ ଅନ୍ତର୍ଭୁକ୍ତ କରାଇ ବିବାହ ପ୍ରୋତ୍ସାହନ ସକାଶେ ୫୦.୦୦୦ (ପଚାଶ ହଜାର) ଟଙ୍କା ଜିଲ୍ଲା ପ୍ରଶାସନ ପ୍ରଦାନ କରିଥିଲେ। ପ୍ରଶାସନର ଏହି କାର୍ଯ୍ୟରେ ଝିଅଟି ଖୁସି ଥିଲା ବେଳେ ତାଣ୍ଡିଗୁଡା ଅଞ୍ଚଳର ଜନସାଧାରଣ ଏହି ଯୋଜନା ଉପରେ ଅବଗତ ହୋଇଥିଲେ।
ଉକ୍ତ କାର୍ଯ୍ୟକ୍ରମରେ ଜିଲ୍ଲା ଶିଶୁ ସୁରକ୍ଷା ଅଧିକାରୀ ଶ୍ରୀଯୁକ୍ତ ଅରୁଣ କୁମାର ତ୍ରିପାଠି , ଶିଶୁ ମଙ୍ଗଳ ସମିତିର ସଭ୍ୟା ଶ୍ରୀମତୀ ଅଳକା ସାହୁ , ସୁରକ୍ଷା ଅଧିକାରୀ ଶ୍ରୀ ଡମ୍ବରୁଧର ବଳବନ୍ତ , ପରାମର୍ଶଦାତା ଶ୍ରୀଯୁକ୍ତ ଡୁଙ୍ଗେଇ ମଲ୍ଲିକ ଏବଂ ଶିଶୁ ସୁରକ୍ଷା ୟୁନିଟ୍ ର ଅନ୍ୟ କର୍ମକର୍ତ୍ତା ଉପସ୍ଥିତ ଥିଲେ।
