ଓଡ଼ିଶାରେ ଅଛନ୍ତି ୪୭ ଲକ୍ଷ ଚାଷୀ ଓ ୫ ଲକ୍ଷରୁ ଉର୍ଧ୍ଵ ଭାଗଚାଷୀ
ଭୁବନେଶ୍ୱର, : ଜନଗଣନା ରିପୋର୍ଟରେ ଓଡ଼ିଶାରେ କୃଷକଙ୍କ ସଂଖ୍ୟା କମୁଥିବା ଦର୍ଶାଯାଇଥିବା ବେଳେ ରାଜ୍ୟ ସରକାରଙ୍କ କୃଷି ଗଣନା ରିପୋର୍ଟରେ କିନ୍ତୁ ବର୍ଷକୁ ବର୍ଷ କୃଷକଙ୍କ ସଂଖ୍ୟା ବଢ଼ୁଥିବା ଦର୍ଶାଯାଇଛି ।
୧୦ ବର୍ଷରେ ଥରେ କରାଯାଉଥିବା ଜନଗଣନା ରିପୋର୍ଟ ଆଧାରରେ ୨୦୦୧ ବେଳକୁ ଓଡ଼ିଶାରେ କୃଷକଙ୍କ ସଂଖ୍ୟା ୪୨,୪୭,୬୬୧ ଥିବା ବେଳେ ୨୦୧୧ରେ ତାହା ୪୧,୦୩,୯୮୯ ବୋଲି ମନ୍ତ୍ରୀ କହିଛନ୍ତି । ତେବେ ୨୦୦୧ ବେଳକୁ ଓଡ଼ିଶାରେ ୪୯,୯୯,୧୦୪ କୃଷି ଶ୍ରମିକ ଥିବା ବେଳେ ୨୦୧୧ରେ କିନ୍ତୁ ଏହା ୬୭,୩୯,୯୯୩କୁ ବୃଦ୍ଧି ପାଇଥିବା ସେ ଦର୍ଶାଇଛନ୍ତି ।
ଅନ୍ୟପକ୍ଷରେ ରାଜ୍ୟରେ ଥିବା କୃଷି ଗଣନା ରିପୋର୍ଟ ଅନୁଯାୟୀ ୨୦୦୦-୦୧ ବର୍ଷରେ ଓଡ଼ିଶାରେ ବିଭିନ୍ନ କିସମର ୪୦,୬୭,୧୩୫ ଚାଷୀ ପରିବାର ଥିବା ବେଳେ ୨୦୧୦-୧୧ ବେଳକୁ ଏହି ସଂଖ୍ୟା ୪୬,୬୭,୪୬୬ରେ ପହଞ୍ଚିଥିଲା ବୋଲି କୃଷିମନ୍ତ୍ରୀ ତାଙ୍କ ଉତ୍ତରରେ ଉଲ୍ଲେଖ କରିଛନ୍ତି । ଏଥିରୁ ରାଜ୍ୟରେ ନାମମାତ୍ର ଚାଷୀଙ୍କ ସଂଖ୍ୟା ୧୦ ବର୍ଷରେ ୧୧ ଲକ୍ଷରୁ ଅଧିକ ବଢ଼ିଥିବା ବେଳେ କ୍ଷୁଦ୍ର, ମଧ୍ୟମ ଓ ବଡ଼ ଚାଷୀଙ୍କ ସଂଖ୍ୟା ଉଦ୍ବେଗଜନକ ଭାବେ ହ୍ରାସ ପାଉଥିବା ଜଣାପଡ଼ିଛି । ବିଧାୟକ ଦିଲିପ ରାୟଙ୍କ ଏକ ନିର୍ଦ୍ଧିଷ୍ଟ ପ୍ରଶ୍ନର ଉତ୍ତରରେ କୃଷି ଓ କୃଷକ ସଶକ୍ତିକରଣ ମନ୍ତ୍ରୀ ପ୍ରଦୀପ ମହାରଥୀ ଦେଇଥିବା ପରିସଂଖ୍ୟାନରୁ ଏହି ବିରୋଧାତ୍ମକ ତଥ୍ୟ ମିଳିଛି ।
ସରକାରଙ୍କ ପ୍ରଦତ୍ତ ହିସାବ ଅନୁଯାୟୀ ୨୦୦୦-୦୧ ବର୍ଷରେ ଓଡ଼ିଶାରେ ୨୨,୯୪,୫୨୦ ନାମମାତ୍ର ଚାଷୀ ପରିବାର ଥିବା ବେଳେ ୨୦୧୦-୧୧ ବର୍ଷରେ ଏହି ସଂଖ୍ୟା ୩୩,୬୬,୨୯୬ରେ ପହଞ୍ଚିଥିଲା । ତେବେଏହି ଦୁଇ ବର୍ଷରେ ଆମ ରାଜ୍ୟରେ ଛୋଟ ଚାଷୀ ପରିବାରଙ୍କ ସଂଖ୍ୟା ୧୧,୧୩,୫୯୯ରୁ କମି ୯,୧୮,୬୪୭ ଥିଲା । ୨୦୦୦-୦୧ ବର୍ଷରେ ଓଡ଼ିଶାରେ ଆଂଶିକ ମଧ୍ୟମ ଚାଷୀ ପରିବାର ସଂଖ୍ୟା ୫,୦୦,୫୩୧ ଥିବା ବେଳେ ମଧ୍ୟମ କିସମ ଚାଷୀ ପରିବାର ସଂଖ୍ୟା ୧,୪୫,୧୧୦ ଓ ବଡଚାଷୀ ପରିବାର ସଂଖ୍ୟା ୧୩,୩୭୫ ଥିଲା । ୨୦୧୦-୧୧ ବର୍ଷ ବେଳକୁ ଓଡ଼ିଶାରେ ଆଂଶିକ ମଧ୍ୟମ ଚାଷୀ ପରିବାର ସଂଖ୍ୟା ୩,୧୧,୨୬୧ ଓ ମଧ୍ୟମ କିସମ ଚାଷୀ ପରିବାର ସଂଖ୍ୟା ୬୩,୬୮୮କୁ କମିଥିବା ବେଳେ ବଡ଼ଚାଷୀ ପରିବାର ସଂଖ୍ୟା ହ୍ରାସ ପାଇ ୫,୫୭୪ରେ ପହଞ୍ଚିଥିଲା ।
ମନ୍ତ୍ରୀ ପୁଣି ସୂଚାଇଛନ୍ତି ଯେ ୨୦୦୦-୦୧ ବର୍ଷରେ ଓଡ଼ିଶାରେ ୧,୪୨,୧୯୭ ସମ୍ପୂର୍ଣ୍ଣ ଭାଗଚାଷୀ ଥିବା ବେଳେ ୬,୪୨,୭୪୧ ଆଂଶିକ ଭାଗଚାଷୀ ରହିଥିଲେ । ଏହି ସଂଖ୍ୟା ୨୦୧୦-୧୧ ବେଳକୁ ଯଥାକ୍ରମେ ୨,୧୯,୩୨୯ ଓ ୩,୨୮,୯୪୬ରେ ପହଞ୍ଚିଥିଲା । ଅର୍ଥାତ୍ ଏହି ୧୦ ବର୍ଷ ମଧ୍ୟରେ ଓଡ଼ିଶାରେ ଭାଗଚାଷୀଙ୍କ ସଂଖ୍ୟା ପ୍ରାୟ ୭ ଲକ୍ଷ ୮୫ ହଜାରରୁ ୫ ଲକ୍ଷ ୪୮ ହଜାରକୁ ହ୍ରାସ ପାଇଛି । ଏଠାରେ ଉଲ୍ଲେଖନୀୟ ଯେ ୨୦୧୧ ଜନଗଣନାରେ ଓଡ଼ିଶାରେ ପ୍ରାୟ ୯୬ ଲକ୍ଷ ପରିବାର ଥିବା ବେଳେ ସେଥିରୁ ପାଖାପାଖି ୪୭ ଲକ୍ଷ ହେଉଛନ୍ତି ଚାଷୀ ଓ ୫ ଲକ୍ଷରୁ ଉର୍ଧ୍ଵ ଭାଗଚାଷୀ ପରିବାର ।
