ସମ୍ବଲପୁରୀ ମାତୃଭାଷା ଅଭିଯାନର ଶୁଭାରମ୍ଭ
ସମ୍ବଲପୁର(ରମାକାନ୍ତ ବିଶ୍ବାଳ ): ପବିତ୍ର ମହାଶିବରାତ୍ରି ଅବସରରେ ଶୈବ ଭକ୍ତ ଙ୍କ ପାଇଁ ଦିନଟି ଯେତିକି ମହତ୍ୱପୂର୍ଣ୍ଣ ବିଶ୍ୱ ମାତୃଭାଷା ଦିବସ ବି ଅନୁରୂପ ଭାବେ କବି ଲେଖକ ଭାଷା ପ୍ରେମୀଙ୍କ ପାଇଁ ଦିନଟି ସେତିକି ଗୁରୁତ୍ୱ ବହନ କରିଥାଏ । ପବିତ୍ର ମହାଶିବରାତ୍ରୀ ଅବସରରେ ବିଶ୍ୱ ପ୍ରସିଦ୍ଧ ହୁମା ବକ୍ର ମନ୍ଦିରରେ ହଜାର ହଜାର ଭକ୍ତ ଙ୍କ ଭିଡ ଜମି ଥିବା ବେଳେ ସମ୍ବଲପୁରୀ ଭାଷା ସଂସ୍କୃତି ର ପ୍ରଚାର ପ୍ରସାର ପାଇଁ ୨୦୧୩ ମସିହାରୁ କାର୍ଯ୍ୟ କରିଆସୁଥିବା ପଶ୍ଚିମାଞ୍ଚଳ ଏକତା ମଞ୍ଚ ପକ୍ଷରୁ ସାହାସପୁର ଶାଖା ଗଠିତ ହୋଇଯାଇଛି । ହୁମା ଅଞ୍ଚଳରେ ଏହି ଶାଖା ସମ୍ବଲପୁରୀ ଭାଷା ସାହିତ୍ୟ ସଂସ୍କୃତି ର ପ୍ରଚାର ପ୍ରସାର ଦିଗରେ କାର୍ଯ୍ୟ କରିବା ନେଇ ସଂକଳ୍ପ ନେଇଛି । ପଶ୍ଚିମାଞ୍ଚଳ ଏକତା ମଞ୍ଚ ସାହାସପୁର ଶାଖା ପକ୍ଷରୁ ଆଜି ପ୍ରଥମ କାର୍ଯ୍ୟକ୍ରମ ଭାବରେ ହୁମା ବକ୍ର ମନ୍ଦିର ପରିସରରେ ବିଶ୍ୱ ମାତୃଭାଷା ଦିବସ ପାଳିତ ହୋଇଯାଇଛି । ଏହି ଅବସରରେ ଆଗାମୀ ଜନଗଣନା ସମୟରେ ପଶ୍ଚିମାଞ୍ଚଳ ବାସୀ ସମ୍ବଲପୁରୀକୁ ନିଜର ମାତୃଭାଷା ଭାବେ ଉଲ୍ଲେଖ କରିବାକୁ ଅନୁରୋଧ କରାଯାଇଥିଲା । ଏନେଇ ଲୋକଙ୍କୁ ସଚେତନ କରିବା ପାଇଁ ଶ୍ରୀ ଶ୍ରୀ ବିମଲେଶ୍ବର ବାବାଙ୍କ ବକ୍ର ମନ୍ଦିରରୁ ପଶ୍ଚିମାଞ୍ଚଳ ଏକତା ମଂଚ ଅଭିଯାନ ଆରମ୍ଭ କରିଥିଲା । ଏହି ଅବସରରେ ସମ୍ବଲପୁରୀ କବିତା ଆସରର ଆୟୋଜନ କରାଯାଇଥିଲା ।
ପଶ୍ଚିମାଞ୍ଚଳ ଏକତା ମଂଚ ସାହାସପୁର ଶାଖା ର ସଂଯୋଜକ ରାଧାକାନ୍ତ ଭୋଇଙ୍କ ସଭାପତିତ୍ବରେ ଆୟୋଜିତ ସମ୍ବଲପୁରୀ କବିତା ଆସରରେ ବରଗଡ, ଝାରସୁଗୁଡା, ସୋନପୁର, ବୌଦ୍ଧ ଏବଂ ସମ୍ବଲପୁର ର ବିଭିନ୍ନ ଅଂଚଲରୁ ଆସିଥିବା 25ରୁ ଉର୍ଦ୍ଧ୍ବ କବି କବିତା ପାଠ କରିଥିଲେ ।
କାର୍ଯ୍ୟକ୍ରମ ଆୟୋଜନ ରେ ସନତ ସାହୁ, ପଙ୍କଜିନୀ ମେହେର, ଆଭାସ ପଣ୍ଡା , ହୁମା ଶିବରାତ୍ରୀ ମେଳା କମିଟି ର ହେମନ୍ତ କୁମାର ପଣ୍ଡା, ସୁଜିତ ସାହୁ, ଶିବ ଶଙ୍କର ପଧାନ, ଅର୍ଜୁନ ମେହେର ପ୍ରମୁଖ ସହଯୋଗ କରିଥିଲେ ।
