ରାୟଗଡ ଜିଲ୍ଲା ବରିଷ୍ଠ ନାଗରିକ ସଂଘର ୪ର୍ଥ ବାର୍ଷିକ ଉତ୍ସବ
ରାୟଗଡ(ସରୋଜ ସାହୁ) ଜିଲ୍ଲା ବରିଷ୍ଠ ନାଗରିକ ସଂଘର ନିଜସ୍ୱ କାର୍ଯ୍ୟାଳୟ ପରିସରରେ ବହୁ ଆଡମ୍ବର ସହକାରେ ୪ର୍ଥ ବାର୍ଷିକ ଉତ୍ସବ ପାଳନ କରାଯାଇଥିଲା । ଉକ୍ତ କାର୍ଯ୍ୟକ୍ରମରେ ସଂଘର ଶତାଧିକ ସଭ୍ୟ ଉପସ୍ଥିତ ଥିଲେ । କାର୍ଯ୍ୟକ୍ରମ ଆରମ୍ଭରେ ସଂଘର ପତାକାକୁ ସଂଘର ଉପଦେଷ୍ଟା ନରସିଂହ ନାଥ ପାଢୀ ଉତୋଳନ କରିବା ସହ ଜାତୀୟ ସଂଗୀତ ଗାନ କରିଥିବା ବେଳେ ସଭ୍ୟମାନଙ୍କୁ ଉଦବୋଧନ ଦେଇଥିଲେ । ପରେ ସଂଘର ସଭ୍ୟ ମାନଙ୍କ ଦ୍ୱାରା ପ୍ଲାକାର୍ଡ ଧରି ସହର ପରିକ୍ରମା କରି ସ୍ଲୋଗାନ ମାଧ୍ୟମରେ ସମାଜକୁ ସଚେତନ ପୂର୍ବକ ବାର୍ତା ପ୍ରଦାନ କରିଥିଲେ । ଏଥି ସହ ଦିବା ୧୧ଟା ସମୟରେ ଏକ ସାଧାରଣ ସଭା ସଂଘ କାର୍ଯ୍ୟାଳୟ ପରିସରେର ଆୟୋଜନ କରାଯାଇଥିଲା । ଉକ୍ତ କାର୍ଯ୍ୟକ୍ରମର ସଭାପତିତ୍ୱ କରିଥିଲେ ସଂଘର ସଭାପତି ବିନୋଦ ଚନ୍ଦ୍ର ପଣ୍ଡା ଏବଂ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ଜିଲ୍ଲାପାଳ ପ୍ରମୋଦ କୁମାର ବେହେରା । ମଂଚାସୀନ ଥିଲେ ଉପଦେଷ୍ଟା ନରସିଂହ ନାଥ ପାଢୀ, ସଂପାଦକ ଦେବେନ୍ଦ୍ର ନାଥ ମହାପାତ୍ର । ପରେ ଇମ୍ପା କଂପାନୀର ଉପ-ସଭାପତି କେ.ଭି.ରାଓ, ଲୋକ ସଂପର୍କ ଅଧିକାରୀ ଶକ୍ତି ପ୍ରସାଦ ପାଣିଗ୍ରାହୀ ମଧ୍ୟ ମଂଚାସୀନ ଥିଲେ । ଜିଲ୍ଲାପାଳ ଓ ଇମ୍ପା କଂପାନୀର ଉପ-ସଭାପତି ଶ୍ରୀ ରାଓ ବରିଷ୍ଠ ନାଗରିକ ମାନଙ୍କ ଭୂମିକା ସମାଜର ପ୍ରଗତିରେ ବିନିଯୋଗ କଲେ ବିକାଶ ଘଟିବ ବୋଲି କହିବା ସହ ବରିଷ୍ଠ ନାଗରିକ ମାନଙ୍କ ଅଧିକାର, ସୁରକ୍ଷା ସଂପର୍କରେ ଆଲୋକପାତ କରିଥିଲେ । ସଂଘର ସଂପାଦକ ଦେବେନ୍ଦ୍ର ନାଥ ମହାପାତ୍ର ବାର୍ଷିକ ବିବରଣୀ ପାଠ କରିବା ସହ ସ୍ୱାଗତ ଭାଷଣ ପ୍ରଦାନ କରିଥିଲେ । ସଂଘର ସଭାପତି ଶ୍ରୀ ପଣ୍ଡା ସଭା ପରିଚାଳନା କରିବା ସହ ବରିଷ୍ଠ ନାଗରିକ ମାନଙ୍କ ନିମନ୍ତେ ଉଦ୍ଧିଷ୍ଟ ଆଇନ ଓ ନିୟମାବଳୀ ସଂପର୍କରେ ବିସ୍ତୃତ ଭାବେ ଆଲୋଚନା କରିଥିଲେ ଓ ଉପସ୍ଥିତ ସଦସ୍ୟ ମାନଙ୍କୁ ସହଯୋଗ କାମନା କରିବା ପାଇଁ ଅନୁରୋଧ କରିଥିଲେ । ସଂଘର ଉପଦେଷ୍ଟା ଶ୍ରୀ ପାଢୀ ଜିଲ୍ଲାରେ ବାସ କରୁଥିବା ବରିଷ୍ଠ ନାଗରିକ ମାନଙ୍କୁ ଚିହ୍ନଟ କରିବା ସହ ସେମାନଙ୍କୁ ସୁରକ୍ଷା ପ୍ରଦାନ କରିବା ଏବଂ ଅଧିକାର ସଂପର୍କରେ ସଚେତନା କରିବା ନିମନ୍ତେ ଜିଲ୍ଲାପାଳ ମହୋଦୟଙ୍କୁ ଅନୁରୋଧ କରିଥିଲେ । ଏତଦବ୍ୟତୀତ ବରିଷ୍ଠ ନାଗରିକ ମାନଙ୍କ ସୁରକ୍ଷା ଅଧିକାର ସଂପର୍କରେ ଗଠନ କରାଯାଇଥିବା ଯୁଗ୍ମ କମିଟିରେ ସଂଘର ସଭାପତି ଶ୍ରୀପଣ୍ଡାଙ୍କୁ ସ୍ଥାନିତ କରିବା ପାଇଁ ମଧ୍ୟ ଅନୁରୋଧ କରାଯାଇଥିଲା । ଜିଲ୍ଲାକୁ କ୍ରୀଡା ପାଇଁ ଆସୁଥିବା ପାଣ୍ଠିରୁ ବରିଷ୍ଠ ନାଗରିକ ମଙ୍ଗଳ ସଂଘ କାର୍ଯ୍ୟାଳୟରେ ଏକ ବ୍ୟାୟମ କେନ୍ଦ୍ର ପ୍ରତିଷ୍ଠା କରିବା ଦିଗରେ ଉପଯୁକ୍ତ ପଦକ୍ଷେପ ନେବା ପାଇଁ ମଧ୍ୟ ଅନୁରୋଧ କରାଯାଇଥିଲା । କାର୍ଯ୍ୟକ୍ରମ ଶେଷରେ ସଂଘର ସହକାରୀ ସଂପାଦକ ବଳରାମ ଚୌଧୁରୀ ଧନ୍ୟବାଦ ଅର୍ପଣ କରିଥିଲେ । ଆୟୋଜିତ କାର୍ଯ୍ୟକ୍ରମରେ ଅନ୍ୟ ମାନଙ୍କ ମଧ୍ୟରେ ଦିଲ୍ଲୀପ କୁମାର ପଟ୍ଟନାୟକ, ହୃଦୟାନନ୍ଦ ବାରିକ, ରମେଶ ପଣ୍ଡା, ନବୀନ ପଣ୍ଡା, ନରସିଂହ ପରିଡା, ପଦ୍ମନାଭ ଦୋରା, ବ୍ରଜମୋହନ ମାଦଳା, ଚନ୍ଦ୍ର ଶେଖର ପାତ୍ର, କେ.ସି.ସାମନ୍ତରାୟ, ଗଣେଶ୍ୱର ଭାରିମଲ, କିଶୋର ପଣ୍ଡା ପ୍ରମୁଖ । ସଂଘ ପରିସରରେ ଥିବା ହସ କ୍ଲବରେ ଜିଲ୍ଲାପାଳଙ୍କ ସମେତ ସଂଘର ସମସ୍ତ ସଭ୍ୟ ମାନେ ଉପସ୍ଥିତ ରହି ୧୦ ମିନଟ୍ ଯାଏ ହସିଥିଲେ ।
