ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ପର୍ଯ୍ୟଟନ-ପର୍ବ ଆସନ୍ତା ଅକ୍ଟୋବର ୨ ତାରିଖରୁ ୧୩ ତାରିଖ ପର୍ଯ୍ୟନ୍ତ ପାଳନ କରାଯିବା ଉପଲକ୍ଷେ ପାରଳାଖେମୁଣ୍ଡି ସ୍ଥିତ ମହାରାଜାଙ୍କ ବାଳକ ଉଚ୍ଚ ବିଦ୍ୟାଳୟର ସଭା ଗୃହ ଠାରେ ମାଧ୍ୟମିକ ବିଦ୍ୟାଳୟ ସ୍ତରରେ ଏକ ଜିଲ୍ଲା-ସ୍ତରୀୟ ବକ୍ତୃତା ପ୍ରତିଯୋଗିତା ଅନୁଷ୍ଠିତ ହୋଇ ଯାଇଛି ।
ଜିଲ୍ଲା ଶିକ୍ଷା ଅଧିକାରୀ ପ୍ରଦୀପ କୁମାର ନାଗଙ୍କ ନିର୍ଦ୍ଦେଶ କ୍ରମେ ଏହି ପ୍ରତିଯୋଗିତା ଆୟୋଜିତ ହୋଇଥିଲା । ପ୍ରତିଯୋଗିତାର ମୁଖ୍ୟ ବିଷୟ ବସ୍ତୁ "ଦେଶର ଅର୍ଥନୈତିକ ବିକାଶରେ ପର୍ଯ୍ୟଟନର ଭୂମିକା" ଶୀର୍ଷକ ଉପରେ ଛାତ୍ରଛାତ୍ରୀ ମାନେ ସେମାନଙ୍କ ଚିତ୍ତାକର୍ଷକ ବକ୍ତୃତା ପ୍ରଦାନ କରିଥିଲେ । ଏହି ପ୍ରତିଯୋଗିତାରେ ବିଚାରକ ଭାବେ ଇସାନ ଚାନ୍ଦ ଓଁକାର ଏବଂ ବରିଷ୍ଠ ଶିକ୍ଷୟତ୍ରୀ ସୁଲତା ପ୍ରିୟଦର୍ଶନୀ ଯୋଗ ଦେଇଥିଲେ ।
ପରେ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ମନୋଜ ରଞ୍ଜନ ଦଳାଇଙ୍କ ଅଧ୍ୟକ୍ଷତା ଆୟୋଜିତ ଏକ ସଚେତନତା କାର୍ଯ୍ୟକ୍ରମରେ ଜିଲ୍ଲା ବିଜ୍ଞାନ ନିରୀକ୍ଷକ ସାତ୍ମିକ କୁମାର ପଟ୍ଟନାୟକ ସଂଯୋଜନା କରି ପର୍ଯ୍ୟଟନ -ପର୍ବ ପାଳନର ଆଭିମୁଖ୍ୟ ସମ୍ପର୍କରେ କହି ଜିଲ୍ଲାର ପର୍ଯ୍ୟଟନ ସ୍ଥଳିର ଚିହ୍ନଟ କରଣ କରାଯିବା ସହ ଲୁକାୟୀତ ରହିଥିବା ପର୍ଯ୍ୟଟନ ସ୍ଥଳି ଗୁଡ଼ିକ ଉପରେ ଜାଣିପାରିବା ଏହାର ମୁଖ୍ୟ ଉଦ୍ଦେଶ୍ୟ ବୋଲି କହିଥିଲେ ।
ବରିଷ୍ଠ ଶିକ୍ଷୟତ୍ରୀ ସୁଲତା ପ୍ରିୟଦର୍ଶନୀ ମଞ୍ଚାସୀନ ରହି ପର୍ଯ୍ୟଟନ ସ୍ଥଳିର ବିକାଶ ହେଲେ ତାହା ଦ୍ବାରା ଅଞ୍ଚଳର ଓ ଅଞ୍ଚଳବାସୀଙ୍କ ସାମାଜିକ ଓ ଅର୍ଥନୈତିକ କ୍ଷେତ୍ରରେ କିଭଳି ଅଭିବୃଦ୍ଧି ଘଟିଥାଏ , ପର୍ଯ୍ୟଟନ ସ୍ଥଳୀର ବିକାଶ କିଭଳି ହେବା ଦରକାର ସେ ସବୁର ବିଭିନ୍ନ ଦିଗ ଉପରେ ଆଲୋଚନା କରିଥିଲେ ।
ଏହି ପ୍ରତିଯୋଗିତାରେ ଜିଲ୍ଲାର ବିଭିନ୍ନ ମାଧ୍ୟମିକ ବିଦ୍ୟାଳୟର ଛାତ୍ରଛାତ୍ରୀ ମାନେ ଅଂଶଗ୍ରହଣ କରିଥିବା ବେଳେ ପ୍ରତିଯୋଗିତାରେ ପାରଳାଖେମୁଣ୍ଡି ସ୍ଥିତ ସରସ୍ବତୀ ଶିଶୁ ବିଦ୍ୟା ମନ୍ଦିରର ସ୍ମୃତି ରଞ୍ଜନ ଅଧିକାରୀ ପ୍ରଥମ ସ୍ଥାନ, ସୁସ୍ମିତା ପଣ୍ଡା ଦ୍ବିତୀୟ ସ୍ଥାନ ଓ ପ୍ରତୀକ୍ଷା ରଥ ତୃତୀୟ ସ୍ଥାନ ଅଧିକାର କରିଥିଲେ।
ସମସ୍ତ କାର୍ଯ୍ୟକ୍ରମକୁ ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟର ଦୁର୍ଗା ମାଧବ ପାଢ଼ୀ ଏବଂ ବିଦ୍ୟାଳୟର ଶିକ୍ଷକ ପ୍ରମୋଦ କୁମାର ପାଢ଼ୀ ପ୍ରମୁଖ ପରିଚାଳନା କରିଥିଲେ ।
