ପାରଳାଖେମୁଣ୍ଡି/ବାଳକୃଷ୍ଣ ପାଣିଗ୍ରାହୀ : ଗଜପତି ଜିଲ୍ଲାରେ ଚଳିତ ବର୍ଷ କେନ୍ଦ୍ର ସରକାରଙ୍କ ରାଷ୍ଟ୍ରୀୟ କୃଷି ବିକାଶ ଯୋଜନା ଓ ନୀଳ ବିପ୍ଲବ ଯୋଜନାରେ ମହିଳା ସ୍ୱୟଂ ସହାୟକ ଗୋଷ୍ଠୀଙ୍କ ଜରିଆରେ ଜିଲ୍ଲା ମତ୍ସ୍ୟ ବିଭାଗ ଆନୁକୂଲ୍ୟରେ ପଞ୍ଚାୟତ ପୋଖରୀରେ ମାଛ ଚାଷ ଆରମ୍ଭ କରାଯାଇଛି । ଗୋଷାଣୀ ବ୍ଲକର କଇଠଡା , ଗାରାବନ୍ଧ ସ୍ୱାଗି ମାହାଦେଇ ପୁର ଓ ଗୁରାଣ୍ଡି ଗ୍ରାମର ପଞ୍ଚାୟତ ପୋଖରୀରେ ଆଜି ଏହି ମାଛ ଯାଆଁଳ ଚ୍ଛଡା କାର୍ଯ୍ୟକ୍ରମ ହୋଇଥିଲା ।
ଏହି ମାଛ ଚାଷରେ ଜିଲ୍ଲା ମତ୍ସ୍ୟ ବିଭାଗ ଆନୁକୂଲ୍ୟରେ ଚଳିତ ବର୍ଷ ଜିଲ୍ଲାରେ ମୋଟ ୭୫ ହେକ୍ଟର ପରିମିତ ପୋଖରୀରେ ମାଛ ଚାଷ କରିବା ପାଇଁ ୧୩୦ ଟି ମହିଳା ଗୋଷ୍ଠୀ ମା' ମାନଙ୍କୁ ଚିହ୍ନଟ କରାଯାଇଛି ।
ଏହି ମାଛ ଚାଷରେ ହେକ୍ଟର୍ ପ୍ରତି ଦେଢ ଲକ୍ଷ ଟଙ୍କା ଦେବାର ପ୍ରକଳ୍ପ କରାଯାଇଛି ଏବଂ ସେହି ଦେଢ ଲକ୍ଷ ଟଙ୍କା କେନ୍ଦ୍ର ସରକାରଙ୍କ ରାଷ୍ଟ୍ରୀୟ କୃଷି ବିକାଶ ଯୋଜନା ଓ ନୀଳ ବିପ୍ଲବ ଯୋଜନାରେ ଅନ୍ତର୍ଭୁକ୍ତ ।
ଏହି ଯୋଜନାରେ ମାଛ ଚାଷ ପାଇଁ ମହିଳା ଗୋଷ୍ଠୀ ମା' ମାନଙ୍କୁ ମୋଟ ଦେଢ ଲକ୍ଷ ଟଙ୍କାରେ ୬୦ ପ୍ରତିଶତ ରିହାତି ଅର୍ଥାତ ୯୦ ହଜାର ଟଙ୍କାର ବ୍ୟବସ୍ଥା ରଖାଯାଇଛି ଏବଂ ଏଥିରେ ମତ୍ସ୍ୟ ବିଭାଗ ପକ୍ଷରୁ ବର୍ଷକିଆ ରୋହି , ଭାକୁର ଓ ମିରିକାଳି ମାଛ-ଯାଆଁଳ ଓ ଖାଦ୍ୟ ଯୋଗାଇ ଦେବାର ବ୍ୟବସ୍ଥା ରଖାଯାଇଛି ଏବଂ ବାକି ୪୦ ପ୍ରତିଶତ ଅର୍ଥାତ ୬୦ ହଜାର ଟଙ୍କାରେ ମହିଳା ଗୋଷ୍ଠୀ ମା' ମାନେ ପୋଖରୀ ସଫା , ଚୂନ ପକା , ରକ୍ଷଣା- ବେକ୍ଷଣ ଓ ଅନ୍ୟାନ୍ୟ ପ୍ରସ୍ତୁତି କରିବେ ।
ମହିଳା ଗୋଷ୍ଠୀ ମା' ମାନେ ପଞ୍ଚାୟତ ପୋଖରୀକୁ ୩ ବର୍ଷିଆ ଲିଜ୍ ସୂତ୍ରରେ ନେଇ କେନ୍ଦ୍ର ସରକାରଙ୍କ ଏହି ରାଷ୍ଟ୍ରୀୟ କୃଷି ବିକାଶ ଯୋଜନାର ରିହାତି ବ୍ୟବସ୍ଥାରେ ଆଗେଇ ଆସି ଭବିଷ୍ୟତରେ ସ୍ବାବଲମ୍ବି ହେବାପାଇଁ ମାଛ ଚାଷ କରୁଛନ୍ତି ବୋଲି ଗୋଷ୍ଠୀର ମହିଳା ସଦସ୍ୟା କହିଛନ୍ତି । ମହିଳା ମାନେ ମାଛ ଯାଆଁଳ କିଣି ଜାଲ ସହାୟତାରେ ମାଛ ଯାଆଁଳ ସବୁ ନେଇ ପୋଖରୀରେ ନିଜେ ଛାଡ଼ିଛନ୍ତି ।
ପୋଖରୀ ସ୍ଥଳରେ ମାଛ ଯାଆଁଳ କିଣିବା ଓ ପୋଖରୀରେ ଯାଆଁଳ ଛାଡିବା ବେଳେ ମହିଳା ଗୋଷ୍ଠୀର ସମସ୍ତ ମା' ମାନେ ଉପସ୍ଥିତ ରହି ଥାଉଛନ୍ତି ।
ଏତଦ୍ ବ୍ୟତିତ ଜିଲ୍ଲା ମତ୍ସ୍ୟ ବିଭାଗର ଜିଲ୍ଲା ମତ୍ସ୍ୟ ଅଧିକାରୀ ମନୋଜ କୁମାର ପାତ୍ର ,କନିଷ୍ଠ ମତ୍ସ୍ୟ ବୈଷୟିକ ସହାୟିକା ଶୁଭଶ୍ରୀ ପାଲ ଓ ମିଶନ ଶକ୍ତି ଗୋଷ୍ଠୀ ପ୍ରକଳ୍ପ ସଂଯୋଜକ ଲାବନ ରଈତ ପ୍ରମୁଖ ପୋଖରୀ ସ୍ଥଳରେ ଉପସ୍ଥିତ ରହି ମାଛ ଚାଷର ବିଭିନ୍ନ ଦିଗ ଉପରେ ସଚେତନ କରାଇଥିଲେ ।
