ଓଲଟପୁରରେ ସୁଶ୍ରୁତ ସ୍ୱାସ୍ଥ୍ୟ ସହାୟତା କେନ୍ଦ୍ରର ଭିତିପ୍ରସ୍ତର ସ୍ଥାପନ କଲେ କେନ୍ଦ୍ରମନ୍ତ୍ରୀ
ଉତ୍କଳ ବିପନ୍ନ ସହାୟତା ସମିତି ଓଡିଶାର ଗୋଟିଏ ଅଗ୍ରଣୀ ସ୍ୱୟଂସେବୀ ସଂଗଠନ
ବାତ୍ୟା, ବନ୍ୟା ଓ ମରୁଡି ପ୍ରପୀଡିତ ରାଜ୍ୟରେ ବିପନ୍ନ ଲୋକମାନଙ୍କୁ ସାମାଜିକ ସାହାଯ୍ୟ ଯୋଗାଇଦେବାର ୪୫ ବର୍ଷ ଧରି ନିରନ୍ତର ପ୍ରୟାସ କରିଛି ସଙ୍ଗଠନ
ଗ୍ରାମାଂଚଳର ଗରିବ ଲୋକଙ୍କୁ ମେଡିକାଲ ସହାୟତା ସହ ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥାକୁ ଏହି ସୁଶ୍ରୁତ ସ୍ୱାସ୍ଥ୍ୟ ସହାୟତା କେନ୍ଦ୍ର ସହାୟକ ହେବ
ଓଲଟପୁର –ଓଡିଶା ସୁସ୍ଥ , ଶକ୍ତିଶାଳୀ ଏବଂ ସ୍ୱୟଂସମ୍ପନ୍ନ ହେଉ ଏହା ଆମର ଲକ୍ଷ୍ୟ ବୋଲି କଟକ ଜିଲ୍ଲାର ନିଆଳି ବ୍ଲକ ଓଲଟପୁର ଠାରେ ସୁଶ୍ରୁତ ସ୍ୱାସ୍ଥ୍ୟ ସହାୟତା କେନ୍ଦ୍ରର ଭିତିପ୍ରସ୍ତର ସ୍ଥାପନ ଦିବସରେ ଯୋଗଦେଇ କେନ୍ଦ୍ରମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ।
ଶ୍ରୀ ପ୍ରଧାନ କହିଛନ୍ତି ଓଡିଶାର ବଡ ବଡ ମେଡିକାଲ ସେଂଟର ଯଥା କଟକ, ବୁର୍ଲା, ବ୍ରହ୍ମପୁର, ଭୁବନେଶ୍ୱରର ହସ୍ପିଟାଲକୁ ରୋଗୀମାନେ ଗଲେ ଚିକିତ୍ସା ହୋଇପାରନ୍ତି । ବିଶେଷତଃ ମେଡିକାଲରେ ସମ୍ପନ୍ନ ଲୋକମାନେ ଚିକିତ୍ସା ହୋଇପାରୁଥିବା ବେଳେ ଗରିବ ଲୋକମାନେ ଏଥିପାଇଁ ସକ୍ଷମ ହୋଇନଥାନ୍ତି । ଏହାକୁ ଧ୍ୟାନରେ ରଖି ଗ୍ରାମାଂଚଳର ଗରିବ ଲୋକଙ୍କୁ ମେଡିକାଲ ସହାୟତା ସହ ଅନ୍ୟାନ୍ୟ ଆନୁଷଙ୍ଗୀକ ବ୍ୟବସ୍ଥାକୁ ଏହି ସୁଶ୍ରୁତ ସ୍ୱାସ୍ଥ୍ୟ ସହାୟତା କେନ୍ଦ୍ର ସହାୟକ ହେବ ବୋଲି କହିଛନ୍ତି ଶ୍ରୀ ପ୍ରଧାନ ।
ଶ୍ରୀ ପ୍ରଧାନ କହିଛନ୍ତି ଯେ ଏହା ପୂର୍ବ ଭାରତ ଓ ଓଲଟପୁର ପାଇଁ ନୂଆ ପରିଚୟ ତିଆରି କରପାରିଛି । ଏହି ହସ୍ପିଟାଲକୁ ଆହୁରି ବଡ କରିବାର ଆବଶ୍ୟକତା ଅଛି । କଟକ, ପୁରୀ, ଜଗତସିଂହପୁରର କେନ୍ଦ୍ରସ୍ଥ ଅଂଚଳ ଓଲଟପୁର । ଓଲଟପୁର ଅଂଚଳରେ କେବଳ ସ୍ନାୟୁ କିମ୍ବା ଅସ୍ଥି ସମ୍ପର୍କର ବିଷୟ ନୁହେଁ, ଗ୍ରାମାଂଚଳର ସ୍ୱାସ୍ଥ୍ୟସେବାକୁ ଧ୍ୟାନ ଦେବା ପାଇଁ ଏଠାରେ ଗୋଟେ ସ୍ୱାସ୍ଥ୍ୟ କେନ୍ଦ୍ର ତିଆରି କରାଯିବ ବୋଲି ସେ କହିଛନ୍ତି ।
ଶ୍ରୀ ପ୍ରଧାନ କହିଛନ୍ତି ଯେ ଭାରତ ସରକାରଙ୍କ ତୈଳ କମ୍ପାନୀ ଓଏନ୍ଜିସି ତରଫରୁ ପାଖାପାଖି ୧୫ ହଜାର ସ୍କୋୟାର ଫୁଟର ୫ ମହଲା ବିଶିଷ୍ଟ କୋଠା ତିଆରି ହେବ । ଫଳରେ ବର୍ଷକୁ ୪୦୦୦ ରୋଗୀ, ୩୦୦୦ ସହାୟକଙ୍କର ଖାଦ୍ୟପେୟ ଓ ରହଣୀ ବ୍ୟବସ୍ଥା ପାଇଁ ୨ କୋଟି ୩୨ ଲକ୍ଷ ଟଙ୍କା ବ୍ୟୟବରାଦରେ ଓଏନଜିସି ତରଫରୁ ୟୁବିଏସଏସକୁ ଦାୟିତ୍ୱ ଦେଇ ଗୋଟିଏ ଅତ୍ୟାଧୁନିକ ଆଧୁନିକ ଧର୍ମଶାଳା ବନେଇବାର ଏଠାରେ ପରିକଳ୍ପନା ଅଛି ବୋଲି ସେ କହିଛନ୍ତି । ଏହି କ୍ଷେତ୍ରରେ ୟୁବିଏସଏସର ପ୍ରଚେଷ୍ଟାକୁ ସମର୍ଥନ କରିଛନ୍ତି । ଉତ୍କଳ ବିପନ୍ନ ସହାୟତା ସମିତି ଓଡିଶାର ଗୋଟିଏ ଅଗ୍ରଣୀ ସ୍ୱୟଂସେବୀ ସଂଗଠନ । ବିଶେଷ କରି ବାତ୍ୟା, ବନ୍ୟା ଓ ମରୁଡି ପ୍ରପୀଡିତ ରାଜ୍ୟରେ ବିପନ୍ନ ଲୋକମାନଙ୍କୁ ସାମାଜିକ ସାହାଯ୍ୟ ଯୋଗାଇଦେବାର ୪୫ ବର୍ଷର ଗୋଟିଏ ନିରନ୍ତର ପ୍ରୟାସ ଜାରି ରଖିଛି ସଙ୍ଗଠନ । ସେହିପରି ଗୋଟିଏ ସଂସ୍କାରର ନାମ ଉତ୍କଳ ବିପନ୍ନ ସହାୟତା ସମିତି ବୋଲି ସେ କହିଛନ୍ତି ।
କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ନରସେବା ହିଁ ନାରାୟଣ ସେବା । ନରକୁ ସେବା କଲେ ଜଗନ୍ନାଥଙ୍କର ସେବା ହେବ । ଓଡିଆ ଲୋକମାନଙ୍କ ଏହା ସଂସ୍କୃତି । ପଣ୍ଡିତ ଗୋପବନ୍ଧୁ ଦାସ ଲୋକଙ୍କ ସେବା କରିବା ପାଇଁ ଚୁଡା, ଚାଉଳ ବାଂଟିବା ପାଇଁ ଯାଉଥିଲେ । ସେହିପରି ଉତ୍କଳୀୟ ପରମ୍ପରାକୁ ୟୁବିଏସ୍ଏସ୍ ନେତୃତ୍ୱରେ ନିରନ୍ତର କାର୍ଯ୍ୟ ଜାରି ରଖିବାର ଆବଶ୍ୟକ ରହିଛି ବୋଲି ଶ୍ରୀ ପ୍ରଧାନ କହିଛନ୍ତି ।