ଝାରସୁଗୁଡ଼ା, ୨୬ ଏପ୍ରିଲ: ଝାରସୁଗୁଡ଼ା ପୋଲିସ ଏକ ଆନ୍ତଃଜିଲ୍ଲା ଗଞ୍ଜେଇ ଚୋରା ଚାଲାଣ ଚକ୍ରକୁ ଧ୍ୱଂସ କରି ୩ ଜଣ ଅଭିଯୁକ୍ତଙ୍କୁ ଗିରଫ କରିଛି। ବିଶ୍ୱସ୍ତ ସୂତ୍ରରୁ ସୂଚନା ପାଇ ସଦର ଥାନା ପୋଲିସର ଏକ ବିଶେଷ ଟିମ୍ ଚଢ଼ାଉ କରି ଏହି ସଫଳତା ଲାଭ କରିଥିଲା।
ଚଢ଼ାଉ ସମୟରେ ଅଭିଯୁକ୍ତମାନଙ୍କ ନିକଟରୁ ୨୦ କିଲୋ ୪୨୫ ଗ୍ରାମ ଗଞ୍ଜେଇ ଜବତ କରାଯାଇଛି। ଏଥିସହ ୨ଟି ବାଇକ, ୩ଟି ମୋବାଇଲ ଫୋନ୍ ଏବଂ ନଗଦ ୩୨୫୦ ଟଙ୍କା ମଧ୍ୟ ଜବତ ହୋଇଛି। କାର୍ଯ୍ୟନିର୍ବାହୀ ମାଜିଷ୍ଟ୍ରେଟ ଓ ସାକ୍ଷୀଙ୍କ ଉପସ୍ଥିତିରେ ଏନଡ଼ିପିଏସ ଆଇନ ଅନୁଯାୟୀ ସମସ୍ତ ନିଷିଦ୍ଧ ସାମଗ୍ରୀକୁ ଜବତ କରାଯାଇଥିଲା।
ଗିରଫ ଅଭିଯୁକ୍ତମାନେ ସମ୍ବଲପୁର ଜିଲ୍ଲାର ଦିବ୍ୟ ଶଙ୍କର ନାଏକ (୫୫), ସନତ ନାଏକ (୨୪) ଏବଂ ସମୀର ପ୍ରଧାନ (୧୯) ବୋଲି ପରିଚୟ ମିଳିଛି।
ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଅଭିଯୁକ୍ତମାନେ ବାହାର ଜିଲ୍ଲାରୁ ଗଞ୍ଜେଇ ଆଣି ଝାରସୁଗୁଡ଼ା ଅଞ୍ଚଳରେ ବିକ୍ରି କରୁଥିଲେ ଏବଂ ବିଶେଷକରି ଯୁବପିଢ଼ିଙ୍କୁ ଲକ୍ଷ୍ୟ କରୁଥିଲେ। ରବିବାର ସେମାନଙ୍କୁ କୋର୍ଟରେ ପ୍ରସ୍ତୁତ କରାଯାଇଛି।
