ଭୁବନେଶ୍ୱର, ଏପ୍ରିଲ ୧୫: କୋଭିଡର ବିଭୀଷିକା ପରେ ଜଳବାୟୁ ପରିବର୍ତନ ହିଁ ମାନବ ସମାଜ ନିମନ୍ତେ ସବୁଠାରୁ ବଡ଼ ସଙ୍କଟ । ଏଥିପାଇଁ ଏ ବିଷୟରେ ଜନସାଧାରଣଙ୍କୁ ସଚେତନ କରାଇବା ସବୁଠାରୁ ବଡ଼ ଆବଶ୍ୟକତା ବୋଲି ବିଶିଷ୍ଟ ପରିବେଶ ବିଜ୍ଞାନୀ ତଥା ଶିକ୍ଷା ଓ ଅନୁସନ୍ଧାନ (ସୋଆ) ବିଶ୍ୱବିଦ୍ୟାଳୟର ଡିଷ୍ଟିଙ୍ଗୁଇସଡ୍ ପ୍ରଫେସର ଉମା ଚରଣ ମହାନ୍ତି କହିଛନ୍ତି ।
ସାଇନ୍ସ ଫର କମନ୍ ପିପୁଲ ସୋସାଇଟି (ସ୍କୋପସ)ର ସଭାପତି ଥିବା ପ୍ରଫେସର ମହାନ୍ତି କହିଛନ୍ତି ଯେ ଜଳବାୟୁ ପରିବର୍ତନ ଖାଦ୍ୟ ନିରାପତା, ମାନବ ସ୍ୱାସ୍ଥ୍ୟ ଓ ଜଳ ସଂପଦ ଉପରେ ସବୁଠାରୁ ଅଧିକ ପ୍ରଭାବ ପକାଇବ । ସୋଆ ବିଶ୍ୱବିଦ୍ୟାଳୟ ଠାରେ ନିକଟରେ ଅନୁଷ୍ଠିତ ସ୍କୋପସ୍ର ପରିଚାଳନା କମିଟିର ସଭାରେ ବକ୍ତବ୍ୟ ରଖି ସେ ଏହା କହିଛନ୍ତି ।
ପୂର୍ବରୁ ଆଇଆଇଟି ଦିଲ୍ଲୀ ଓ ଆଇଆଇଟି ଭୁବନେଶ୍ୱର ଠାରେ ଶିକ୍ଷା ଦାନ କରିଥିବା ପ୍ରଫେସର ମହାନ୍ତି ବର୍ତମାନ ସୋଆ ପରିଚାଳିତ ସେଂଟର ଫର କ୍ଲାଇମେଟ ସ୍ମାର୍ଟ ଏଗ୍ରିକଲ୍ଚର ଠାରେ ଡିଷ୍ଟିଙ୍ଗୁଇସଡ ପ୍ରଫେସର ଭାବେ କାର୍ଯ୍ୟ କରୁଛନ୍ତି ।
ଏହି ଅବସରରେ ସୋଆର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ସ୍କୋପସର ଲୋଗୋ ଉନ୍ମୋଚନ କରି କହିଥିଲେ ଯେ ଜନସାଧାରଣଙ୍କୁ ବିଜ୍ଞାନ ବିଷୟରେ ଅବଗତ କରାଇବା ନିମନ୍ତେ ବିଶ୍ୱବିଦ୍ୟାଳୟ ଅନେକ କାର୍ଯ୍ୟକ୍ରମ ହାତକୁ ନେଇଛି । ଏହା ସେମାନଙ୍କର ଦୈନନ୍ଦିନ ଜୀବନଶୈଳୀକୁ ପ୍ରଭାବିତ କରିବା ସଂଗେ ସଂଗେ ସନ୍ତୁଳନ ସହ ବିକାଶକୁ ପ୍ରୋତ୍ସାହିତ କରିବ ବୋଲି ସେ କହିଥିଲେ ।
ସ୍କୋପସର ସଦସ୍ୟ ରହିଥିବା ସୋଆ ଜନସାଧାରଣଙ୍କ ନିକଟରେ ବିଜ୍ଞାନ ଓ ପ୍ରଯୁକ୍ତି ବିଦ୍ୟାରେ ଉପଲବ୍ଧ ହେଉଥିବା ସଦ୍ୟତମ ଜ୍ଞାନ ପହଂଚାଇବା ନିମନ୍ତେ ଏକ ବହୁମୁଖୀ ଆଭିମୁଖ୍ୟ ଗ୍ରହଣ କରିଛି । ବିଶ୍ୱବିଦ୍ୟାଳୟର କୃଷି ବିଜ୍ଞାନ ଛାତ୍ରଛାତ୍ରୀମାନେ କୃଷକମାନଙ୍କ ସହ ସମୟ କ୍ଷେପଣ କରି କୃଷିର ଉନ୍ନତି ନିମନ୍ତେ ସେମାନଙ୍କୁ ପ୍ରଶିକ୍ଷଣ ଦେଉଛନ୍ତି ବୋଲି ସେ ଉଲ୍ଲେଖ କରିଥିଲେ ।
ପ୍ରଫେସର ମହାନ୍ତି କୃଷି ଉତ୍ପାଦନକୁ ବର୍ଦ୍ଧିତ କରିବା ନିମନ୍ତେ ବିଭିନ୍ନ ଉପାୟ ଅବଲମ୍ବନ କରିବାର ଆବଶ୍ୟକତା ରହିଛି ବୋଲି କହି ଜଳବାୟୁ ପରିବର୍ତନ କୃଷି ଉତ୍ପାଦନକୁ ପ୍ରଭାବିତ କରିପାରେ ବୋଲି ପ୍ରକାଶ କରିଥିଲେ ।
ସ୍କୋପସର ସଂପାଦକ ଡ. ନିହାର ରଞ୍ଜନ ଦାସ କହିଥିଲେ ଯେ ଏହି ଅନୁଷ୍ଠାନ ସ୍ଥାପନ ହେବା ପଛରେ ସୋଆର ପ୍ରତିଷ୍ଠାତା ସଭାପତି ପ୍ରଫେସର (ଡକ୍ଟର) ମନୋଜରଞ୍ଜନ ନାୟକଙ୍କ ପ୍ରୋତ୍ସାହନ ରହିଛି । କୋଭିଡର ବିଭୀଷକା ପରେ ପ୍ରଫେସର (ଡ) ନାୟକ ଚିନ୍ତା କରିଥିଲେ ଯେ ବିଜ୍ଞାନର କ୍ରମବିକାଶ ହେଉଥିବା ବେଳେ ଏହାର ଲାଭ ତୃଣମୂଳ ସ୍ତରରେ ପହଂଚିବା ଆବଶ୍ୟକ । ତାଙ୍କ ମତରେ ବିଜ୍ଞାନାଗାରରୁ ଉପଲବ୍ଧ ଲାଭ ଜନସାଧାରଣଙ୍କ ଉପକାରରେ ଆସିବା ଜରୁରୀ । ଏହି ଚିନ୍ତା ଫଳରେ ସ୍କୋପସ ଜନ୍ମ ଲାଭ କରିଛି ବୋଲି ଡ. ଦାସ କହିଥିଲେ ।
ପ୍ରଫେସର ମହାନ୍ତି କହିଥିଲେ ଯେ ସ୍କୋପସ ମୂଳତଃ ଆଠଟି ବିଷୟ ଉପରେ ଧ୍ୟାନ କେନ୍ଦ୍ରୀଭୂତ କରି କାର୍ଯ୍ୟ କରୁଛି । ଏହି ବିଷୟଗୁଡ଼ିକ ମଧ୍ୟରେ ପାଣିପାଗ, ଜଳବାୟୁ ଓ ଜଳବାୟୁ ପରିବର୍ତନ, ପ୍ରାକୃତିକ ବିପର୍ଯ୍ୟୟ ଓ ବିପର୍ଯ୍ୟୟ ପରିଚାଳନା, ଖାଦ୍ୟ ସୁରକ୍ଷା, ଶକ୍ତି, ଜଳ ସଂରକ୍ଷଣ ଓ ପରିଚାଳନା, ପରିବେଶ, ପ୍ରଦୂଷଣ ଓ ବର୍ଜ୍ୟବସ୍ତୁ ପରିଚାଳନା ଓ ସନ୍ତୁଳିତ ବିକାଶ ଅନ୍ତର୍ଭୁକ୍ତ ।
ସ୍କୋପସ ମଧ୍ୟ ସ୍କୁଲ ଛାତ୍ରଛାତ୍ରୀମାନଙ୍କ ନିମନ୍ତେ ‘ଏନ୍ଭାଇରନ୍ମେଂଟ ଆଣ୍ଡ କ୍ଲାଇମେଟ ଅଲିମ୍ପିଆଡ’ ତଥା ଉଷ୍ଣ ପ୍ରବାହ, ସାମୁଦ୍ରିକ ଝଡ଼, ବଜ୍ରପାତ ଓ ଡେଙ୍ଗୁ ଓ ମ୍ୟାଲେରିଆ ଭଳି ରୋଗ ବିଷୟରେ ସଚେତନତା ସୃଷ୍ଟି ନିମନ୍ତେ ‘ଜନ ବିଜ୍ଞାନ ଯାତ୍ରା’ ଆୟୋଜନ କରିବ ବୋଲି ସେ କହିଥିଲେ ।
ଏହି ସଭାରେ ଭୁବନେଶ୍ୱର ପାଣିପାଗ କେନ୍ଦ୍ରର ନିଦେ୍ର୍ଧଶିକା ଡ. ମନୋରମା ମହାନ୍ତି, ସୋଆ ପରିଚାଳିତ ଇନଷ୍ଟିଟ୍ୟୁଟ ଅଫ୍ ଟେକ୍ନିକାଲ୍ ଏଜୁକେସନ୍ ଆଣ୍ଡ ରିସର୍ଚ୍ଚ (ଆଇଟିଇଆର)ର ନିର୍ଦ୍ଦେଶକ ପ୍ରଫେସର ମାନସ କୁମାର ମଲ୍ଲିକ, ସେଂଟର ଫର କ୍ଲାଇମେଟ ସ୍ମାର୍ଟ ଏଗ୍ରିକଲ୍ଚରର ନିଦେ୍ର୍ଧଶକ ପ୍ରଫେସର ରବୀନ୍ଦ୍ର କୁମାର ପଣ୍ଡା ଓ ସୋଆର ଚିଫ୍ ଆଡମିନିଷ୍ଟେ୍ରଟିଭ୍ ଅଫିସର ଶ୍ରୀ ପ୍ରମୋଦ କୁମାର ପଣ୍ଡା ପ୍ରମୁଖ ଉପସ୍ଥିତ ଥିଲେ ।