-
ବିଜେଡ଼ି ଓ ବିଜେପି ମଧ୍ୟରେ ଥିବା ସନ୍ଧି ଉଭୟ ସଂସଦ ଓ ବିଧାନ ସଭାରେ ଦେଖୁବାକୁ ମିଳିଲା - ତାରା
-
ରାଜାଚକ୍ର ଆକାଉଣ୍ଟରୁ ଏତେ ଟଙ୍କା ବିଜେପି ସଭାପତିଙ୍କ ଖାତାକୁ କାହିଁକି ଯାଇଛି ? - ତାରା
ଭୁବନେଶ୍ଵର, ତା ୦୪.୦୪ ରିଖ : -ଭାରତ ବର୍ଷର ଗଣତାନ୍ତ୍ରିକ ଇତିହାସରେ ପ୍ରଥମ ଥର ପାଇଁ ଓଡ଼ିଶା ବିଧାନସଭାର ଗୃହ ଭିତରକୁ ପୁଲିସ ପଶି ବିଧାନସଭାର ଧାରଣାରେ ବସିଥିବା କଂଗ୍ରେସ ସଦସ୍ୟ ମାନଙ୍କୁ ବଳପ୍ରୟୋଗ କରି ଏବଂ ତାଙ୍କୁ ଧସ୍ତାଧସ୍ତି କରି ବିଳମ୍ବିତ ରାତ୍ରିରେ ଆଣି ମାଷ୍ଟରକ୍ୟାଣ୍ଟିନ ଛକରେ ଛାଡ଼ିଲା । ସାରା ପୃଥିବୀର ଗଣତାନ୍ତ୍ରିକ ବ୍ୟବସ୍ଥାକୁ ଆପଣେଇ ଥିବା କୌଣସି ଏକ ରାଷ୍ଟ୍ରରେ ଏଭଳି ଘଟଣା କେବେ ଘଟିନାହିଁ ବା ଘଟିବାର ନଜିର ମଧ୍ୟ ନାହିଁ । ଆଜି ଯେଉଁମାନେ ଓଡ଼ିଶାରେ କ୍ଷମତାରେ ଅଛନ୍ତି ସେମାନେ କେବେହେଲେ ଭାରତ ବର୍ଷର ସ୍ଵାଧୀନତା ଆନ୍ଦୋଳନରେ ଅଂଶ ଗ୍ରହଣ କରିନଥିଲେ କିମ୍ବା ଆମେ ଆପଣେଇଥୁବା ଗଣତାନ୍ତ୍ରିକ ବ୍ୟବସ୍ଥା ପ୍ରତି ମଧ୍ୟ ତାଙ୍କର ସମ୍ମାନ ଓ ସହମତି ନଥିଲା ଓ ଆଳି ମଧ୍ୟ ନାହିଁ । ମୂଳ ପ୍ରଶ୍ନ ହେଉଛି ସମ୍ବିଧାନର ଧାରା ୧୦୮ ଅନୁସାରେ ଓଡ଼ିଶା ବିଧାନସଭାର ପରିଚାଳନା କରିବା ପାଇଁ ଯେଉଁ ଆଇନ୍ ଓ ବ୍ୟବସ୍ଥା ପ୍ରଣୟନ କରାଯାଇଛି ତା'ର ନିୟମ ୨୧୬ ଅନୁସାରେ ବିଧାନସଭାର ବାସସ୍ପତି ଗୃହକୁ ସୂଚାରୁରୂପେ ପରିଚାଳନା କରିବା ତାଙ୍କର ଦାୟିତ୍ଵ । ଗୃହ ଚାଲିଥିବା ସମୟରେ ବାଚସ୍ପତି ମହୋଦୟା ଯେଉଁ ରୁଲିଂ ଦେବେ ତାହା ତୁରନ୍ତ କାର୍ଯ୍ୟକାରୀ କରାଯାଏ କିନ୍ତୁ ଯେତେବେଳେ ଗୃହ ବନ୍ଦ ରହିଛି ସେ ସମୟରେ ବାଚସ୍ପତି ମହୋଦୟା କୌଣସି ରୁଲିଙ୍ଗ୍ ଦେଇପାରିବେ ନାହିଁ। ବୋଲି ଏହି ନିୟମରେ ଉଲ୍ଲେଖ ଅଛି । ତେଣୁ ଯେତେବେଳେ ଗୃହ ବନ୍ଦ ରହିଥୁଲା ସେତେବେଳେ କାହା ନିର୍ଦ୍ଦେଶରେ ପୁଲିସ ବିଧାନସଭାର ପବିତ୍ର ଗୃହ ଭିତରକୁ ପ୍ରବେଶ କରିଥିଲା ବୋଲି ଆଜି ପ୍ରଦେଶ କଂଗ୍ରେସ କାର୍ଯ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ପୂର୍ବତନ ପ୍ରଦେଶ କଂଗ୍ରେସ ସଭାପତି ଶ୍ରୀ ପ୍ରସାଦ ହରିଚନ୍ଦନ କହିଥିଲେ ।
ଶ୍ରୀ ହରିଚନ୍ଦନ ଆହୁରି କହିଥିଲେ ଯେ ଏଭଳି ସ୍ଥିତି ଆମ ଗଣତନ୍ତ୍ର ପ୍ରତି ଘୋର ବିପଦ ସୃଷ୍ଟି କରୁଛି । ବାଚସ୍ପତି ମହୋଦୟା ରାଜ୍ୟବାସୀଙ୍କ ସମ୍ମୁଖରେ ଏହାର ସଂପୂର୍ଣ୍ଣ ତଥ୍ୟ ରଖନ୍ତୁ । ବିଧାନସଭା ଭିତରକୁ କେବଳ ବିଧାୟକମାନଙ୍କର ଯିବାର ଅନୁମତି ଅଛି । ବିଧାନସଭା ବନ୍ଦ ଥିବାବେଳେ କିପରି ପୁଲିସ ବିଧାନସଭା ଭିତରକୁ ପଶିଲେ ? ଯଦି ପୁଲିସ ଅଧିକାରୀମାନେ ଅନଧିକାରଭାବେ ବିଧାନସଭା ଗୃହ ଭିତରକୁ ପ୍ରବେଶ କରିଛନ୍ତି ତାହାଲେ ବାଚସ୍ପତି ମହୋଦୟା ତାଙ୍କ ବିରୁଦ୍ଧରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ସେ ଦାବି କରିଛନ୍ତି । ଯଦି ବିଧାନସଭା ଚାଲୁନଥୁଲା ଏବଂ ବାଚସ୍ପତିଙ୍କର ନିର୍ଦ୍ଦେଶ ଦେବାରେ କ୍ଷମତା ରୁଲ୍-୨୧୬ ଅନୁସାରେ ନାହିଁ ତାହାଲେ କାହା ନିର୍ଦ୍ଦେଶବଳରେ ପୁଲିସ ସେଠାରେ ପଶିଥିଲା । ଏ କଥା ରାଜ୍ୟବାସୀଙ୍କ ଜାଣିବାର ଅଧିକାର ଅଛି।
କଂଗ୍ରେସ ର ଏକ ପ୍ରତିନିଧୂଦନ ରାଜ୍ୟପାଳଙ୍କୁ ମଧ୍ୟ ଭେଟିଥିଲେ ଏବଂ ଦାବି ପତ୍ର ମଧ୍ୟ ଏହି ଘଟଣାକୁ ନେଇ ଦିଆଯାଇଥିଲା । ମହାମହିମ ରାଜ୍ୟପାଳ ଆମ ଶାସନ ବ୍ୟବସ୍ଥାର ସର୍ବୋଚ୍ଚ ଅଧୁକାରୀ। ଆମ ସାମ୍ବିଧାନିକ ବ୍ୟବସ୍ଥାରେ ରାଜ୍ୟପାଳ ହେଉଛନ୍ତି ରାଜ୍ୟର ସର୍ବମୁଖ୍ୟ । ଏଣୁ ଏହି ଯୁକ୍ତିରେ ମହାମହିମ ରାଜ୍ୟପାଳ ଏ ଅଗଣତାନ୍ତ୍ରିକ ଓ ସମ୍ବିଧାନ ବିରୋଧି ନିଷ୍ପତି ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ କାହା ନିର୍ଦ୍ଦେଶରେ ପୁଲିସ ବିଧାନସଭା ଭିତରକୁ ପ୍ରବେଶ କରିଥିଲା ତାହା ମଧ୍ୟ ସେ ସାର୍ବଜନିନ କରିବା ଉଚିତ୍।
ବିଧାୟକମାନଙ୍କୁ ବିଧାନସଭାରୁ ଅସାମ୍ବିଧାନିକ ଉପାୟରେ ବରଖାସ୍ତ କରି ଗଣତନ୍ତ୍ରର କଣ୍ଠରୋଧ କରିବା ଅତ୍ୟନ୍ତ ଚିନ୍ତା ଓ କ୍ଷୋଭର ବିଷୟ । ଆମ ସମୟରେ ଗୁରୁତ୍ବପୂର୍ଣ୍ଣ ବିଲ୍ ପ୍ରସଙ୍ଗରେ ରାତି ରାତି ଆଲୋଚନା ହୋଇଛି। ବିରୋଧ ବିଧାୟକମାନେ ବହୁ ହଟ୍ଟଗୋଳ କରିଛନ୍ତି କିନ୍ତୁ ଓଡ଼ିଶା ବିଧାନସଭା ଇତିହାସରେ ଏଭଳି ନିଷ୍ପତି କେବେ ନିଆଯାଇନାହିଁ।
ସାମ୍ବାଦିକମାନଙ୍କ ୱାକ୍ଅଫ୍ ବୋର୍ଡ଼ ବିଲ୍ ପାରିତ ପ୍ରସଙ୍ଗରେ ଉତର ରଖ୍ ସେ କହିଥିଲେ ବିଜେଡ଼ି-ବିଜେପି ଏକ। ଏମାନଙ୍କ ଭିତରେ ଏକ ପ୍ରକାର ଡିଲ୍ ହୋଇଛି। ୱାକ୍ଅଫ୍ ବିଲ ଆସିବା ପୂର୍ବରୁ ଖୋଦ ବିଜୁ ଜନତାଦଳ ର ସଭାପତି ଶ୍ରୀ ନବୀନ ପଟ୍ଟନାୟକ ଏବଂ ଦଳର ସାଂସଦ ମାନେ ଏହି ବିଲ୍କୁ ବିରୋଧ କରିବେ ବୋଲି କହିଥିଲେ । ଏହି ବିଲ୍ ଅଳ୍ପ ସଂଖ୍ୟକଙ୍କ ବିରୁଦ୍ଧରେ ଏକ ଷଡଯନ୍ତ୍ର ବୋଲି ବିଲ୍ ଉପସ୍ଥାପିତ ହେବାର ୨୪ ଘଣ୍ଟା ପୂର୍ବରୁ କହିଥିଲେ । କିନ୍ତୁ ବିଲ୍ ଉପସ୍ଥାପିତ ହେବା ଦିନ ବିଜୁ ଜନତା ଦଳ ତରଫରୁ ହୁଇପ୍ ଜାରି ପରିବର୍ତେ ଯେଉଁ ନିଷ୍ପତି ନିଆଗଲା ତାହା ଏମାନଙ୍କ ଭିତରେ ଥିବା ଡିଲ ପଦାରେ ପକାଇଲା। କଂଗ୍ରେସ ବାରମ୍ବାର କହିଆସୁଛି ବିଜେଡ଼ି-ବିଜେପି ଏକ। ଏମାନେ ଅଭିନ୍ନ। ମୁଖ୍ୟମନ୍ତ୍ରୀ ଏହି ବିଲ୍ ଉପସ୍ଥାପନ ହେବାର କିଛିଦିନ ପୂର୍ବରୁ ଦୀଲ୍ଲି ଯାଇଥିଲେ କ'ଣ ଆଲୋଚନା ହେଲା କେଜାଣି । ତୁରନ୍ତ ନିଷ୍ପତି ବଦଳିଗଲା । ରାଜ୍ୟରେ ମୁସଲମାନ ଭାଇ ଓ ଭଉଣୀମାନେ ବିଜୁ ଜନତା ଦଳର ଅସଲ ରୂପକୁ ଦେଖିଲେ । ଆଚରଣ ଓ ଉଚ୍ଚାରଣ କେତେ ଭିନ୍ନ ତାହା ବାରମ୍ବାର ରାଜ୍ୟବାସୀ ଦେଖୁଛନ୍ତି ବୋଲି ସେ କହିଛନ୍ତି ।
ଖଣି ଦୁର୍ନିତ ପ୍ରସଙ୍ଗରେ ସାମ୍ବାଦିକମାନଙ୍କ ଏକ ପ୍ରଶ୍ନର ଉତର ରଖ୍ କଂଗ୍ରେସ ବିଧାୟକ ଦଳର ନେତା ଶ୍ରୀ ରାମଚନ୍ଦ୍ର କାଡାମ୍ କହିଲେ ଯେ, ନୂଆ ସରକାର ଆସିଲା ପରେ ରାଜ୍ୟବାସୀ ଭାବିଥିଲେ ଖଣିମାଲିକଙ୍କ ସହିତ ରାଜ୍ୟରେ ଡବଲ ଇଞ୍ଜିନ ସରକାର କୌଣସି ପ୍ରକାର ବୁଝାମଣା କରିବ ନାହିଁ ବୋଲି ? କିନ୍ତୁ ଗତକାଲି ସିଏଜିଙ୍କ ରିପୋର୍ଟ ଆସିଲା ପରେ ଯେଉଁ ସବୁ ଘଟଣା ପ୍ରଘଟ ହେଲା ତାହା ଅତ୍ୟନ୍ତ ଆଶ୍ଚର୍ଯ୍ୟଜନକ। ରାଜ୍ୟରେ ଆଇନ୍କୁ ଉଲଙ୍ଘନ କରି ଯେଉଁ ଖଣିମାଲିକ ମାନେ ଦୀର୍ଘ ବର୍ଷ ଧରି ଖଣିଜ ପଦାର୍ଥ ଉତୋଳନ କରିଥିଲେ ସେମାନଙ୍କ ଉପରେ ସୁପ୍ରିମ୍କୋର୍ଟ ନିର୍ଦ୍ଦେଶନାମା ବଳରେ ସୁପ୍ରିମ୍କୋର୍ଟ ଦ୍ୱାରା ଯେଉଁ ସିଇସି ଫାଇନ୍ ଆଦାୟ ପାଇଁ ନିର୍ଦ୍ଦେଶ ଦେଇଥିଲେ ଆଜି ସୁଧା ରାଜ୍ୟ ସରକାର ସେ ସବୁ ଖଣିମାଲିକଙ୍କ ପାଖରୁ ୩୯୬୬,୩୪ ଲକ୍ଷ କୋଟି ଟଙ୍କା ଆଦାୟ କରିନାହାନ୍ତି। ଏତେବଡ଼ ଅର୍ଥ ୨୦୧୮ ମସିହା ପାଖରୁ ଆଜି ପର୍ଯ୍ୟନ୍ତ ଆଦାୟ କରାଯାଇନାହିଁ । ବିଜେପିର ନୂଆ ସରକାର ଆସିବା ୧୦ ମାସ ପରେ ମଧ୍ୟ ଏହି ଅର୍ଥ ଆଦାୟ କରାଯାଇନାହିଁ କାହିଁକି ବୋଲି ସେ ପ୍ରଶ୍ନ କରିଛନ୍ତି | ଏହାଦ୍ୱାରା ରାଜ୍ୟ ସରକାର ବା ବିଜେପି ଦଳ ଉଭୟ କେନ୍ଦ୍ର ଓ ରାଜ୍ୟ ମଧ୍ୟରେ କେଉଁଭଳି ଭାବେ ଲାଭାନ୍ତିତ ହୋଇଛନ୍ତି ତାହାର ଉତ୍ତର ରଖନ୍ତୁ । ରାଜ୍ୟରେ ଲହୁ ଖଣିଜ ଦ୍ରବ୍ୟର ଯଥା ମୋରମ, ମାଙ୍କଡା ପଥର, ବାଲି ଓ ପଥରର ହଜାର ହଳାର କୋଟି ଟଙ୍କା ଚୋର ଚାଲାଣ ହେଉଛି । ସରକାର ଙ୍କ ନାକ ନିଶ ତଳେ ଏହା ହେଉଛି । କିନ୍ତୁ ଡବଲ ଇଞ୍ଜିନ ସରକାର ଏ ଘଟଣାର ସଂପୂର୍ଣ୍ଣ ନୀରବ କାହିଁକି ? ରାଜ୍ୟରେ ବିଭିନ୍ନ ଖଣିଜ ଦ୍ରବ୍ୟ ଗ୍ରେଡକୁ କମ୍ ଦେଖାଇ ସରକାରଙ୍କୁ ରୟାଲିଟି କମ୍ ଦେଇ କୋଟି କୋଟି ଟଙ୍କା ଖଣି ମାଲିକମାନେ ଆୟ କରୁଛନ୍ତି । ଏ କଥା ଖୋଦ୍ ରାଜ୍ୟ ମୁଖ୍ୟମନ୍ତ୍ରୀ ଜାଣିଛନ୍ତି । କିନ୍ତୁ କାର୍ଯ୍ୟାନୁଷ୍ଠାନ କାହିଁକି ନାହିଁ । ଦଳ ଏବଂ ସରକାର କ'ଣ ଫାଇଦା ପାଉଛନ୍ତି କି ବୋଲି ସେ ପ୍ରଶ୍ନ କରୁଛନ୍ତି ।
ବରିଷ୍ଠ ବିଧାୟକ ଶ୍ରୀ ତାରାପ୍ରସାଦ ବାହିନିପତି ସାମ୍ବାଦିକ ମାନଙ୍କ ଅନ୍ୟ ଏକ ପ୍ରଶ୍ନର ଉତର ରଖ୍ କହିଥିଲେ ଯେ, ରାଜାଚକ୍ରର ବ୍ୟାଙ୍କ ଆକାଉଣ୍ଟରୁ ୧ କୋଟି ୩୨ ଲକ୍ଷ ଟଙ୍କା ମଧ୍ୟରୁ ୧ କୋଟି ୩ ଲକ୍ଷ ଟଙ୍କା ବିଜେପି ଦଳର ସଭାପତି ବର୍ତମାନର ସଭାପତିଙ୍କ ଖାତାକୁ ଯାଇଛି ବୋଲି ତାଙ୍କ ଓକିଲ ଗତକାଲି ପ୍ରମାଣ ସହ ଗଣମାଧ୍ୟମକୁ କହିଛନ୍ତି । ଖାଲି ସେତିକି ନୁହେଁ ନୂଆ ବିଜେପି ସରକାର ଶପଥ ଗ୍ରହଣ ଉତ୍ସବକୁ ଆସିବା ପାଇଁ ମୁଖ୍ୟମନ୍ତ୍ରୀଙ୍କ ଅତ୍ୟନ୍ତ ନିଜ ଲୋକମାନେ ୧୪ ଲକ୍ଷ ଟଙ୍କା ଦାବି କଲେ, ନ ଦେଲେ କାର୍ଯ୍ୟାଳୟ ବନ୍ଦ ରହିବ ଏବଂ କାମ ବନ୍ଦ ରହିବ ବୋଲି ଧମକ ଦେଲେ । ପରବର୍ତୀ ସମୟରେ ୧୪ ଲକ୍ଷ ଟଙ୍କା ମଧ୍ୟ ରାଜାଚକ୍ରଙ୍କ ବ୍ୟାଙ୍କ ଖାତାରୁ ମୁଖ୍ୟମନ୍ତ୍ରୀଙ୍କ ପାଖ ଲୋକଙ୍କୁ ଦିଆଯାଇଛି ବୋଲି ରାଜା ଚକ୍ରଙ୍କ ଓକିଲ ଗଣମାଧ୍ୟମକୁ କହିଛନ୍ତି । ରାଜା" ଚକ୍ରର ସୃଷ୍ଟିକର୍ତା ହେଉଛି କେନ୍ଦୁଝର ଜିଲ୍ଲାର ପୂର୍ବତନ ମନ୍ତ୍ରୀ ଏବଂ ସେ ସମୟର ଜିଲ୍ଲାର ଜିଲ୍ଲାପାଳ ଓ ଏସ୍.ପି. । ରାଜା ଚକ୍ର ଘଟଣାରେ ଇଡି ଓ ସିବିଆଇ ତଦନ୍ତ ହେଉଛି ବୋଲି କୁହାଯାଉଛି । ଇ.ଡ଼ି. ଯେଉଁ ୧ କୋଟି ୩ ଲକ୍ଷ ଟଙ୍କା ଓଡ଼ିଶା ବିଜେପି ସରକାରଙ୍କ ଖାତାକୁ ଯାଇଛି ବୋଲି ଜଣାପଡ଼ୁଛି ତାହାର ତଦନ୍ତ ଉଭୟ ସିବିଆଇ ଓ ଇ.ଡ଼ି କରୁ ବୋଲି ମୁଖ୍ୟମନ୍ତ୍ରୀ ଏବଂ ବିଜେପି ସଭାପତି ଏକ ସାମ୍ବାଦିକ ସମିଳନୀ କୁରି କୁହନ୍ତୁ। ମୁଖ୍ୟମନ୍ତ୍ରୀ ଏଥିପାଇଁ ନିର୍ଦ୍ଦେଶ ଦିଅନ୍ତୁ। ଶ୍ରୀ ବାହିନି ପତି କହିଥିଲେ ଯେ ରାଜ୍ୟରେ ପ୍ରଭାକରନ୍ ଯେଉଁ ଯେଉଁ ଖଣିମାନଙ୍କରେ କାମ କରୁଛନ୍ତି ଏବଂ ତାଙ୍କ ଦ୍ୱାରା କେତେ ଖଣିଜ ଦ୍ରବ୍ୟ ବିଦେଶକୁ ରପ୍ତାନି କରାଯାଇଛି । ବିଜେପି ଓ ବିଜେଡ଼ିର ଡିଲ୍ ଓ ଗତକାଲି ସଂସଦ ଓ ରାଜ୍ୟ ବିଧାନସଭାରେ ଧରା ପଡ଼ିଗଲେ ବୋଲି ସେ କହିଛନ୍ତି ।
ଏହି ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ପ୍ରଦେଶ କଂଗ୍ରେସ ପୂର୍ବତନ ମୁଖପାତ୍ର ରଜନୀ କୁମାର ମହାନ୍ତି ଓ ପ୍ରଦେଶ କଂଗ୍ରେସ କମିଟି ସଭାପତିଙ୍କର ରାଜନୈତିକ ସଚୀବ ଶ୍ରୀ ସୁଧାଂଶୁ ଦେଓ ଉପସ୍ଥିତ ଥିଲେ।
