ଭୁବନେଶ୍ୱର : ରାଜ୍ୟର ମୁଖ୍ୟ ଶାସନ ସଚିବ ଗତ ବର୍ଷ ତା ୧୧.୧୧.୨୦୨୪ ରିଖରେ ସମସ୍ତ ବିଭାଗର ସଚିବ ଓ ଜିଲ୍ଲାପାଳ ମାନଙ୍କୁ ବଦଳି ନିର୍ଦ୍ଦେଶନାମା ପାଇଁ ଅନୁଚିତ ପ୍ରଭାବ ନପକେଇବା ନିମନ୍ତେ ସମସ୍ତ ଅଧିକାରୀ ଓ କର୍ମଚାରୀ ମାନଙ୍କୁ ଜଣେଇଦେବା ନିମନ୍ତେ ଚିଠି ସଂଖ୍ୟା ୩୩୯୩୯ ରେ ଅନୁରୋଧ କରିଥିଲେ । ଉକ୍ତ ପତ୍ରରେ ଏହା ସ୍ପଷ୍ଟଭାବେ ଉଲ୍ଲେଖ ଥିଲା ଯେ ବଦଳି ପାଇଁ ଚାପ ପକେଇବା ହେଉଛି ଓଡ଼ିଶା ସରକାରୀ କର୍ମଚାରୀ ଆଚରଣ ନିୟମାବଳୀ, ୧୯୫୯ ର ରୁଲ ୨୩ ର ବିରୁଦ୍ଧାଚରଣ ।
ଯେଉଁ କର୍ମଚାରୀ ପ୍ରତ୍ଯକ୍ଷ କିମ୍ବା ପରୋକ୍ଷ ଭାବରେ ନିଜର ଇଚ୍ଛା ମୁତାବକ ପୋଷ୍ଟିଂ ପାଇଁ ଚାପ ପକେଇବେ ସେମାନଙ୍କ ବିରୁଦ୍ଧରେ ନିୟମ ଅନୁଯାୟୀ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ମଧ୍ୟ ଉଲ୍ଲେଖ ଅଛି ।
ହେଲେ ଏଠି କଥା ଉଠୁଛି ଯେ, ସରକାରୀ କର୍ମଚାରୀଙ୍କ ପୋଷ୍ଟିଂ ସରକାରଙ୍କ ଇଚ୍ଛାଧୀନ ନା ସମ୍ପୃକ୍ତ କର୍ମଚାରୀ ବା ଅଧିକାରୀଙ୍କ ପସନ୍ଦ ? ମୁଖ୍ୟ ଶାସନ ସଚିବ ନୂଆ ସରକାର ଆସିବାର ୦୫ ମାସ ପରେ ଏହି ପତ୍ର କାହିଁକି ଲେଖିଲେ ? ବିଭାଗୀୟ ସଚିବ ମାନେ ବଦଳି ବ୍ୟାପାରକୁ ନେଇ ଚାପର ସମ୍ମୁଖୀନ ହେଉଛନ୍ତି କି ? କର୍ମଚାରୀ ଓ ଅଧିକାରୀ ମାନଙ୍କ ରାଜନୈତିକ ଏବଂ ପ୍ରଶାସନିକ ପହଞ୍ଚ ବିଭାଗୀୟ ସଚିବ ଓ ଜିଲ୍ଲାପାଳଙ୍କ ଠାରୁ ଅଧିକ କି ?
ନୂଆ ସରକାର ଶପଥ ନେବାର ଆଜିକୁ ୦୯ ମାସ ବୀତି ଗଲାଣି । ନୂଆ ସରକାର ଆସୁ ଆସୁ ପୁରୁଣା ସରକାରଙ୍କ ପୁରୁଣା ରୋଗ ଯାହାକି ଅବସର ନେଇଥିବା ଅଧିକାରୀ ମାନଙ୍କୁ ପୁନଃ ଥଇଥାନ କୁ ନାକଚ କରିବା ଭଳି ପଦକ୍ଷେପ ନେଲେ ଓ ଚର୍ଚ୍ଚିତ ହେଲେ । ସେଇ ଭଳି ଗୋଟିଏ ଜାଗାରେ ବର୍ଷ ବର୍ଷ ଧରି ଅବସ୍ଥାପିତ ଥିବା ବଡ ବାବୁ ମାନଙ୍କୁ ନିୟମିତ ଭାବରେ ବଦଳି କରି ପ୍ରଶାସନିକ କ୍ଷେତ୍ରରେ ପାରଦର୍ଶିତା ଆଣିବା ପାଇଁ ମଧ୍ୟ ଅଣ୍ଟା ଭିଡିଲେ । ଏସବୁ ଭିତରେ ମୁଖ୍ୟ ଶାସନ ସଚିବଙ୍କ ଏ ସମ୍ବନ୍ଧୀୟ ପତ୍ରଟି ମଧ୍ୟ ବେଶ ଗୁରୁତ୍ଵ ବହନ କରେ ଏବଂ ଏହା ସମସ୍ତ ସରକାରୀ ଅଧିକାରୀ ଓ କର୍ମଚାରୀ ମାନଙ୍କ ପାଇଁ ସମାନ ଭାବରେ ଲାଗୁ ହେବା ଉଚିତ ବୋଲି ବୁଦ୍ଧିଜୀବୀ ମାନଙ୍କ ମତ ।
ହେଲେ ସରକାରୀ ଯୋଜନା ବାଟବଣା ହେଲା ପରି ମୁଖ୍ୟ ଶାସନ ସଚିବଙ୍କ ପତ୍ର ମଧ୍ୟ ବାଟବଣା ହୋଇଗଲା ବୋଲି ଅଭିଯୋଗ ଆସିଛି । ଖୋଦ ମୁଖ୍ୟ ଶାସନ ସଚିବଙ୍କ ବିଭାଗ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗରେ ଏହା ପାଳନ ହେଉନଥିବା ଅଭିଯୋଗ ହୋଇଛି ଏବଂ ତାହାବି ରାଜ୍ୟର ମୁଖିଆ ମାନ୍ୟବର ମୁଖ୍ୟମନ୍ତ୍ରୀଙ୍କ କରକମଳରେ । ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ସୁରେନ୍ଦ୍ର କୁମାର ନିକଟ ଅତୀତରେ ପଦୋନ୍ନତି ପାଇ ଅନୁ ଶାସନ ସଚିବ ହୋଇଥିବା ଶ୍ରୀ ପୂର୍ଣଚନ୍ଦ୍ର ମଲ୍ଲିକ ଯିଏ କି ୧୯୯୯ରୁ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗରେ ଅବସ୍ଥାପିତ ଅଛନ୍ତି, ତାଙ୍କୁ ଆଉ ଥରେ ସେହି ସମାନ ବିଭାଗ ଏବଂ ଉପବିଭାଗରେ ଅବସ୍ଥାପିତ କରିବା ପାଇଁ ଗୃହ ବିଭାଗକୁ ଅନୁରୋଧ କରିଥିଲେ । ଏହି ଅନୁରୋଧକୁ ଖୋଦ ମୁଖ୍ୟମନ୍ତ୍ରୀ ଅନୁମୋଦନ କରିଛନ୍ତି । ସେହିପରି ଓଡିଶା ପ୍ରଶାସନିକ ଅଧିକାରୀ ଶ୍ରୀ ସୁବୋଧ ଚନ୍ଦ୍ର ଆଚାର୍ଯ୍ୟ ଯିଏକି ଓଡିଆ ଭାଷା, ସାହିତ୍ଯ ଓ ସଂସ୍କୃତି ବିଭାଗରେ ୦୬ ବର୍ଷରୁ ଊର୍ଦ୍ଧ୍ଵ ସମୟ ଧରି ଅବସ୍ଥାପିତ ଅଛନ୍ତି, ତାଙ୍କ ବଦଳିକୁ ବାତିଲ କରିବାକୁ ବିଭାଗୀୟ ମନ୍ତ୍ରୀ ପତ୍ର ଲେଖିଛନ୍ତି । ଏହା ଅତି ଦୁର୍ଭାଗ୍ୟ ଜନକ ।
ସେହିପରି ନିବେଦିତା ପୃଷ୍ଟି, ସ୍ଵତନ୍ତ୍ର ଶାସନ ସଚିବ, ଗୃହ ବିଭାଗ, ଆରତି ସାହୁ, ଯୁଗ୍ମ ଶାସନ ସଚିବ, ମତ୍ସ ଓ ପ୍ରାଣୀସମ୍ପଦ ବିକାଶ ବିଭାଗ, ପ୍ରସନ୍ନ ପଟ୍ଟନାୟକ, ଉପ ଶାସନ ସଚିବ, ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ମାନେ ମଧ୍ୟ ଦୀର୍ଘ ୬ ବର୍ଷରୁ ଊର୍ଦ୍ଧ୍ଵ ସମୟ ସମାନ ବିଭାଗରେ ଗାଦି ମାଡି ବସିଛନ୍ତି । ଇତି ମଧ୍ୟରେ ଶ୍ରୀ ବିକ୍ରମାଦିତ୍ୟ ବାରିକ, ନିଲୁ ମହାପାତ୍ର, ନୀଳମାଧବ ଭୋଇ ଏବଂ ୩୦ ରୁ ଅଧିକ ଓଡିଶା ପ୍ରଶାସନିକ ଅଧିକାରୀଙ୍କ ବଦଳି ନିର୍ଦ୍ଦେଶନାମାକୁ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ବାତିଲ କରିଛନ୍ତି । କଥା ଉଠୁଛି ସରକାର ଏମାନଙ୍କୁ ବଦଳି କଲେ କାହିଁକି ଓ ପରମୁହୂର୍ତ୍ତରେ ବଦଳିକୁ ସ୍ଥଗିତ କଲେ କାହିଁକି ? କିଛି ଅଦୃଶ୍ୟ ଶକ୍ତିର ଚାପର ବଶବର୍ତ୍ତୀ କି ଖୋଦ ମୁଖ୍ୟ ଶାସନ ସଚିବଙ୍କ ବିଭାଗ । ଖାଲି ଏତିକି ନୁହେଁ, ଏହି ଅଧିକାରୀ ମାନେ ବିଭିନ୍ନ ସମୟରେ ଦୁର୍ନୀତିରେ ଲିପ୍ତ ରହି ଥିବାର ମଧ୍ୟ ଅଭିଯୋଗ ହୋଇଥାଏ ।
ବର୍ତ୍ତମାନ ସମସ୍ତଙ୍କ ନଜର ରହିଛି, ସରକାରଙ୍କ ପଦକ୍ଷେପ ଉପରେ । ରାଜ୍ୟ ମୁଖ୍ୟ ଶାସନ ସଚିବ କେବେ ଏହି ଅଧିକାରୀ ମାନଙ୍କ ବିପକ୍ଷରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି । କେବେ ଏମାନଙ୍କୁ ବଦଳି କରୁଛନ୍ତି ଦେଖିବାକୁ ବାକି ରହିଲା । ନିୟମିତ ବ୍ଯବଧାନରେ ବଦଳି ଏକ ପ୍ରଶାସନିକ ଅଙ୍ଗ ଏବଂ ଏହା ପ୍ରଶାସନିକ ଶୃଙ୍ଖଳା ବୋଧ କୁ ଚେତାଇ ଥାଏ ବୋଲି ମତ ଦେଇଛନ୍ତି ।
