ବାଇପାସ୍ ରିଙ୍ଗ ରୋଡ଼ ନିର୍ମାଣ ପାଇଁ ଖର୍ଚ୍ଚ ହେବ ୧୪୪୦ କୋଟି ଟଙ୍କା : 5T ସଚିବ ଭି କେ ପାଣ୍ଡିୟାନ
ଚମ୍ପୁଆ/ବଡ଼ବିଲ/ଯୋଡ଼ା (ଶାସକ ପ୍ରଶାସକ): ଦୁଇ ଦିନିଆ କେନ୍ଦୁଝର ଗସ୍ତରେ ଆସି 5T ସଚିବ ଭି କେ ପାଣ୍ଡିୟାନ ବିଭିନ୍ନ ଅଞ୍ଚଳ ଗସ୍ତ କରି ଅନେକ ଉନ୍ନୟନ ମୂଳକ କାର୍ଯ୍ୟର ସମୀକ୍ଷା କରିବା ସହିତ ସାଧାରଣ ଲୋକଙ୍କ ସୁବିଧା ଅସୁବିଧା ସଂପର୍କରେ ଅବଗତ ହୋଇଛନ୍ତି। ଆଜି ନିର୍ଦ୍ଧାରିତ ସମୟରେ ଚମ୍ପୁଆ ପହଞ୍ଚି ମେଗା ପାନୀୟ ଜଳ ପ୍ରକଳ୍ପ ଅଞ୍ଚଳ ପରିଦର୍ଶନ କରିବା ସହିତ ଚମ୍ପୁଆ ନେହେରୁ ଷ୍ଟାଡିୟମ୍ ଠାରେ ସ୍ଥାନୀୟ ଜନସାଧାରଣ ଓ ବିଭିନ୍ନ ସଙ୍ଗଠନ ପକ୍ଷରୁ ମେମୋରଣ୍ଡମ୍ ଗ୍ରହଣ କରିଥିଲେ । ପାନୀୟ ଜଳ କିମ୍ବା ଜଳସେଚନ ସମ୍ବନ୍ଧୀୟ ସମସ୍ୟା ସବୁ ନିଶ୍ଚୟ ପୂରଣ କରାଯିବ ବୋଲି ସେ ପ୍ରକାଶ କରିଥିଲେ। ଚମ୍ପୁଆ, ଯୋଡ଼ା ଓ ବଡ଼ବିଲରେ ମେଗା ପାନୀୟ ଜଳ ପ୍ରକଳ୍ପ ଲୋକଙ୍କ ଜଳକଷ୍ଟ ଦୂର କରିବା ସହିତ ଲୋକେ ୨୪ ଘଣ୍ଟା ବିଶୁଦ୍ଧ ପାନୀୟ ଜଳ ପାଇପାରିବେ ବୋଲି 5T ସଚିବ କହିଥିଲେ। ସେହିପରି ଟ୍ରାଫିକ ସମସ୍ୟାକୁ ଦୃଷ୍ଟିରେ ରଖି ଯୋଡ଼ା - ବଡ଼ବିଲରେ ଟ୍ରକ୍ ଟର୍ମିନାଲ ନିର୍ମାଣ ସହିତ ବଡ଼ବିଲର ବହୁ ପ୍ରତିକ୍ଷିତ ବାଇପାସ୍ ରିଙ୍ଗ ରୋଡ଼ କାମ ଖୁବ୍ ଶୀଘ୍ର ଆରମ୍ଭ ହେବ ବୋଲି ସେ ସୂଚନା ଦେଇଥିଲେ । 
ଚମ୍ପୁଆ ପରେ ସେ ବଡ଼ବିଲ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପରିସରକୁ ଯାଇ ସେଠାରେ ନିର୍ମାଣାଧୀନ ନୂତନ ବିଲ୍ଡିଂ କାର୍ଯ୍ୟର ଅଗ୍ରଗତି ସମ୍ପର୍କରେ ସମୀକ୍ଷା କରିବା ସହିତ ଡାଇଲେସିସ୍ ସେଣ୍ଟର୍ ଓ ଏନଆରସି ସେଣ୍ଟର୍ ବୁଲି ଦେଖିଥିଲେ । ଏହାପରେ ସେ ସେରେଣ୍ଡା ଠାରେ ଥିବା ପଦ୍ମଶ୍ରୀ ତୁଳସୀ ମୁଣ୍ଡାଙ୍କ ଆଦିବାସୀ ବିକାଶ ସମିତି ଆଶ୍ରମ ପରିଦର୍ଶନ କରିଥିଲେ ଓ ଆଶ୍ରମର ଅନ୍ତେବାସୀଙ୍କ ସହ କିଛି ସମୟ କଟାଇଥିଲେ। ଯେଉଁ ପିଲା ମାନଙ୍କର ବାପା, ମା ନାହାନ୍ତି ସେମାନଙ୍କ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅଛନ୍ତି ବୋଲି ସେ କହିଥିଲେ ।
ଏହାପରେ ଯୋଡ଼ା ପୌରାଞ୍ଚଳରେ ପହଞ୍ଚି ସେଠାରେ ବହୁ ପ୍ରତିକ୍ଷିତ ନିର୍ମାଣାଧିନ ଫ୍ଲାଇ ଓଭର କାର୍ଯ୍ୟ ତଦାରଖ କରିଥିଲେ । ଆସନ୍ତା ଡ଼ିସେମ୍ବର ସୁଦ୍ଧା ଏହାର ନିର୍ମାଣ କାର୍ଯ୍ୟ କିପରି ସଂପୂର୍ଣ୍ଣ କରାଯାଇ ପାରିବ ସେନେଇ ବିଭାଗୀୟ ଅଧିକାରୀ ଓ ନିର୍ମାଣକାରୀ ସଂସ୍ଥା ସହ ଆଲୋଚନା କରିଥିଲେ । ଏଥିସହ ବିପ୍ଳବୀ ଧରଣୀଧର ଭୂୟାଁ ଙ୍କ ପ୍ରତିମୂର୍ତ୍ତି ରେ ମାଲ୍ୟାର୍ପଣ କରି ଶ୍ରଦ୍ଧା ସୁମନ ଅର୍ପଣ କରିଥିଲେ । ଏହାପରେ ବାଚୁ ହଟିଂ ନିକଟରେ ଥିବା ବୃଦ୍ଧାଶ୍ରମକୁ ଯାଇଥିଲେ 5T ସଚିବ । ବୃଦ୍ଧାଶ୍ରମରେ ରହୁଥିବା ଅନ୍ତେବାସୀଙ୍କ ସହ ବେଶ୍ କିଛି ସମୟ କଥା ହେବା ସହିତ ସେମାନଙ୍କର ସୁବିଧା ଅସୁବିଧା ପଚାରି ବୁଝିଥିଲେ । ପରେପରେ ସେ ନିର୍ମାଣାଧୀନ କାନପୁର ବୃହତ୍ ଜଳସେଚନ ପ୍ରକଳ୍ପର ଅଞ୍ଚଳକୁ ଯାଇଥିଲେ । ଯୋଡ଼ା ବ୍ଳକ କଣ୍ଡରା ଠାରେ ୨୪୩୮ . ୨୯ କୋଟି ଟଙ୍କା ବ୍ୟୟରେ ନିର୍ମାଣ ହେଉଥିବା କାନୁପୁର ବୃହତ ଜଳ ସେଚନ ପ୍ରକଳ୍ପ କାର୍ଯ୍ୟକାରୀ ହେଲେ ଜିଲ୍ଲାର ୫ଟି ବ୍ଲକ୍, ଯୋଡ଼ା, ଚମ୍ପୁଆ, ଝୁମ୍ପୁରା, କେନ୍ଦୁଝର ସଦର ଓ ପାଟନା ବ୍ଲକର ୨୯୫୭୮ ହେକ୍ଟର ଜମିକୁ ଜଳ ସେଚନ ବ୍ୟବସ୍ଥା କରାଯାଇ ପାରିବ । ଏହି ପ୍ରକଳ୍ପ କାର୍ଯ୍ୟର ସମୀକ୍ଷା କରିବା ସହ ଯଥାଶୀଘ୍ର କାମ ସରିବା ଦିଗରେ ସେ ଗୁରୁତ୍ୱାରୋପ କରିଥିଲେ।
