ରାଇଘର/ନରସିଂ ବାଘ: ନବରଙ୍ଗପୁର ଜିଲ୍ଲା ରାଇଘର ବ୍ଲକ ଅନ୍ତର୍ଗତ ହାତୀଗାଁର ଭଞ୍ଜନ ମଲ୍ଲିକଙ୍କ ଘରେ ନିଆଁ ଲଗାଇ ଦେଇଥିବା ଅଭିଯୋଗ ରେ ଆଜି ରାଇଘର ପୁଲିସ ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି | ଗିରଫ ଯୁବକ ଦୁହେଁ ହାତିଗାଁ ର ମନସାଇ ଗଣ୍ଡ ଓ ଶ୍ୟାମ ଚରଣ ଗଣ୍ଡ ବୋଲି ଜଣାପଡିଛି | ଭଞ୍ଜନ ମଲ୍ଲିକଙ୍କ ଲିଖିତ ଅଭିଯୋଗକୁ ଆଧାର କରି ପୁଲିସ ପ୍ରଶାସନ ପକ୍ଷରୁ ତୁରନ୍ତ ପଦକ୍ଷେପ ଗ୍ରହଣ କରିଥିବା ଜଣାପଡିଛି |
ସୂଚନା ଅନୁଯାୟୀ ଗତ ଚାରିମାସ ପୂର୍ବେ ହାତିଗାଁର ଭଞ୍ଜନ ମଲ୍ଲିକଙ୍କ ଭାଈ ଚନ୍ଦନ ମଲ୍ଲିକଙ୍କୁ ପୁଲିସ ଇନ୍ଫରମର୍ ଅଭିଯୋଗରେ ନକ୍ସଲ ମାନେ ଘରୁ ଡାକିନେଇ ନିର୍ମମ ଭାବେ ହତ୍ୟା କରିଥିଲେ | ଏହି ଘଟଣା ପରେ ତାଙ୍କ ପରିବାର ଲୋକେ ସେହି ଦିନ ଠାରୁ ନକ୍ସଲଙ୍କ ଭୟରେ ହାତିଗାଁରେ ଦୀର୍ଘ ୪୫ ବର୍ଷ ଧରି ରହି ଆସୁଥିବା ଘରକୁ ଛାଡ଼ି ରାଇଘର ଚାଲି ଆସିଥିଲେ l ଅପରପକ୍ଷରେ ହାତିଗାଁ ରେ ରହିଥିବା ଘର ଦୀର୍ଘ ଦିନ ଧରି ଖାଲି ଥିବା ଦେଖି ଗତ ୫ ତାରିଖ ରାତିରେ କିଛି ଦୁର୍ବୁତ୍ତ ଉକ୍ତ ଘରକୁ ନିଆଁ ଲଗାଇ ଦେଇଥିବା ସ୍ଥାନୀୟ ଥାନାରେ ଭଞ୍ଜନ ମଲ୍ଲିକ ଲିଖିତ ଅଭିଯୋଗ କରିଥିଲେ | ଘର ସେଭଳି କିଛି ଗୁରୁତ୍ୱପୂର୍ଣ ଜିନିଷ ନଥିବା ବେଳେ କିଛି ଅବ୍ୟବହାର୍ଯ ଜିନିଷ ରଖି ତାଲା ପକାଇ ରଖିଥିଲେ l ଅନ୍ୟପଟେ ଭଞ୍ଜନ ମଲ୍ଲିକଙ୍କ ଅଭିଯୋଗକୁ ଆଧାର କରି ପୁଲିସ ପକ୍ଷରୁ ତଦନ୍ତ ଆରମ୍ଭ ହୋଇଥିଲା | ଅନ୍ୟପଟେ ଆଜି ସକାଳୁ ପୁଲିସ ହାତିଗାଁକୁ ଯାଇ ମନସାଇ ଗଣ୍ଡ ଓ ଶ୍ୟାମ ଚରଣ ଗଣ୍ଡଙ୍କୁ ଗିରଫ କରି ଆଣି ପଚରାଉଚରା କରିବା ପରେ ସେମାନଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ପ୍ରମୋଦ କୁମାର ନାୟକ ପ୍ରକାଶ କରିଛନ୍ତି | ସ୍ଥାନୀୟ ଥାନା କେଶ୍ ନମ୍ବର ୮୯/୨୦୨୩ ଅନୁଯାଇ ଆଜି ସେମାନଙ୍କୁ କୋର୍ଟ ଚାଲାଣ କରାଯାଇଛି |