ଜଗତସିଂହପୁର/ସୁମନ୍ତ କୁମାର ଦାସ: ସ୍ଥାନୀୟ ନବକୃଷ୍ଣ ଚୌଧୁରୀ ଷ୍ଟାଡିୟମଠାରେ ଜିଲ୍ଲାସ୍ତରୀୟ ଅନ୍ତଃବିଦ୍ୟାଳୟ ଫୁଟବଲ ଟୁର୍ନାମେଣ୍ଟ ଜିଲ୍ଲାପାଳ ଶ୍ରୀମତୀ ପାରୁଲ ପଟ୍ଟୱାରୀ ଦ୍ୱାରା ଉଦଘାଟିତ ହୋଇଯାଇଅଛି l ଜଗତସିଂହପୁର ଜିଲ୍ଲାର ସମସ୍ତ ବ୍ଲକରୁ ୧୭ ବର୍ଷରୁ କମ ବର୍ଗର କ୍ରୀଡା ଛାତ୍ରଛାତ୍ରୀ ଏହି ଟୁର୍ନାମେଣ୍ଟରେ ଅଂଶଗ୍ରହଣ କରିଥିଲେ l ଏହି ପ୍ରତିଯୋଗିତା ଅକ୍ଟୋବର ୧୧ ରୁ ୧୭ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବ l ମୁଖ୍ୟ ଅତିଥି ଭାବେ ଯୋଗଦେଇ ଜିଲ୍ଲାପାଳ ଶ୍ରୀମତୀ ପାରୁଲ ପଟ୍ଟୱାରୀ କ୍ରୀଡା ପତାକା ଉତ୍ତୋଳନ କରି ଜିଲ୍ଲା ଅନ୍ତଃବିଦ୍ୟାଳୟ ଫୁଟବଲ ଟୁର୍ନାମେଣ୍ଟକୁ ଅନୁଷ୍ଠାନିକ ଭାବେ ଉଦଘାଟନ କରି କହିଲେ ଜିଲ୍ଳାର ପ୍ରତ୍ୟେକ ବ୍ଲକରୁ ବାଳକ ଓ ବାଳିକା ୨ଟି ଟିମ ଯୋଗ ଦେଇଛନ୍ତି l ପ୍ରତ୍ୟେକ ଟିମରେ ୧୬ ଜଣ କ୍ରୀଡ଼ାବିତ ରହିଛନ୍ତି l ଓଡିଶା ରାଜ୍ୟ ସମସ୍ତ ପ୍ରକାର କ୍ରୀଡାରେ ଉନ୍ନତ ପ୍ରଦର୍ଶନ କରି ଆସୁଛି l ମାନ୍ୟବର ମୁଖ୍ୟମନ୍ତ୍ରୀ ଶ୍ରୀଯୁକ୍ତ ନବୀନ ପଟ୍ଟନାୟକ ରାଜ୍ୟରେ କ୍ରୀଡାର ଉନ୍ନତି ପାଇଁ ବ୍ୟାପକ କାର୍ଯ୍ୟକ୍ରମ ଜାରି ରଖିଛନ୍ତି l ଫୁଟବଲ ଟୁର୍ନାମେଣ୍ଟରେ ଅଂଶଗ୍ରହଣ କରିଥିବା ପିଲାମାନଙ୍କ ପାଇଁ ଏହା ଏକ ସୁଯୋଗ ଓ ପ୍ରଦର୍ଶନ ପାଇଁ ଭଲ ପ୍ଲାଟଫର୍ମ କ୍ରୀଡ଼ାକୁ ଖେଳୁଆଡ଼ ମନୋବୃତ୍ତିରେ ଗ୍ରହଣ କରିବା ପାଇଁ ଉପଦେଶ ଦେଇଥିଲେ l କ୍ରୀଡା ଶାରୀରିକ ସ୍ୱଚ୍ଛତା ପ୍ରଦାନ କରେ l କ୍ରୀଡ଼ାଦ୍ୱାରା ମସ୍ତିଷ୍କ ଓ ଶରୀର ବିକଶିତ ହୋଇଥାଏ l ଏହି ଉଦ୍ଘାଟନୀ ଉତ୍ସବରେ ଅଧ୍ୟକ୍ଷତା କରି ଜିଲ୍ଲା ଶିକ୍ଷା ଅଧିକାରୀ ଶ୍ରୀ ନିରଞ୍ଜନ ବେହେରା କହିଲେ କ୍ରୀଡ଼ା ପ୍ରତିଯୋଗିତାରେ ହାରବା ଜିତିବା ବଡ଼ କଥା ନୁହେଁ l ରାଜ୍ୟ ସରକାର କ୍ରୀଡ଼ାକୁ ପରିପୃଷ୍ଟ କରିବା ନିମନ୍ତେ ପ୍ରୟାସ ଜାରି ରଖିଛନ୍ତି l ହକିରେ ସାରା ବିଶ୍ୱରେ ଓଡିଶା ସୁନାମ ଅର୍ଜନ କରିଛି l ଏହି ଉତ୍ସବରେ ଅତିରିକ୍ତ ଜିଲ୍ଲାଶିକ୍ଷା ଅଧିକାରୀ ଶ୍ରୀ ପରେଶ ଚନ୍ଦ୍ର ପାତ୍ର ଓ ଶ୍ରୀମତୀ ରାଜଶ୍ରୀ ସାହୁ, ସମ୍ମାନିତ ଅତିଥି ଭାବେ ଯୋଗଦେଇ କହିଲେ ଉତ୍ତମ ସ୍ୱାସ୍ଥ୍ୟ ପାଇଁ କ୍ରୀଡା ଅପରିହାର୍ଯ୍ୟ l ଉତ୍ତମ ସ୍ୱାସ୍ଥ୍ୟ ରହିଲେ ଛାତ୍ରଛାତ୍ରୀମାନେ ସବୁଥିରେ ଆଗେଇପାରିବେ l ପ୍ରତ୍ୟେକ ବ୍ଲକର କ୍ରୀଡ଼ାବିତମାନେ ମାର୍ଚ୍ଚପାଷ୍ଟରେ ଯୋଗଦେଇଥିଲେ l ବରିଷ୍ଠ ଶାରୀରିକ ଶିକ୍ଷକ ଶିକ୍ଷୟତ୍ରୀମାନେ କ୍ରୀଡା ପରିଚାଳନା କରିବେ l ପ୍ରତି ଟିମରେ ସେକ୍ରେଟାରୀ, ଟିମ ମ୍ୟାନେଜର ଓ ରେଫରୀ ମାନେ ଅଂଶଗ୍ରହଣ କରିଥିଲେ l ସରକାରୀ ଉଚ୍ଚ ବାଳିକା ବିଦ୍ୟାଳୟ, ଜଗତସିଂହପୁରର ପ୍ରଧାନଶିକ୍ଷୟତ୍ରୀ ଶ୍ରୀମତୀ ଅନ୍ନପୂର୍ଣ୍ଣା ପଣ୍ଡା, କ୍ରୀଡା କର୍ମକର୍ତ୍ତା, ଶିକ୍ଷକ ଶିକ୍ଷୟତ୍ରୀ, ଗଣମାଧ୍ୟମ ପ୍ରତିନିଧିମାନେ ଉପସ୍ଥିତ ଥିଲେ l