ବାଲେଶ୍ୱର: ବାଲେଶ୍ୱର ପୌର ପରିଷଦର ନବ ନିର୍ବାଚିତ ଅଧ୍ୟକ୍ଷା ସବିତା ସାହୁଙ୍କ ସମେତ ବିଭିନ୍ନ ୱାର୍ଡର କାଉନସିଲରଙ୍କୁ ପୌରାଞ୍ଚଳର ୫ନଂ ୱାର୍ଡରେ ନାଗରିକ ସମ୍ବର୍ଦ୍ଧନା ପ୍ରଦାନ କରାଯାଇଛି । ଏନେଇ ହେମକାପଦା ସ୍ଥିତ କଲ୍ୟାଣମଣ୍ଡପରେ ଆୟୋଜିତ କାର୍ଯ୍ୟକ୍ରମରେ ବିଜେଡି ଟାଉନ ସଭାପତି ସନତ ଦାସ ପୌରହିତ୍ୱ ସହ ନବନିର୍ବାଚିତ ଲୋକପ୍ରତିନିଧିମାନଙ୍କୁ ଅଭିନନ୍ଦନ ଜଣାଇ ଜନସାଧାରଣଙ୍କ ଆଶା ଆକାଂକ୍ଷା ପୂରଣରେ ସେମାନେ ବ୍ରତୀ ହେବେ ବୋଲି ଆଶା ପ୍ରକାଶ କରିଥିଲେ । ଯୁବ ସଂଗଠକ ଭାଗବତ ସାହୁ ସମ୍ମାନିତ ଅତିଥିଭାବେ ଯୋଗଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପରେ ବିଶ୍ୱାସ ପ୍ରକଟ ସହ ସହରବାସୀ ଅକୁଣ୍ଠଚିତ ସମର୍ଥନ ଦେଇଛନ୍ତି ବୋଲି କହିଥିଲେ । ସେମାନଙ୍କ ଆଶା ପୂରଣ ଦିଗରେ ନବ ନିର୍ବାଚିତ ପୌର ପରିଷଦ ନିଶ୍ଚିତ କାର୍ଯ୍ୟ କରିବେ ବୋଲି ସେ ପ୍ରକାଶ କରିଥିଲେ । ଶିକ୍ଷାବିତ କମଳାକାନ୍ତ ଆଚାର୍ଯ୍ୟ ଏହି କାର୍ଯ୍ୟକ୍ରମରେ ଉପସ୍ଥିତ ରହି ୫ନଂ ୱାର୍ଡ ସମେତ ସହରବାସୀଙ୍କ ମୌଳିକ ସମସ୍ୟା ସମ୍ପର୍କରେ ନବନିର୍ବାଚିତ ଲୋକପ୍ରତିନିଧିମାନଙ୍କ ଦୃଷ୍ଟି ଆକର୍ଷଣ କରିଥିଲେ । ସମ୍ବର୍ଦ୍ଧିତ ଅବସରରେ ପୌରାଧ୍ୟକ୍ଷା ଶ୍ରୀମତୀ ସାହୁ, ୨ନଂ ୱାର୍ଡର କାଉନସିଲର ଅମିତ କୁମାର ନାୟକ, ୪ନଂ ୱାର୍ଡର କାଉନସିଲର ସଲିମା ବିବି, ୫ନଂ ୱାର୍ଡର କାଉନସିଲର ମିତା ପଟ୍ଟନାୟକ, ୭ନଂ ୱାର୍ଡର କାଉନସିଲର ମୀରାଜ ବାନୋ ପ୍ରମୁଖ ଜନସାଧାରଣଙ୍କ ଦାବି ଓ ପ୍ରତ୍ୟେକ ସମସ୍ୟା ସମାଧାନ ପାଇଁ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଥିଲେ । ସମାଜସେବୀ ସତ୍ୟେନ୍ଦ୍ର ଦାସ ଏଥିରେ ମଞ୍ଚ ପରିଚାଳନା କରିଥିଲେ । ଶ୍ରୀମନ୍ତ ମାଝୀ, ଲମ୍ବୋଦର ବେହେରା, ରାଜେନ୍ଦ୍ର ଦାସ, ରାଜଦର୍ଶୀ ଦାସ, ଶେଖ ରାଜ, ନବ ବାରିକ, ପରମାନନ୍ଦ ନାୟକ, ମନୋଜ ମହାନ୍ତି ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନା କରିଥିଲେ ।