ଅଭିରାମ ଶତପଥୀଙ୍କୁ ସମ୍ବର୍ଦ୍ଧନା ଜ୍ଞାପନ।
ଝାରସୁଗୁଡ଼ା :(ସୁଭାଷ ସହାରେ) -ଝାରସୁଗୁଡ଼ା ଜିଲ୍ଲାର ଅଗ୍ରଣୀ ସାମାଜିକ ଅନୁଷ୍ଠାନ 'ଏଇତ ଜୀବନ ଭି' ତରଫରୁ ସ୍ଥାନୀୟ ବୃଦ୍ଧାଶ୍ରମ 'ସ୍ପର୍ଶ' ଠାରେ ହୋଲି ମିଳନ ଉତ୍ସବ ପାଳନ କରାଯାଇଛି। ଏହି ଅବସରରେ ସଂସ୍ଥାର କର୍ମକର୍ତ୍ତାମାନେ ନିଜ ହାତରନ୍ଧା ଖାଦ୍ୟ ଆଶ୍ରମର ଅନ୍ତେବାସୀଙ୍କ ସହ ଖାଇବା ସହ ଅନ୍ତେବାସିନୀଙ୍କୁ ଲୁଗା ମଧ୍ୟ ଉପହାର ଦେଇଥିଲେ।
ଏଇତ ଜୀବନ ଭି ତରଫରୁ ଝାରସୁଗୁଡ଼ାର ଦୁର୍ଲଗାଠାରୁ ପ୍ରଥମେ ଭୁବନେଶ୍ବର ଓ ପରେ ଦିଲ୍ଲୀ ପର୍ଯ୍ୟନ୍ତ ନିଶାନିବାରଣ ପାଇଁ ପଦଯାତ୍ରା କରିଥିବା ଅଭିରାମ ଶତପଥୀଙ୍କୁ ସମ୍ବର୍ଦ୍ଧିତ କରାଯାଇଥିଲା। ଶ୍ରୀ ଶତପଥୀଙ୍କ ଯାତ୍ରା ସମୟରେ ସଂସ୍ଥା ତରଫରୁ ଉତ୍ସାହ ଓ ସହଯୋଗ ମଧ୍ୟ ଯୋଗାଇ ଦିଆଯାଇଥିଲା। ସଂସ୍ଥାର କର୍ମକର୍ତ୍ତାଙ୍କ ଅନୁସାରେ ଶ୍ରୀ ଶତପଥୀଙ୍କ ବାର୍ତ୍ତା ସମାଜ ପାଇଁ ଏକ ଉଦାହରଣ ଅଟେ। ଶ୍ରୀ ଶତପଥୀ ମଧ୍ୟ ସଂସ୍ଥାର କାର୍ଯ୍ୟକର୍ତ୍ତାଙ୍କ ପାଇଁ ବେଶ ଉତ୍ସାହିତ ଅନୁଭବ କରିବା ସହ ସେମାନଙ୍କୁ ଧନ୍ୟବାଦ ଅର୍ପଣ କରିଥିଲେ।
ଆଜିର ଏହି କାର୍ଯ୍ୟକ୍ରମରେ ବୃଦ୍ଧାଶ୍ରମର ଅଧ୍ୟକ୍ଷା ଶ୍ରୀମତୀ ବଲଜିତ କୌର ଉପସ୍ଥିତ ରହି ସମସ୍ତ ପ୍ରକାରର ସହଯୋଗ ଯୋଗାଇ ଦେଇଥିଲେ। 'ଏଇତ ଜୀବନ ଭି' ର ସଭାନେତ୍ରୀ ମାନସୀ ପଣ୍ଡା, ସମ୍ପାଦିକା ରେଣୁ ତିୱାରୀ, ସଂଯୋଜକ ପ୍ୟାରେଲାଲ ଶ୍ରୀବାସ୍ତବ,ସଂସ୍କୃତି ସଚିବ ସଂଯୁକ୍ତା ପଟେଲ, ଉପ ସଭାପତି ପୁଷ୍ପାଞ୍ଜଳି ତନ୍ତୀ, କୋଷାଧ୍ୟକ୍ଷ ଉମା କେଡ଼ିଆ, ସନ୍ଧ୍ୟାରାଣୀ ମାଝି, ଉପଦେଷ୍ଟା କହ୍ନେୟାଲାଲ୍ ଗୋୟେଙ୍କ, ଲଭଲୀ ସିଂହ, ପ୍ରଫୁଲ୍ଲ କୁମାର ହାତୀ, ଆଶିଷ ତିୱାରୀ ଆଦି ସଦସ୍ୟମାନେ ଉପସ୍ଥିତ ରହିଥିଲେ।
