ଧର୍ମଗଡ/ ସୁଶାନ୍ତ ରାଉତ : ଧର୍ମଗଡ ଉପଖଣ୍ଡ ଚିକିତ୍ସାଳୟରେ ଅନୁମୋଦିତ ସମସ୍ତ ପଦବୀ ପୂରଣ କରିବାକୁ ଜିଲ୍ଲା ଯୁବ କଂଗ୍ରେସ ତରଫରୁ ଧର୍ମଗଡ଼ ଉପଖଣ୍ଡ ଚିକିତ୍ସଳୟ ସମ୍ମୁଖରେ ଧାରଣା ଦିଆଯାଇଛି । ଧର୍ମଗଡ ଅଂଚଳରେ ଦିନକୁ ଦିନ ସ୍ୱାସ୍ଥ୍ୟ ସେବା ଭଳି ଏକ ଗୁରୁତ୍ୱପୂର୍ଣ୍ଣ ସେବା ସଂପୂର୍ଣ୍ଣ ବିପର୍ଯ୍ୟସ୍ତ ହୋଇପଡିଛି । ଏହି ଡାକ୍ତରଖାନା ଅଂଚଳର ଗରିବ ଲୋକଙ୍କ ପାଇଁ ଏକମାତ୍ର ଭରସା ଅଟେ । କିନ୍ତୁ ଏଠାରେ ୧୯ଜଣ ଡାକ୍ତର ବଦଳରେ ମାତ୍ର ୬ ଜଣ ଡାକ୍ତର ଅଛନ୍ତି । ଏପଟେ ରୋଗୀ ସଂଖ୍ୟା କିନ୍ତୁ କମିବାରେ ନାଁ ନେଉ ନାହିଁ । ଏହି ଡାକ୍ତରଖାନା ଉପରେ ଦେଭୋଗ,ନବରଙ୍ଗପୁର ସମେତ ଉପଖଣ୍ଡର ୬ଟି ବ୍ଳକର ଲୋକ ନିର୍ଭର କରିଥାନ୍ତି । କିନ୍ତୁ ଏହି ଡାକ୍ତରଖାନାରେ ଅନୁମୋଦିତ ପଦବୀ ଠାରୁ ଅଧା ପଦବୀ ଖାଲି ରହିଛି । ଯାହାକୁ ନେଇ କଂଗ୍ରେସ ଆନ୍ଦୋଳନକୁ ଓଲ୍ହାଇଛି । ସମସ୍ତ ଖାଲି ପଡିଥିବା ପଦବୀ ଗୁଡିକ ପୂରଣ ପାଇଁ କଳାହାଣ୍ଡି ଜିଲ୍ଲା ଯୁବ କଂଗ୍ରେସ ତରଫରୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଡାକ୍ତରଖାନା ସମ୍ମୁଖରେ ଗଣଧାରଣା ଦିଆଯାଇଛି ବୋଲି ସଭାପତି ଶ୍ରୀ ମଙ୍ଗରାଜ ପ୍ରକାଶ କରିଛନ୍ତି ।