ନାବାଳିକାକୁ ଭେଟି ସ୍ୱାସ୍ଥ୍ୟବସ୍ଥା ବୁଝିଲେ ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନା
ସାଲେପୁର- ସାଲେପୁରରେ ୬ ବର୍ଷିୟା ନାବାଳିକାକୁ ଦୁଷ୍କର୍ମ ଅଭିଯୋଗରେ ରବିବାର ଜଣକୁ ଗିରଫ କରିଛି ପୋଲିସ । ଅଭିଯୁକ୍ତ ଜଣକ ହେଲେ ସ୍ଥାନୀୟ ଅଂଚଳର ଏମ.ଡି. ମୁସ୍ତାଫା । ତାଙ୍କ ବିରୋଧରେ ୩୭୬, ୩୦୭ ଆଇ(ଏମ), ଶିଶୁ ଯୌନ ନିରୋଧ ଆଇନ (ପୋକ୍ସୋ) ଦଫା ବଳରେ ମାମଲା ରୁଜୁ ହୋଇଛି । ଆଜି ଶିଶୁ କନ୍ୟାକୁ ଭେଟିଛନ୍ତି ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନା । ଶିଶୁକନ୍ୟାର ଚିକିତ୍ସା ପାଇଁ ଏକ ୧୩ ଜଣିଆ ଡାକ୍ତରୀ ଟିମ୍ ଗଠନ କରାଯାଇଛି ଏବଂ ପୀଡ଼ିତାଙ୍କୁ କିପରି ଉତମ ଚିକିତ୍ସା ଯେଗାଇ ଦିଆଯିବ ସେନେଇ ପଦକ୍ଷେପ ନିଆଯାଇଛି ବୋଲି କହିଛନ୍ତି ମନ୍ତ୍ରୀ ଶ୍ରୀ ଜେନା |
ଗତକାଲି ରାତିରେ ସାଲେପୁର ଥାନା ଅଂଚଳର ଏକ ସ୍କୁଲ ବାରଣ୍ଡାରୁ ସମ୍ପୃକ୍ତ ନାବାଳିକାକୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଥିଲା । ତାକୁ ପ୍ରଥମେ ସାଲେପୁର ଏବଂ ପରେ କଟକ ବଡ ମେଡିକାଲକୁ ସ୍ଥାନାନ୍ତରିତ କରାଯାଇଥିଲା । ନାବାଳିକାକୁ କେହି ଦୁଷ୍କର୍ମ ପରେ ହତ୍ୟା ଉଦ୍ୟମ କରିଥିବା ନେଇ ପରିବାର ଲୋକେ ସନ୍ଦେହ କରି ସାଲେପୁର ଥାନାରେ ଅଭିଯୋଗ କରିଥିଲେ । ରବିବାର ସକାଳୁ ସାଇଂଟିଫିକ୍ ଟିମ୍ ଘଟଣାସ୍ଥଳକୁ ଯାଇ ଛାନଭିନ୍ କରି ଫେରିଛନ୍ତି । ଘଟଣାର ପ୍ରତିବାଦ କରି ସ୍ଥାନୀୟ କାଜିହାଟ ଛକ ଠାରେ ଲୋକେ ରାସ୍ତାରୋକ କରିଥିଲେ । ପୋଲିସ ଘଟଣାସ୍ଥଳରେ ପହଂଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ରାସ୍ତାରୋକ ପ୍ରତ୍ୟାହୃତ ହୋଇଥିଲା । ଅନ୍ୟପକ୍ଷରେ ପ୍ରାଥମିକ ତଦନ୍ତରୁ ଶିଶୁକୁ ଶାରିରୀକ ଆଘାତ ଲାଗିଥିବା ଜଣାପଡିଛି, ତେବେ ଦୁଷ୍କର୍ମ ହୋଇଛି କି ନାହିଁ ତାହା ଡାକ୍ତରୀ ମାଇନା ରିପୋର୍ଟ ଆସିବା ପରେ ସ୍ପଷ୍ଟ ହେବ ବୋଲି ପୋଲିସ କହିଛି ।
