ଭୁବନେଶ୍ୱର (ଶାସକ ପ୍ରଶାସକ) ଭାରତୀୟ କଂଗ୍ରେସର ଉଦ୍ଦିୟମାନ ଯୁବ ଚେହେରା ତଥା ଭାରତୀୟ ଯୁବ କଂଗ୍ରେସର ଜାତୀୟ ସମ୍ପାଦକ ଡ଼ ସ୍ମୃତିରଞ୍ଜନ ଲେଙ୍କାଙ୍କୁ ଓଡିଶା ପ୍ରଦେଶ ଯୁବ କଂଗ୍ରେସର ମୁଖିଆ ଦାୟିତ୍ୱରେ ଅବସ୍ଥାପିତ କରାଯାଇଛି | ତାଙ୍କୁ ପ୍ରଦେଶ ଯୁବ କଂଗ୍ରେସର ମଧ୍ୟବର୍ତ୍ତୀକାଳୀନ ସଭାପତି ଭାବେ ନିଯୁକ୍ତି ଦିଆଯାଇଥିବା ବିଷୟରେ ଅଖିଳ ଭାରତ ଯୁବ କଂଗ୍ରେସ ସଭାପତି ବି ଭି ଶ୍ରୀନିବାସ ପତ୍ର ମାଧ୍ୟମରେ ସୂଚନା ଦେଇଛନ୍ତି | ରାଜ୍ୟରେ ହୁଵା କଂଗ୍ରେସକୁ ଅଧିକ କ୍ରିୟାଶୀଳ କରିବା ଦିଗରେ ଡ଼ ଲେଙ୍କାଙ୍କ ନେତୃତ୍ୱ ସଫଳ ହେବ ବୋଲି ସେ ଆଶା ବ୍ୟକ୍ତ କରିଛନ୍ତି | ସେହିପରି ଅଖିଳ ଭାରତୀୟ କଂଗ୍ରେସର ଜାତୀୟ ସମ୍ପାଦକ ତଥା ପ୍ରଦେଶ କଂଗ୍ରେସର ଚର୍ଚିତ ଚେହେରା ଡ଼ ବିଶ୍ୱରଂଜନ ମହାନ୍ତି ଓଡିଶା ଯୁବ କଂଗ୍ରେସର ସଭାପତି ଭାବେ ଡ଼ ଲେଙ୍କାଙ୍କ ନିଯୁକ୍ତିକୁ ସ୍ୱାଗତ କରିଛନ୍ତି | ଡ଼ ସ୍ମୃତି ରଞ୍ଜନ ଲେଙ୍କାଙ୍କ ଦକ୍ଷ ନେତୃତ୍ୱ, ଦକ୍ଷତା ଓ କାଟିନ ପରିଶ୍ରମ ଓଡିଶା ଯୁବ କଂଗ୍ରେସକୁ ସଫଳତାର ନୂଆ ସୋପାନରେ ପହଂଚାଇବା ବୋଲି ଦୃଢମତ ପୋଷଣ କରିବା ସହ ତାଙ୍କୁ ଶୁଭେଚ୍ଛା ଜଣାଇଛନ୍ତି |
ସୂଚନାଯୋଗ୍ୟ ଯେ ଛାତ୍ରାବସ୍ଥାରୁ କଂଗ୍ରେସ ସହିତ ଜଡିତ ହୋଇ ଦୀର୍ଘ ଦିନର ସାଙ୍ଗଠନିକ ଅଭିଜ୍ଞତା ଓ ଅନୁଭୂତି ରଖିଥିବା ସ୍ମୃତିରଞ୍ଜନ ସମ୍ପ୍ରତି ଯୁବ କଂଗ୍ରେସର ଜାତୀୟ ସଂପାଦକ ଭାବେ କାର୍ଯ୍ୟ କରୁଛନ୍ତି | ତୃଣମୂଳ ସ୍ତରଠାରୁ ରାଜ୍ୟ ସ୍ତର ପର୍ଯ୍ୟନ୍ତ ଯୁବ କଂଗ୍ରେସ ସଙ୍ଗଠନରେ ଦୀର୍ଘଦିନର ଅଭିଜ୍ଞତା ରଖିଥିବା ସ୍ମୃତିରଞ୍ଜନ ପୂର୍ବରୁ ଓଡିଶା ପ୍ରଦେଶ କଂଗ୍ରେସ ସୋସିଆଲ ମେଡିଆ ଡିପାର୍ଟମେଣ୍ଟର ସଦସ୍ୟ, ପ୍ରଦେଶ ଯୁବ କଂଗ୍ରେସର ସାଧାରଣ ସମ୍ପାଦକ ଓ ମୁଖପାତ୍ର, ସମ୍ପାଦକ -ମୁଖପାତ୍ର, କଟକ ଲୋକ ସଭା ନିର୍ବାଚନ ମଣ୍ଡଳୀ ଯୁବ କଂଗ୍ରେସ ଉପ ସଭାପତି, ତଥା ବିଧାନ ସଭା ନିର୍ବାଚନ ମଣ୍ଡଳୀ ଯୁବ କଂଗ୍ରେସର ଯୁବ କଂଗ୍ରେସ ଉପ ସଭାପତି ଭାବେ କାର୍ଯ୍ୟ କରିବାର ବିଶାଳ ଅନୁଭୂତି ରହିଛି | ରାଜ୍ୟ କଂଗ୍ରେସର ସବୁ ଗୋଷ୍ଠୀଙ୍କ ଦ୍ୱାରା ଗ୍ରହଣୀୟ ତଥା ନିର୍ବିବାଦୀୟ ସର୍ବୋପରି ଜଣେ ଉତ୍ସର୍ଗୀତ କଂଗ୍ରେସ ଯୁବ ନେତା ସ୍ମୃତିରଞ୍ଜନଙ୍କ ନେତୃତ୍ୱରେ ପ୍ରଦେଶ ଯୁବ କଂଗ୍ରେସ ବେଶ କ୍ରିୟାଶୀଳ ହେବ ବୋଲି ଦଳୀୟ ମହଲରେ ଆଶା ସଂଚାର ହୋଇଛି |
