ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ପାରଳାଖେମୁଣ୍ଡି ସ୍ଥିତ ଜିଲ୍ଲା ପରିଷଦ ସମ୍ମିଳନୀ କକ୍ଷ ଠାରେ ଇଣ୍ଡିଆନ ବ୍ୟାଙ୍କ ପକ୍ଷରୁ ଜିଲ୍ଲା ମିଶନ ଶକ୍ତି ସହଯୋଗରେ ମହିଳା ସ୍ଵୟଂ ସହାୟିକା ଗୋଷ୍ଠୀଙ୍କ ନିମନ୍ତେ ଏକ ଋଣ ମଞ୍ଜୁର ମେଳା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମକୁ ଅତିରିକ୍ତ ଜିଲ୍ଲାପାଳ ଜ୍ଞାନରଞ୍ଜନ ଭଞ୍ଜଦେଓ ଉଦ୍ ଘାଟନ କରିଥିଲେ । ପରେ ଆୟୋଜିତ ଋଣ ମଞ୍ଜୁର ମେଳାର ବଣ୍ଟନ ସଭା କାର୍ଯ୍ୟକ୍ରମରେ ଇଣ୍ଡିଆନ ବ୍ୟାଙ୍କର ଜୋନାଲ ମ୍ୟାନେଜର ଭି . ଶଙ୍କର ରାଜୁ ଅଧ୍ୟକ୍ଷତା କରି ଉପସ୍ଥିତ ସମସ୍ତଙ୍କୁ ସ୍ୱାଗତ କରିବା ସହ କାର୍ଯ୍ୟକ୍ରମର ଆଭିମୁଖ୍ୟ ସମ୍ପର୍କରେ ଆଲୋକପାତ କରିଥିଲେ ।
ସାରା ଭାରତ ବର୍ଷରେ ଇଣ୍ଡିଆନ ବ୍ୟାଙ୍କ ନାରୀ ସଶକ୍ତିକରଣ କରାଇବା ଦିଗରେ ପଦକ୍ଷେପ ନେବା ସ୍ୱରୂପ ସେମାନଙ୍କୁ ଋଣ ଯୋଗାଇ ଦେଇ ସ୍ୱାବଲମ୍ବୀ କରାଇବା ଦିଗରେ ସହାୟକ ହୋଇ ଆସୁଛି ବୋଲି କହିଥିଲେ । ଏହି କାର୍ଯ୍ୟକ୍ରମରେ ଅତିରିକ୍ତ ଜିଲ୍ଲାପାଳ ଜ୍ଞାନରଞ୍ଜନ ଭଞ୍ଜଦେଓ ମୁଖ୍ୟଅତିଥି ଭାବେ ଯୋଗଦେଇ ଇଣ୍ଡିଆନ ବ୍ୟାଙ୍କ , ମିଶନ ଶକ୍ତି ଜରିଆରେ ମା’ ମାନଙ୍କୁ ସଶକ୍ତି କରାଇବା ପାଇଁ ସେମାନଙ୍କୁ ଋଣ ଯୋଗାଇ ଦେଇ ସେମାନଙ୍କ ଅର୍ଥନୈତିକ ବିକାଶ କରିବା ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ । ମା’ ମାନେ ଋଣ ନେଇ କିଛି ଅର୍ଥନୈତିକ କାମ କରିବେ ଯାହା ଫଳରେ ସେମାନଙ୍କ ଆତ୍ମ ନିର୍ଭରଶିଳତାର ଉନ୍ନତିରେ ଏହା ବେଶ ସହାୟକ ହୋଇ ପାରିବ ବୋଲି କହିଥିଲେ ।
ଜିଲ୍ଲା ମିଶନଶକ୍ତିର ପ୍ରକଳ୍ପ ସଂଯୋଜକ ରଶ୍ମି ରଞ୍ଜନ ସେଠୀ ଯୋଗଦେଇ ଭିଡିଓ-ବ୍ରିଫ ପ୍ରଦର୍ଶନ ମାଧ୍ୟମରେ ମିଶନଶକ୍ତି ଓ ସ୍ୱୟଂ ସହାୟିକା ଦଳ ସମ୍ପର୍କରେ ବିଭିନ୍ନ ଆବଶ୍ୟକତା ତଥ୍ୟ ଉପରେ ବିସ୍ତୃତ ସୂଚନା ଦେବା ସହ ମିଶନ ଶକ୍ତିର ବିଭିନ୍ନ ଯୋଜନା ଯାହା ମହିଳା ମାନଙ୍କ ପାଇଁ ଉଦ୍ଧିଷ୍ଟ , ସେ ସବୁ ଉପରେ ଉପସ୍ଥିତ ମା’ ମାନଙ୍କୁ ସଚେତନ କରାଇଥିଲେ ।
ଅନ୍ୟମାନଙ୍କ ମଧ୍ୟରେ ଜିଲ୍ଲା ଅଗ୍ରଣୀ ବ୍ୟାଙ୍କ ମ୍ୟାନେଜର କିଶୋର ଚନ୍ଦ୍ର ନାୟକ , ଇଣ୍ଡିଆନ ବ୍ୟାଙ୍କ ବ୍ରହ୍ମପୁର ସ୍ଥିତ ଜୋନାଲ କାର୍ଯ୍ୟାଳୟର ସିନିଅର ମ୍ୟାନେଜର ଲମ୍ବୋଦର ପଣ୍ଡା , ସହକାରୀ ଜିଲ୍ଲା ସାମାଜିକ କଲ୍ୟାଣ ଅଧିକାରୀ ଦିବାକର ପାତ୍ର ପ୍ରମୁଖ ମଞ୍ଚାସୀନ ଅତିଥି ଭାବେ ଯୋଗଦେଇ ମହିଳା ସ୍ୱୟଂ ସହାୟିକା ଦଳ ପାଇଁ ଉଦ୍ଧିଷ୍ଟ ସେମାନଙ୍କ ବିଭାଗୀୟ କାର୍ଯ୍ୟକ୍ରମ ସମ୍ପର୍କରେ କହି ମହିଳାମାନେ ଯେଉଁ ଋଣ ସହାୟତା ନେଉଛନ୍ତି ତାର ସଦୁପଯୋଗ କରିବାକୁ କହିଥିଲେ ।
ଅନ୍ୟପକ୍ଷରେ ଏଥିପାଇଁ ନିଆ ଯାଉଥିବା ରୁଣ ସୁଧ କେନ୍ଦ୍ର ସରକାର ୩ ପ୍ରତିଶତ ଓ ରାଜ୍ୟ ସରକାର ୪ ପ୍ରତିଶତ ପୁରଣ କରୁଥିବା କହିଥିଲେ । ଯେଉଁ ମାନେ ଋଣ ସହାୟତା ନେଉଛନ୍ତି , ତାହା ସୁଚାରୁ ରୁପେ ଯଦି ୧୧ ମାସ ମଧ୍ୟରେ ପରିଶୋଧ କରନ୍ତି , ତା ହେଲେ ଏହି ଋଣର ସୁଧା ଶୁନ୍ୟ ହୋଇଥାଏ , ତେଣୁ ସ୍ୱୟଂ ସହାୟକ ଗୋଷ୍ଠୀ ମାନେ ଏହାର ଭରପୁର ସୁଯୋଗ ନେବାକୁ କୁହା ଯାଇଥିଲା ।
ଏହି ଋଣ ମଞ୍ଜୁର ମେଳା କାର୍ଯ୍ୟକ୍ରମରେ ୮୦ ଗୋଟି ମହିଳା ସ୍ୱୟଂ ସହାୟିକା ଦଳକୁ ମୋଟ ୧ କୋଟି ୬୫ ଲକ୍ଷ ଟଙ୍କାର ଋଣ ମଞ୍ଜୁର ଚେକ ପ୍ରଦାନ କରାଯାଇଥିଲା । ଶେଷରେ ପାରଳାଖେମୁଣ୍ଡି ଇଣ୍ଡିଆନ ବ୍ୟାଙ୍କ ବ୍ରାଞ୍ଚ ମ୍ୟାନେଜର ମହମ୍ମଦ ଶାହାବୁଦ୍ଦିନ ଉପସ୍ଥିତ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ । ସମସ୍ତ କାର୍ଯ୍ୟକ୍ରମକୁ ଗାରାବନ୍ଧ ଇଣ୍ଡିଆନ ବ୍ୟାଙ୍କ ବ୍ରାଞ୍ଚ ମ୍ୟାନେଜର ସାଗର ପୃଷ୍ଟି , ଖରଷଣ୍ଢା ଇଣ୍ଡିଆନ ବ୍ୟାଙ୍କ ବ୍ରାଞ୍ଚ ମ୍ୟାନେଜର ଜି.ଏ.ରାଜୁ ଏବଂ ଜିଲ୍ଲା ମିଶନଶକ୍ତିର ଡ଼ିପିଏ- ମାନସ୍ମିତା ପାତ୍ର ପ୍ରମୁଖ ପରିଚାଳନାରେ ସହଯୋଗ କରିଥିଲେ।
