ଜିଲ୍ଲାପାଳଙ୍କ ଆଦେଶକୁ ବି "ସି.." କରୁନାହାନ୍ତି ଉଲୁଣ୍ଡା ବିଡିଓ
ବୀରମହାରାଜପୁର - (ବିନୋଦ ପାଣ୍ଡେ ) ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବ୍ଲକ ଅନ୍ତର୍ଗତ କୋଟସମଲାଏ ଗ୍ରାମରେ ପକ୍କାଘର ଖଣ୍ଡେ ନ ପାଇବାରୁ ଜଣେ ଦିବ୍ୟାଙ୍ଗ ପର ଘରେ ଆଶ୍ରୟ ନେଇଛନ୍ତି । ଉକ୍ତ ଗ୍ରାମର ବାପ ଛେଉଣ୍ଡ ସୁନିତା ମନ୍ତ୍ରା ମୂକ ଓ ବଧିର । ତାଙ୍କୁ ଶହେ ପ୍ରତିଶତ ଭିନ୍ନକ୍ଷମ ପ୍ରମାଣ ପତ୍ର ମଧ୍ୟ ସରକାର ତରଫରୁ ଯୋଗାଇଦିଆଯାଇଛି । ସରକାରୀ ସାହାଯ୍ୟ କହିଲେ ଭତ୍ତା ବାବଦକୁ ପାଞ୍ଚ ଶହ ଟଙ୍କା । ପରିବାର କହିଲେ ଘରେ ଥିବା ବିଧବା ମା ସୁଭାଶିନୀ ମନ୍ତ୍ରାଙ୍କ ସହ ରହୁଥିଲେ । ରହୁଥିବା ମାଟି ଘରଟି ବର୍ଷାରେ ସମ୍ପୂର୍ଣ ଭାଙ୍ଗିଗଲା । ସେମାନେ ଅତ୍ୟନ୍ତ ଗରିବ ଶ୍ରେଣୀର ହୋଇଥିବାରୁ ଭଙ୍ଗା ଘରକୁ ଆଜି ପଯ୍ୟନ୍ତ ମରାମତି କରିପାରିଲେ ନାହିଁ । ଫଳରେ ସେମାନେ ବାଧ୍ୟ ହୋଇ ଅନ୍ୟ ଜଣଙ୍କ ଘରେ ଆଶ୍ରୟ ନେଉଛନ୍ତି । ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ଆବାସ ଯୋଜନାରେ ସାମିଲ କରିବା ପାଇଁ ଦିବ୍ୟାଙ୍ଗ ସୁନିତା ଉଲୁଣ୍ଡା ବିଡିଓ, ବୀରମହାରାଜପୁର ଉପଜିଲ୍ଲାପାଳ ଓ ଅକ୍ଟୋବର ୨୨ତାରିଖରେ ଘର ଖଣ୍ଡିଏ ପାଇଁ ଲିଖିତ ଭାବେ ଅଭିଯୋଗ କରିଥିଲେ । ଏ ନେଇ ଜିଲ୍ଲାପାଳ ତାଙ୍କୁ ଯଥାଶୀଘ୍ର ଘର ଯୋଗାଇ ଦେବା ପାଇଁ ଉଲୁଣ୍ଡା ବି .ଡି. ଓ ନିଲାମ୍ବର ମହାନନ୍ଦଙ୍କୁ ନିଦ୍ଦେର୍ଶ ଦେଇଥିଲେ । ମାତ୍ର ଆଜିକୁ ତିନି ମାସ ବିତିଯାଇଥିଲେ ସୁଦ୍ଧା ଏଯାବତ୍ ଘର ମିଳିପାରି ନାହିଁ ।
