ଜଳସେଚନ ନିଗମ କର୍ମଚାରୀ ଫେଡେ଼ରେସନର ରାଜ୍ୟ କମିଟି ବୈଠକ
ବ୍ୟାସନଗର(ଜୟଶଙ୍କର ଦାଶ) ଓଡ଼ିଶା ଉଠାଜଳସେଚନ ନିଗମ କର୍ମଚାରୀ ରାଜ୍ୟ ଫେଡେ଼ରେସନର କାର୍ଯ୍ୟକାରୀ କମିଟି ବୈଠକ ଦଳା ସ୍ଥିତ କର୍ମଚାରୀ ସଂଘ ଗୃହରେ ରବିବାର ଦିନ ପୂର୍ବାହ୍ନରେ ଅନୁଷ୍ଠିତ ହୋଇଯାଇଅଛି । ଫେଡେ଼ରେସନର ବରିଷ୍ଠ ଉପ-ସଭାପତି ତଥା ରାଜ୍ୟ ଏ.ଆଇ.ଟି.ୟୁ.ସି. ଋ ସଂପାଦକ ଡଃ ସୌରୀବନ୍ଧୁ କର ଏହି ବୈଠକରେ ଅଧ୍ୟକ୍ଷତା କରିଥିଲେ । ସାଧାରଣ ସଂପାଦକ ଗୌରାଙ୍ଗ ପାଣିଗ୍ରାହୀ ଆଲୋଚନାର ବିଷୟ ବୈଠକରେ ଆଗତ କରିଥିଲେ । ନିଗମରୁ ଅବସର ନେଇଥିବା ପ୍ରାୟ ୪ ହଜାର କର୍ମଚାରୀଙ୍କୁ ଅଦ୍ୟାବଧି ପେନସନ ଦିଆଯାଇନାହିଁ । ୨୦୦୩ ମସିହାରୁ ଅବସର ନେଇଥିବା କେତେକ କର୍ମଚାରୀ ଗତ ୧୫ବର୍ଷ ମଧ୍ୟରେ ପେନସନ୍ ଦିଆଯାଇନାହିଁ । ୨୦୦୩ ମସିହାରୁ ଅବସର ନେଇଥିବା କେତେକ କମର୍ଚାରୀ ଗତ ୧୫ ବର୍ଷ ମଧ୍ୟରେ ପେନସନ୍ ନପାଇ ମୃତ୍ୟୁବରଣ କଲେଣି । ନିଗମ କର୍ତ୍ତୁପକ୍ଷ ଗତ ୬ ମାସ ତଳେ ସ୍ୱଳ୍ପ ବେତନ ଭୋଗୀ ୩ୟ ଓ ୪ର୍ଥ ଶ୍ରେଣୀର ପ୍ରାୟ ୧୫ଜଣଙ୍କୁ ସମସ୍ତ ଆଇନକୁ ଉଲଙ୍ଘନ କରି ବଦଳି କରିଅଛନ୍ତି । ବହୁ ଆବେଦନ ଓ ନିବେଦନ ପରେ ମଧ୍ୟ ଏହି କର୍ମଚାରୀମାନଙ୍କର ବଦଳି ଆଦେଶ ବାତିଲ କରାଯାଇନାହିଁ । ନିଗମ କର୍ତ୍ତୁପକ୍ଷ ପାଣି ପଞ୍ଚାୟତ ଯୋଜନାରେ କୃଷକମାନଙ୍କୁ ହସ୍ତାନ୍ତର କରିଥିବା ଅନେକ ସେଚପ୍ରକଳ୍ପ ଅଚଳ ହୋଇପଡ଼ିଛି । କୃଷକମାନେ ନିଗମ ଉପରୁ ଭରଷା ତୁଟାଇ ଦେଉଛନ୍ତି । ତେଣୁ ଆସନ୍ତା ସାଧାରଣ ନିର୍ବାଚନ ପ୍ରକ୍ରିୟା ସମାପ୍ତ ପରେ କୃଷକ ଓ ଶ୍ରମିକମାନଙ୍କୁ ନେଇ ରାଜ୍ୟସ୍ତରରେ ବ୍ୟାପକ ଆନ୍ଦୋଳନ ପାଇଁ ନିଷ୍ପତ୍ତି ନିଆଯାଇଛି । ଆସନ୍ତା ନିର୍ବାଚନରେ ଶ୍ରମିକଙ୍କ ସ୍ୱାର୍ଥ ପାଇଁ ଲଢେଇ କରୁଥିବା ରାଜନୈତିକ ଦଳ ଓ ବ୍ୟକ୍ତିଙ୍କୁ ଜୟଯୁକ୍ତ କରାଇବାକୁ ସାହାଯ୍ୟ ଓ ସହଯୋଗ ପାଇଁ ନିବେଦନ କରାଯାଇଛି । ଏହି ବୈଠକରେ ରାଜ୍ୟର ବିଭିନ୍ନ ଜିଲ୍ଲା ସଂଘମାନଙ୍କର ପ୍ରତିନିଧି ଭାବେ ନିରଞ୍ଜନ ପରିଡ଼ା , ସୁବାସ ଚନ୍ଦ୍ର ମଲ୍ଲ, ରମେଶ ସାହୁ, ଉପେନ୍ଦ୍ର ପରିଡ଼ା, ଶ୍ୟାମସୁନ୍ଦର ଜେନା, କୁଳମଣି ସାମଲ, ପିତାମ୍ବର ମହାନ୍ତି ଓ ଏଆଇଟିୟୁସିର ଯାଜପୁର ଜିଲ୍ଲା ସଂପାଦକ ଆଲୋଚନାରେ ଅଂଶଗ୍ରହଣ କରିଥିଲେ । ଶେଷରେ ଅମୂଲ୍ୟ ବଳ ଉପସ୍ଥିତମାନଙ୍କୁ ଧନ୍ୟବାଦ ଦେଇଥିଲେ ।