ଜିଲ୍ଲାସ୍ତରୀୟ ମୋ’ ସ୍କୁଲ ଅଭିଯାନ କାର୍ଯ୍ୟକ୍ରମ
ବଲାଙ୍ଗୀର,(ନିରୋଜ ମିଶ୍ର) ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ପରିସରରେ ଥିବା ସମ୍ମିଳନୀ କକ୍ଷ ମଧ୍ୟରେ ଜିଲ୍ଲା ସ୍ତରୀୟ ମୋ’ସ୍କୁଲ ଅଭିଯାନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଜିଲ୍ଲା ଶିକ୍ଷା ଅଧିକାରୀ କାର୍ତ୍ତିକେଶ୍ୱର ଲେଙ୍କା ଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ବିଧାୟକ ବଲାଙ୍ଗିର ତଥା ବିରୋଧି ଦଳ ନେତା ନରସିଂହ ମିଶ୍ର, ବଲାଙ୍ଗିର ସାଂସଦ କଳିକେଶ ନାରାୟଣ ସିଂଦେଓ, ଟିଟିଲାଗଡ ବିଧାୟିକା ଟୁକୁନି ସାହୁ, ଲୋଇସିଂହା ବିଧାୟକ ଯୋଗେନ୍ଦ୍ର ବେହେରା ତଥା ବଲାଙ୍ଗିର ଜିଲ୍ଲାପାଳ ଅରିନ୍ଦମ ଡାକୁଆ ନିମନ୍ତ୍ରୀତ ଅତିଥି ରୂପେ ଯୋଗ ଦେଇ ଯେଉଁ ବିଦ୍ୟାଳୟ ଆମକୁ ଗଢି ତୋଳିଛି ତାକୁ ସମୟ ଦେବା ଓ ସଜାଡିବା ସମସ୍ତଙ୍କର ଧ୍ୟେୟ ହେବା ଉଚିତ୍ ବୋଲି ମତ ବ୍ୟକ୍ତ କରିଥିଲେ । ଜିଲ୍ଲା ଶିକ୍ଷାଧିକାରୀ ଶ୍ରୀ ଲେଙ୍କା ନିଜ ଅଭିଭାଷଣୀୟ ବାର୍ତ୍ତାରେ କହିଥିଲେ, “ସ୍କୁଲ ଡାକୁଛି- ଦିନେ ଗଢିଥିଲି ତୋତେ ଏବେ ଆ’ ଗଢିବୁ ମୋତେ” । ସଭା କାର୍ଯ୍ୟ ପ୍ରାରମ୍ଭରେ ସରକାରୀ ବାଳିକା ଉଚ୍ଚ ବିଦ୍ୟାଳୟର ଛାତ୍ରୀ ମାନେ ପ୍ରାରମ୍ଭିକ ସଙ୍ଗୀତ ପରିବେଷଣ କରିଥିଲେ । ଜିଲ୍ଲା ବିଜ୍ଞାନ ତତ୍ତ୍ୱାବଧାରକ ନିଳମଣୀ ପଟେଲ ଅତିଥି ମାନଙ୍କ ପରିଚୟ ପ୍ରଦାନ କରିଥିବା ବେଳେ ପୁଇଁନ୍ତଳା ବିଇଓ ନେପାଳ ଚନ୍ଦ୍ର ବାଗ କାର୍ଯ୍ୟକ୍ରମର ସଂଯୋଜନା କରିଥିଲେ । ଜିଲ୍ଲା ର ୧୪ଟି ବ୍ଲକର ବିଇଓ, ଏବିଇଓ, ସିଆରସିସି, ବିଆରସିସି, ବଲାଙ୍ଗିର ଜିଲ୍ଲାର ନିମନ୍ତ୍ରୀତ ଶିକ୍ଷାବିତ୍, ପୁରାତନ ଛାତ୍ର ଛାତ୍ରୀ ଉପସ୍ଥିତ ଥିଲେ । ଉକ୍ତ ଅବସରରେ ସମସ୍ତ ବ୍ଲକରେ ଚାଲୁଥିବା ମୋ’ ସ୍କୁଲ ଅଭିଯାନ ସମ୍ପର୍କିତ ବୃତ୍ତ ଚିତ୍ର ଓ ପ୍ରଦର୍ଶନୀ ପ୍ରଦର୍ଶନ କରାଯାଇଥିଲା । ଆକାଶବାଣୀ କଣ୍ଠ ଶିଳ୍ପୀ ଅଳକା ଦାଶ ଉଦ୍ଯାପନୀ ସଙ୍ଗୀତ ପରିବେଷଣ କରିଥିବାବେଳେ ଧନ୍ୟବାଦ ଦେଇଥିଲେ ଜିଲ୍ଲା କ୍ରୀଡା ନିରୀକ୍ଷକ ଜ୍ୟୋତି ପ୍ରସାଦ ପରିଡା ।
