ବ୍ରହ୍ମପୁର, ନଭେମ୍ବର: ଟିପି ସଦର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ (ଟିପିଏସ୍ଓଡିଏଲ୍) ତରଫରୁ ବ୍ରହ୍ମପୁରସ୍ଥିତ କର୍ପୋରେଟ କାର୍ଯ୍ୟାଳୟରେ ରକ୍ତଦାନ ଶିବିର ଆୟୋଜିତ ହୋଇଛି। କେନ୍ଦ୍ରୀୟ ରେଡକ୍ରସ୍ ରକ୍ତ ଭଣ୍ଡାର, କଟକ ଓ ଏଏଲଆଇଜି ଶୈକ୍ଷିକ ଓ ଜନମଙ୍ଗଳ ଅନୁଷ୍ଠାନର ସହଯୋଗରେ ଏହାକୁ କାର୍ଯ୍ୟକ୍ଷମ କରାଯାଇଛି । ରକ୍ତଭଣ୍ଡାରଗୁଡ଼ିକୁ ରକ୍ତ ଯୋଗାଇବା ଏବଂ ଜରୁରୀ ସମୟରେ ଯେପରି ରକ୍ତ ଅଭାବରେ ରୋଗୀଙ୍କ ଚିକିତ୍ସାରେ କୌଣସି ଅସୁବିଧା ନ ହେବ ସେ ଦିଗରେ ଗୁରୁତ୍ବ ଦେବା ଏହି କାର୍ଯ୍ୟକ୍ରମର ମୂଳ ଉଦ୍ଦେଶ୍ୟ ଅଟେ ।
ଆୟୋଜିତ ଏହି ରକ୍ତଦାନ ଶିବିରରେ ମୋଟ ୭୨ ୟୁନିଟ ରକ୍ତ ସଂଗୃହୀତ ହୋଇଛି। ଏଥିରେ କମ୍ପାନୀର ବହୁ କର୍ମଚାରୀ ସ୍ୱ-ଇଚ୍ଛାରେ ଉତ୍ସାହର ସହିତ ରକ୍ତଦାନ କରିଥିଲେ। ସେମାନଙ୍କର ଅଂଶଗ୍ରହଣ, କମ୍ପାନୀର ସମାଜ କଲ୍ୟାଣ ଓ ସାମାଜିକ ଦାୟିତ୍ଵ ପ୍ରତି ଥିବା ସାମଗ୍ରିକ ପ୍ରତିବଦ୍ଧତାକୁ ପ୍ରମାଣ କରୁଛି ।
ଏହି କାର୍ଯ୍ୟକ୍ରମଟି କମ୍ପାନୀର ଚାଲୁ ରହିଥିବା ସ୍ୱେଚ୍ଛାସେବୀ ପ୍ରୟାସର ଏକ ଅଂଶ ଅଟେ। ଆଗାମୀ ଦିନରେ ଟିପିଏସ୍ଓଡିଏଲର ୬ଟି ସର୍କଲରେ ଏହି ରକ୍ତଦାନ ଶିବିର ଆୟୋଜିତ ହେବ। କମ୍ପାନୀ ତରଫରୁ ନିଆଯାଉଥିବା ଏହି ଉଦ୍ୟମ ଜରୁରୀ ସମୟରେ ରୋଗୀମାନଙ୍କୁ ସହାୟତା ପ୍ରଦାନ କରିବା ସହ କର୍ମଚାରୀଙ୍କ ମଧ୍ୟରେ ସ୍ୱାସ୍ଥ୍ୟକୁ ଗୁରୁତ୍ୱ ଦେବା ଦିଗରେ ସହାୟକ ହେବ।
ଆୟୋଜିତ ରକ୍ତଦାନ ଶିବିରକୁ ଟିପିଏସ୍ଓଡିଏଲର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ଅମିତ କୁମାର ଗର୍ଗ ଉଦଘାଟନ କରିଛନ୍ତି। କାର୍ଯ୍ୟକ୍ରମରେ ଅନ୍ୟ ବରିଷ୍ଠ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ। ଉପସ୍ଥିତ କର୍ମଚାରୀମାନଙ୍କର ସହଯୋଗକୁ କମ୍ପାନୀର ସିଇଓ ଶ୍ରୀ ଅମିତ କୁମାର ଗର୍ଗ ପ୍ରଶଂସା କରିବା ସହିତ ଏଭଳି କାର୍ଯ୍ୟ ଜାରି ରଖିବା ପାଇଁ ଉତ୍ସାହିତ କରିଥିଲେ ଏବଂ ନିଜେ ମଧ୍ୟ ରକ୍ତଦାନ କରିଥିଲେ।
ଏ ସମ୍ପର୍କରେ କମ୍ପାନୀର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ଅମିତ କୁମାର ଗର୍ଗ କହିଛନ୍ତି, “ରକ୍ତଦାନ ହେଉଛି ମାନବ ସେବାର ଏକ ସର୍ବୋଚ୍ଚ ସେବାର ସ୍ୱରୂପ। ଏଭଳି ଏକ ଜୀବନ ରକ୍ଷାକାରୀ କାର୍ଯ୍ୟକ୍ରମରେ ଯୋଗ ଦେଇଥିବା କର୍ମଚାରୀମାନଙ୍କ ପାଇଁ ମୁଁ ଗର୍ବ ଅନୁଭବ କରୁଛି। ଏଥିସହିତ ଟିପିଏସ୍ଓଡିଏଲ୍ ସମାଜକୁ ସୁଦୃଢ଼ କରିବା ଏବଂ ଲୋକଙ୍କ ଜୀବନରେ ଏକ ଅର୍ଥପୂର୍ଣ୍ଣ ପରିବର୍ତ୍ତନ ଆଣିବା ପାଇଁ ତାର ସମସ୍ତ ପ୍ରୟାସଗୁଡ଼ିକ ଜାରି ରଖିବ ଏବଂ ପ୍ରୋତ୍ସାହିତ କରିବ” ।
ଏଭଳି ଜନମଙ୍ଗଳକାରୀ ପଦକ୍ଷେପଗୁଡ଼ିକ ମାଧ୍ୟମରେ ସ୍ୱାସ୍ଥ୍ୟ, ସୁରକ୍ଷା ଏବଂ ସାମାଜିକ ଉନ୍ନୟନ କ୍ଷେତ୍ରରେ ସକାରାତ୍ମକ ଓ ସାମାଜିକ ପ୍ରଭାବ ସୃଷ୍ଟି କରିବା ପାଇଁ ଟିପିଏସ୍ଓଡିଏଲ୍ ଦୃଢ଼ ପ୍ରତିବଦ୍ଧ। ଆଗାମୀ ଦିନମାନଙ୍କରେ କମ୍ପାନୀ ଏହି ଭଳି ବହୁ ସ୍ୱେଚ୍ଛାସେବୀ କାର୍ଯ୍ୟକ୍ରମ ଆୟୋଜନ କରିବାକୁ ଯୋଜନା ରଖିଛି, ଯାହା କର୍ମଚାରୀମାନଙ୍କୁ ସମାଜର ବିକାଶମୂଳକ କାର୍ଯ୍ୟରେ ଅଂଶଗ୍ରହଣ କରିବା ପାଇଁ ଉତ୍ସାହିତ କରିବ ।
