ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଗଜପତି ଜିଲ୍ଲା ଗୁରାଣ୍ଡି ଗ୍ରାମରେ ଆଜି ( ରବିବାର) ପ୍ରଥମ ସାଂସଦ ଏବଂ ଅବିଭାଜିତ ଗଞ୍ଜାମ ଜିଲ୍ଲାର ଦ୍ୱିତୀୟ ରାଜ୍ୟସଭା ସାଂସଦ ନାରାୟଣ ପାତ୍ରଙ୍କ ୧୧୨ତମ ଜନ୍ମ ବାର୍ଷିକୀ ପାଳିତ ହୋଇଯାଇଛି।
ଏହି ଉତ୍ସବ "ଜଷ୍ଟିସ୍ କର୍ଣ୍ଣର" ଏବଂ "ଲୋକନାୟକ ନାରାୟଣ ପାତ୍ର ସ୍ମୃତି ପରିଷଦ"ର ସହଯୋଗରେ ପ୍ରଥମ ଥର ପାଇଁ ଆୟୋଜିତ ହୋଇଯାଇଛି। ଏହି କାର୍ଯ୍ୟକ୍ରମରେ ସଭାପତି କିଶୋର ଚନ୍ଦ୍ର ପାତ୍ର , ଆବାହାକ ସଞ୍ଜୟ କୁମାର ରାଉତ ଏବଂ ଜଷ୍ଟିସ କର୍ଣ୍ଣର ର ସଭାପତି ଓ ଆଇନଜୀବୀ ଶ୍ରୀମତୀ ଭାଗ୍ୟଲକ୍ଷ୍ମୀ ନାୟକ ଆୟୋଜନ କରିଥିଲେ।
ଉକ୍ତ କାର୍ଯ୍ୟକ୍ରମ ରେ ମୁଖ୍ୟ ଅତିଥି ଭାବେ ଗଜପତି ଜିଲ୍ଲାପାଳ ଶ୍ରୀ ବିଜୟ କୁମାର ଦାଶ ଯୋଗ ଦେଇଥିବା ବେଳେ ସମ୍ମାନିତ ଅତିଥି ରୂପେ ଡଃ ବାୟୁମନୁ ଚର୍ଚ୍ଚି , ଉପାନ୍ତ ପ୍ରହରୀ ପୂର୍ଣ୍ଣଚନ୍ଦ୍ର ମହାପାତ୍ର , ଜଷ୍ଟିସ କର୍ଣ୍ଣର ଶ୍ରୀମତି ଭାଗ୍ୟଲକ୍ଷ୍ମୀ ନାୟକ , ଶ୍ରୀ ପ୍ରଦୀପ କୁମାର ଜେନା , ଜ୍ୟେଷ୍ଠ ନାଗରିକ ସଭାପତି ପିତବାସ ସାମଲ , ଗ୍ରାମ ସରପଞ୍ଚ ଶିଳ୍ପା ପାତ୍ର ଏବଂ ସମିତି ସଭ୍ୟ ପାଇଲୁ ମିନାକ୍ଷୀ ମଞ୍ଚାସୀନ ରହି ନାରାୟଣ ପାତ୍ର ଜଣେ ଉତ୍ସର୍ଗୀକୃତ ସ୍ୱାଧୀନତା ସଂଗ୍ରାମୀ ଥିଲେ , ଯିଏ ମହାତ୍ମା ଗାନ୍ଧୀଙ୍କ ଆହ୍ୱାନରେ ଲବଣ ସତ୍ୟାଗ୍ରହ ଆନ୍ଦୋଳନରେ ନେତୃତ୍ୱ ନେଇଥିଲେ। ସେ ବ୍ରିଟିଶ ସରକାରଙ୍କ ବିରୋଧରେ ସ୍ୱାଧୀନତା ସଂଗ୍ରାମରେ ସକ୍ରିୟ ଭୂମିକା ଗ୍ରହଣ କରିଥିଲେ ଏବଂ ଏକାଧିକ ଥର ବନ୍ଦୀ ହୋଇଥିଲେ। ତାଙ୍କର ଅଦମ୍ୟ ସାହସ ଏବଂ ପ୍ରତିବଦ୍ଧତା ପାଇଁ ତାଙ୍କୁ "ଗଜପତିର ଦ୍ୱିତୀୟ ମହାତ୍ମା ଗାନ୍ଧୀ" ବୋଲି କୁହାଯାଉଥିଲା ବୋଲି କହିଥିଲେ।
ଏହି କାର୍ଯ୍ୟକ୍ରମରେ ନାରାୟଣ ପାତ୍ରଙ୍କ ପରିବାର ସଦସ୍ୟ ତଥା ଶ୍ରୀମତୀ ଅନୁରାଧା ପାତ୍ର , ଶ୍ରୀ ଶ୍ରୀକାନ୍ତ ପାତ୍ର ଏବଂ ଶ୍ରୀ ବୁଦ୍ଧଦେବ ପାତ୍ରଙ୍କୁ ଜିଲ୍ଲା ମାଜିଷ୍ଟ୍ରେଟ୍ ଏବଂ ବ୍ରହ୍ମପୁରରୁ ଆସିଥିବା ତିନି ଅତିଥି ସମ୍ମାନିତ କରିଥିଲେ। ଏହି ଅତିଥିମାନେ ହେଲେ ଶ୍ରୀ କାମେଶ୍ୱର ମହାନ୍ତି , ଭିକାରୀ ଚରଣ ନାୟକ ଏବଂ ରାମକୃଷ୍ଣ ଲେଙ୍କା।
ଏହି କାର୍ଯ୍ୟକ୍ରମରେ ପାରଳାଖେମୁଣ୍ଡି , ଗୋଷାଣୀ ଗ୍ରାମ ସରପଞ୍ଚ ସମେତ ୧୫୦ ରୁ ଉର୍ଦ୍ଧ୍ବ ପ୍ରତିଭାଗୀ ଯୋଗ ଦେଇଥିଲେ।
ଏହି ସଭାରେ ପୂର୍ଣ୍ଣଚନ୍ଦ୍ର ମହାପାତ୍ର ଏବଂ ଡଃ ବାୟୁମନୁ ଚର୍ଚ୍ଚି ତିନୋଟି ପ୍ରସ୍ତାବ ରଖିଥିଲେ। ପ୍ରଥମତଃ ଗୁରାଣ୍ଡି ଗ୍ରାମକୁ ସ୍ୱାଧୀନତା ସଂଗ୍ରାମୀ ଗ୍ରାମ ଘୋଷଣା କରାଯାଉ , କାରଣ ଏହି ଗ୍ରାମରୁ ୧୭ ଜଣ ସ୍ୱାଧୀନତା ସଂଗ୍ରାମୀ ଆସିଥିଲେ , ଦ୍ୱିତୀୟତଃ ଗ୍ରାମରେ ଏକ ସ୍ମୃତି ସ୍ମାରକ ସ୍ଥାପନ ହେଉ ଏବଂ ତୃତୀୟତଃ ପାରଳାଖେମୁଣ୍ଡି ସହରରେ ନାରାୟଣ ପାତ୍ରଙ୍କ ଏକ ପ୍ରତିମୂର୍ତ୍ତି ସ୍ଥାପନ କରାଯାଉ।
ଏହି କାର୍ଯ୍ୟକ୍ରମ ନାରାୟଣ ପାତ୍ରଙ୍କ ସାହସ , ତ୍ୟାଗ ଏବଂ ଦେଶପ୍ରେମକୁ ସ୍ମରଣ କରିବା ପାଇଁ ଏକ ଶ୍ରଦ୍ଧାଞ୍ଜଳି ଭାବେ ପାଳିତ ହୋଇଥିଲା। କାରଣ ତାଙ୍କ ଜୀବନୀ ପ୍ରତ୍ୟେକ ଯୁବପିଢ଼ି ପାଇଁ ପ୍ରେରଣାର ଉତ୍ସ ରୂପେ ରହିଛି। ନାରାୟଣ ପାତ୍ର ଜଣେ ପ୍ରେରଣାଦାୟକ ନେତା ଥିଲେ। ଯାହାଙ୍କ ଜୀବନ ଆଜିର ପିଢ଼ିକୁ ଦେଶପ୍ରେମ ଏବଂ ସାମାଜିକ ଦାୟିତ୍ୱ ପ୍ରତି ପ୍ରେରିତ କରେ। ତାଙ୍କ ଜନ୍ମସ୍ଥାନ ଗୁରାଣ୍ଡି ଗ୍ରାମରେ ଏହି କାର୍ଯ୍ୟକ୍ରମ ଆୟୋଜନ କରାଯାଇଥିବାରୁ ଏହା ଅଧିକ ମହତ୍ତ୍ୱପୂର୍ଣ୍ଣ ହୋଇଛି।
ଏହି ଉତ୍ସବ ପ୍ରଥମଥର ପାଇଁ ତାଙ୍କର ଅବଦାନକୁ ସ୍ମରଣ କରିବା ପାଇଁ ଏକ ମହତ୍ତ୍ୱପୂର୍ଣ୍ଣ ପଦକ୍ଷେପ ଥିଲା।