ଓଡଗାଁ, ୬।୧(ଶ୍ରୀକାନ୍ତ କୁମାର ମିଶ୍ର): ନୟାଗଡ଼ ଜିଲ୍ଲା ଓଡ଼ଗାଁ ତହସିଲ ରୋହିବାଙ୍କ ପଞ୍ଚାୟତ ଭଗବତି ପ୍ରସାଦ ମାଙ୍କଡା ପଥର ଖଣିରୁ ମୋରମ ଉଠାଣ କରୁଥିବା ବେଳେ ସ୍ଥାନୀୟ ଲୋକଙ୍କ ସଯୋଗରେ ପୋଲିସ ୨ଟି ହାଇଓ୍ବା ସହିତ ଗୋଟିଏ ଜେସିବି ମେସିନ ଜବତ କରିଥିବା ଜଣାପଡିଛି । ସୂଚନା ଥାଉକି ଓଡ଼ଗାଁ ତହସିଲ ଅଞ୍ଚଳରେ ଚାଲିଥିବା ପଥର ଖଣିକୁ ନେଇ ବର୍ଷ ବର୍ଷ ଧରି ନାନା ବାଦ ବିବାଦ ଲାଗି ରହିଛି । ଏବଂ ଏହାର ସମାଧାନର ବାଟ ବାହାରି ପାରିନାହିଁ । ଏପରି ସ୍ଥଳେ ରବିବାର ବିଳମ୍ବିତ ରାତିରେ ଓଡ଼ଗାଁ ତହସିଲ ରୋହିବାଙ୍କ ପଞ୍ଚାୟତ ଭଗବତି ପ୍ରସାଦ ମାଙ୍କଡ଼ା ପଥର ଖଣିରେ କାହାରିକୁ ନଜଣାଇ ଯୋର ଜବରଦସ୍ତ ଓଡି ୩୩ ଏସି ୨୦୭୩ ଜେସିବି ମେସିନ ସହାୟତାରେ ଓଡି ୦୧ ଟି ୫୯୮୫ ଓ ଓଡି ୩୦ ଏ ୭୮୨୯ ନମ୍ବର ବିଶିଷ୍ଟ ୨ଟି ହାଇଓ୍ବାରେ ମୋରମ ଲଦିବା ସମୟରେ ସ୍ଥାନୀୟ ଲୋକେ ଏହାକୁ ବିରୋଧ କରିଥିଲେ । ଏବଂ ଉତ୍ୟକ୍ତ ଲୋକେ ପରବର୍ତ୍ତୀ ସମୟରେ ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଁଞ୍ଚି ଜେସିବି ମେସିନ ସହିତ ୨ଟି ହାଇଓ୍ବାକୁ ଜବତକରି ଥାନାକୁ ଆଣିଥିବା ବେଳେ ଘଟଣା ସମ୍ପର୍କରେ ତଦନ୍ତ ଆରମ୍ଭ କରିଛନ୍ତି । ତଦନ୍ତ ପରେ ଘଟଣା ସମ୍ପର୍କରେ ସବିଶେଷ ତଥ୍ୟ ଲୋକଲୋଚନକୁ ଆସିବ ବୋଲି ସ୍ଥାନୀୟ ଲୋକେ କହିଛନ୍ତି ।
