ନୂଆଦିଲ୍ଲୀ/ଭୁବନେଶ୍ୱର, ୨୬ ନଭେମ୍ବର ୨୦୨୪: ଓଡ଼ିଶାର ବାସନା ଚାଉଳର ବାସ୍ନା ଏବେ ଦିଲ୍ଲୀରେ ପହଞ୍ଚିଛି। ନୂଆଦିଲ୍ଲୀରେ ଚାଲିଥିବା ଭାରତ ଅନ୍ତର୍ଜାତୀୟ ବାଣିଜ୍ୟ ମେଳାରେ ଓଡ଼ିଶା ଚାଷୀଙ୍କ ଦ୍ୱାରା ଅମଳ ହୋଇଥିବା ବିଭିନ୍ନ କିସମର ସୁଗନ୍ଧିତ ଚାଉଳ କିଣିବାକୁ ଗ୍ରାହକମାନେ ଆଗ୍ରହ ପ୍ରକାଶ କରୁଛନ୍ତି।
“ଓଡ଼ିଶା ମଣ୍ଡପ ସବୁଠୁ ସୁନ୍ଦର ଲାଗୁଛି। ତା’ସହ ଏଠାରେ ଥିବା ଷ୍ଟଲରେ ବିଭିନ୍ନ ପ୍ରକାର ବାସ୍ନା ଚାଉଳ ମିଳୁଛି। ଆମେ ବାସୁମତୀ ଚାଉଳ ଖାଉଥିବାରୁ ସୁଗନ୍ଧିତ ନୂଆ କଳାଜିରା ଚାଉଳ ନେଉଛୁ,” କହିଛନ୍ତି ପ୍ରବାସୀ ଓଡ଼ିଆ ମଧୁସୂଦନ ପଲାଇ।
ବର୍ତ୍ତମାନ ରାଜ୍ୟର ୧୩ଟି ଜିଲ୍ଲାରେ ୮ ପ୍ରକାର ବାସନା ଚାଉଳ ଚାଷ କରାଯାଉଛି। ଏଥିପାଇଁ ଚାଷୀମାନଙ୍କୁ କୃଷି ବିଭାଗ ପକ୍ଷରୁ ବିଭିନ୍ନ ଇନ୍ପୁଟ ଓ ବୈଷ ୟିକ ସହାୟତା ଦିଆଯାଉଛି। ଚଳିତ ବର୍ଷ ନୂଆଦିଲ୍ଲୀର ବାଣିଜ୍ୟ ମେଳାରେ ପ୍ରାୟ ୨.୮ ମେଟ୍ରିକ୍ ଟନ୍ ସୁଗନ୍ଧିତ ଚାଉଳ ବିକ୍ରି ହେବ ବୋଲି କୃଷି ବିଭାଗ ଆକଳନ କରିଛି।
‘ଓଡ଼ିଶା ମଣ୍ଡପ’ରେ ଆଉ ଏକ ଆକର୍ଷଣ ହେଉଛି କୃଷି ବିଭାଗର ‘ଶ୍ରୀ ଅନ୍ନ ଅଭିଯାନ’ ଅଧୀନରେ ପ୍ରସ୍ତୁତ ବିଭିନ୍ନ ପ୍ରକାର ପାରମ୍ପରିକ ଓ ଆଧୁନିକ ଖାଦ୍ୟ ପଦାର୍ଥ । ତା’ ଭିତରେ ରହିଛି ମାଣ୍ଡିଆ ଓ ବିଭିନ୍ନ ପୁଷ୍ଟିଶସ୍ୟରୁ ପ୍ରସ୍ତୁତ ଖାଦ୍ୟ ଯେପରିକି ମାଣ୍ଡିଆ ଲଡୁ, ବିସ୍କୁଟ, ମିସ୍କଚର, ନମକିନ୍, ନୁଡୁଲ୍ସ ଇତ୍ୟାଦି। ‘ଓଡ଼ିଶା ମଣ୍ଡପ’କୁ ବୁଲି ଆସୁଥିବା ପ୍ରବାସୀ ଓଡ଼ିଆ ଏବଂ ବିଭିନ୍ନ ପ୍ରଦେଶର ଲୋକେ ଏହିସବୁ ଜିନିଷ ଆଗ୍ରହର ସହ କିଣି ନେଉଛନ୍ତି।
ବିଭାଗୀୟ ସୂଚନା ଅନୁଯାୟୀ ଗତବର୍ଷ ଓଡ଼ିଶା ଷ୍ଟଲରେ ଦେଢ଼ କୁଇଣ୍ଟାଲରୁ ଅଧିକ ମିଲେଟ୍ ସାମଗ୍ରୀ ବିକ୍ରି ହୋଇଥିଲା। ଏଥର ତାହା ୪ କ୍ୱିଣ୍ଟାଲ ହେବ ବୋଲି ଆକଳନ ରଖାଯାଇଛି। ସେହିପରି ଅନ୍ୟାନ୍ୟ କୃଷି ଉତ୍ପାଦ ମଧ୍ୟରେ ହଳଦୀ, ଝୁଣା ଓ ଲେମନ୍ ଗ୍ରାସ୍ ତେଲ ଇତ୍ୟାଦିକୁ କୃଷି ବିଭାଗ ଷ୍ଟଲରୁ ଗ୍ରାହକମାନେ କିଣୁଛନ୍ତି।
