ମାପିଚୁପି  ନିଷ୍ପତ୍ତି ନନେଲେ  ବିଗିଡି ଯାଇପାରେ ରାଜନୀତିର ସମୀକରଣ 

"ମା ମାନେ ଆଗେଇ ଆସନ୍ତୁ ଓ ଦାୟିତ୍ଵ ନିଅନ୍ତୁ | ମା ମାନଙ୍କ ଆଶୀର୍ବାଦ ରହିଲେ ପଚିଶ ବର୍ଷ କଣ, ପଚାଶ ବର୍ଷ କଣ , ବିଜୁ ଜନତା ଦଳ ଶହେବର୍ଷ ବି ସେବା କରିଚାଲିବ | ଶଙ୍ଖ ଚିହ୍ନ ସବୁବେଳେ ଓଡ଼ିଆ ସ୍ୱାଭିମାନର ଜୟ ନାଦ କରିଚାଲି ଥିବ |" ପୁରୀ ଠାରେ ଅନୁଷ୍ଠିତ ବିଜୁ ଜନତା ଦଳ ପ୍ରତିଷ୍ଠା ଦିବସର ସିଲଭର ଜୁବୁଲି ପାଳନ ଅବସରରେ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଏ କେଇ ପଦ କଥା ନିଶ୍ଚିତ ଭାବେ କର୍ମୀଙ୍କ ପାଇଁ ଉତ୍ସାହ ଭରିଦେଇଛି | ସେମାନଙ୍କ ଭିତରେ ଗୋଟାଏ ବିଶ୍ୱାସ ଜନ୍ମାଇବାର ଉଦ୍ୟମରେ ଦଳପତି ଅନେକ ମାତ୍ରାରେ ସଫଳ ହେଇଛନ୍ତି | ହେଲେ ୨୫ ବର୍ଷର ଏହି ପୁରୁଣା ଆଂଚଳିକ ଦଳରେ ତୃଣମୂଳ ବା ନିର୍ବାଚନମଣ୍ଡଳୀ ସ୍ତରରେ ବାସ୍ତବ ସ୍ଥିତି ସମ୍ପୂର୍ଣ୍ଣ ଭାବେ ସେଇଆ ନୁହେଁ ଯାହା ଯେ କୌଣସି ରାଜନୈତିକ ବ୍ୟକ୍ତିବିଶେଷ ସ୍ପଷ୍ଟ ଅନୁଭବ କରିପାରିବ | ପୁରୁଣା ମୁହଁ , ଥୋପା ହୋଇଥିବା ଅଯୋଗ୍ୟ ଜନତାପସାରୀ ବେପାରୀ ଚରିତ୍ରର ନେତା , ପରିବାର ବାଦ ଉପରେ ଲୋକଙ୍କ ବୀତସ୍ପୃହତା ଧୀରେ ଧୀରେ ବଢ଼ିବାରେ ଲାଗିଛି | ଆଣ୍ଟି ଇନକମ୍ବେନ୍ସି ଫ୍ୟାକ୍ଟର ବି ଧୀରେ ଧୀରେ ଦାନା ବାନ୍ଧୁଛି | ନେତୃତ୍ୱ ନେଉଥିବା ନେତାଙ୍କ ବୟସ ବଢିଛି , ଲୋକପ୍ରିୟତା କମୁଛି | ରାଜନୀତିରେ ପାହାଚ ଚଢ଼ିବାର ସ୍ଵପ୍ନ ଦେଖି ଦୀର୍ଘବର୍ଷ ହେଲା ଭାୟା ଛାତ୍ର,ଯୁବ ହେଇ ଦଳରେ କାର୍ଯ୍ୟ କରୁଥିବା ତଥା ଲୋକଙ୍କ ସୁଖ ଦୁଃଖ ସହ ସାମିଲ ଥିବା ଆଶାୟୀଙ୍କ ଆଶା ବି ବଢିଛି | ତେଣୁ ଦଳ ଭିତରେ ତୃଣମୂଳସ୍ତରରେ ସ୍ଥିତି ଯେତିକି ସହଜ ବୋଲି ଦେଖାଯାଉଛି ସେତିକି ନହୋଇପାରେ | ଆଶାୟୀଙ୍କ ଠିକଣା ପରିଚାଳନା ନହେଲେ ଦଳପାଇଁ ଅଡୁଆ ହୋଇପାରେ | ଲୋକପ୍ରିୟତା ହରାଇଥିବା ଅଗ୍ରହଣୀୟ , ଲୋକାପସାରୀ ନେତାମାନଙ୍କୁ ଦଳ ଗୁରୁତ୍ୱ ଦେଇ ଆଶାୟୀମାନଙ୍କୁ ନିରାଶ କଲେ ହୁଏତ ବିରୋଧୀ ମାନଙ୍କୁ ତାହା ସୁହାଇପାରେ | କାରଣ ପ୍ରାର୍ଥୀ ଚୟନ ବେଳେ ମୁଣ୍ଡ ଭିତରେ ରଖିବାକୁ ହେବ ଯେ , କେବଳ ନବୀନଙ୍କ ନାଁରେ ବା ଶଙ୍ଖ ଚିହ୍ନରେ ଭୋଟ ଜିତି ହେଇଯିବ ବୋଲି ଥିବା ଆତ୍ମବିଶ୍ଵାସରେ ବ୍ରେକ ଲଗେଇଦେଇଛି ଧାମନଗର ଫଳ | ଆଉ କେବଳ ମହିଳା ଚାହିଁଲେ ବିଜେଡି ୧୦୦ବର୍ଷ ଶାସନ କରିବେ ବୋଲି ସ୍ଲୋଗାନର କାର୍ଯ୍ୟକାରିତା ପାଇଁ ଧାନମନଗର ଫଳ ବି ପ୍ରଶ୍ନ ଚିହ୍ନ ତୋଳିପାରେ | ଯୋଗ୍ୟ ଆଉ ଗ୍ରହଣୀୟ ପ୍ରାର୍ଥୀ ନହେଲେ ତାହା ଲୋକଙ୍କୁ ନିରୁତ୍ସାହିତ କରିପାରେ ଓ ଭୋଟର ଅଗ୍ରହଣୀୟ ପ୍ରାର୍ଥୀଙ୍କ ଠାରୁ ମୁହଁ ଫେରାଇ ନେଇପାରନ୍ତି |

ଢେଙ୍କାନାଳ ( ସ୍ୱତନ୍ତ୍ର ପ୍ରତିନିଧି) : ଧାମନଗର ଓ ପଦ୍ମପୁର ଉପନିର୍ବାଚନପରେ ଓଡ଼ିଶାର ରାଜନୀତି ପାଣିପାଗରେ ଟିକେ ହଲଚଲ ଆରମ୍ଭ ହେଇଛି । ଧାମନଗରରେ ବିଜେପିର ବିଜୟ, ପଦ୍ମପୁରରେ ବିଜେଡିର ରେକର୍ଡ ବିଜୟ ଉଭୟ ଶିବିରକୁ ଚଳଚଂଚଳ କରିଛି । ବାଲେଶ୍ୱର ଆସନଟି ବିଜେପି ଠାରୁ ବିଜେଡି ଛଡେଇ ନେଇଥିବା ବେଳେ ଧାମନଗରଟିକୁ ନିଜ ହାତରେ ରଖିବାକୁ ସକ୍ଷମ ହୋଇଥିବା ଯୋଗୁ ବିଜେପି ଉତ୍ସାହିତ ଥିବା ବେଳେ ରାଜୁ ଦାସଙ୍କ ଖୋଲା ବିଦ୍ରୋହ ବିଜେଡି ଭିତରେ ଭିନ୍ନ ଏକ ତରଙ୍ଗ ସୃଷ୍ଟି କରିଛି । ଦଳ ଭିତରେ ଦୀର୍ଘଦିନ ଧରି ପଡି ରହି ଦଳପାଇଁ କାମ କରିଚାଲିଥିବା ଆଶାୟୀ ଯୁବ ନେତା ଓ ଅବହେଳିତ ନେତାମାନଙ୍କ ପାଇଁ ଭିନ୍ନ ଏକ ଦିଗବଳୟର ଆଭାସ ସୃଷ୍ଟି କରିଛି । ଆଉ ଯାହାକୁ ବି ଠିଆ କରିଦେଲେ ନବିନ ବାବୁ ଓ ଶଙ୍ଖ ଚିହ୍ନରେ ସେ ଜିତିଆସିବ ବୋଲି ବିଜେଡି ଭିତରେ ଥିବା ଆତ୍ମବିଶ୍ବାସre ସାମାନ୍ୟ ଶଙ୍କା ସୃଷ୍ଟି କରିଛି । ଯୋଗ୍ୟ ଓ ଲୋକଙ୍କ ଦ୍ୱାରା ଗ୍ରହଣୀୟ ବ୍ୟକ୍ତିକୁ ପ୍ରାର୍ଥୀ ନକଲେ ଲୋକ ହରେଇ ଦେବେ, ଏ ଆଶଙ୍କା ବିଜେଡି ଭିତରେ ମଧ୍ୟ ଉଦ୍ରେକ ହୋଇଛି । ନିଃସନ୍ଦେହ ପଦ୍ମପୁରରେ ବିଜେଡିର ଅଭୂତପୂର୍ବ ବିଜୟ ଦଳକୁ ଉତ୍ସାହିତ କରିଛି | ହେଲେ ଧାମନଗରର ଅସଫଳତା ନିଶ୍ଚିତ ଭାବେ ଡେମୋକ୍ଲିସର ଖଣ୍ଡା ଭଳି ଲଟକିବା ସ୍ୱାଭାବିକ | ଉପନିର୍ବାଚନରେ ମାଳମାଳ ନେତା ରହି ବି ଧାମନଗରରେ ଜଣେ ମହିଳା ପ୍ରାର୍ଥୀଙ୍କୁ ଲୋକଙ୍କ ଦ୍ୱାରା ଗ୍ରହଣୀୟ କରାଇପାରିଲେନି ଯେତେବେଳେ, ସାଧାରଣ ନିର୍ବାଚନରେ ଲୋକଙ୍କ ଅଗ୍ରହଣୀୟ, ଲୋକପ୍ରିୟତା ହରାଇଥିବା ବ୍ୟକ୍ତିଙ୍କୁ ପ୍ରାର୍ଥୀ କରାଇଲେ କେତେକ ଆସନରେ ପ୍ରତିକୂଳ ପରିସ୍ଥିତି ସୃଷ୍ଟି ହୋଇପାରେ । ବିଜେଡି 2024 ପାଇଁ କସରତ ଆରମ୍ଭ କରିଥିବା ବେଳେ ବିଜେପି ମଧ୍ୟ ଧାମନଗର ଓ ପଦ୍ମପୁରର ପୋଷ୍ଟମର୍ଟମ କରିବା ଆରମ୍ଭ କରି 2024 ପାଇଁ ବଳ ଗୋଟାଇବାକୁ ଯୋଜନା ଆରମ୍ଭ କରିଛି ।
ଏବେ ଅତ୍ୟନ୍ତ ରୋଚକ ସ୍ଥିତିରେ ରହିଛି ଆଉ ଗୁରୁତ୍ୱପୂର୍ଣ୍ଣ ହୋଇପଡୁଛି ଢେଙ୍କାନାଳ ରାଜନୀତି ।କାରଣ 2024ରେ ସେଠୁ ନିଜ ଭାଗ୍ୟ ପରୀକ୍ଷା କରିବାକୁ ଯାଉଛନ୍ତି ରାଜ୍ୟ ବିଜେପି ରାଜନୀତିର ଗୋପନ ମଙ୍ଗୁଆଳ ତଥା କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଆଉ ସେଥିପାଇଁ ଧର୍ମେନ୍ଦ୍ର ତାଙ୍କ ଦଳବଳ କଳ ଓ ଅର୍ଥବଳ ଲଗାଇଦେଇଛନ୍ତି ଢେଙ୍କାନାଳରେ ତାଙ୍କ ସ୍ଥିତି ସୁଧାରିବା ପାଇଁ । ବିଜେଡି ଓ କଂଗ୍ରେସର ଆଶାୟୀ, ପୋଟେନସିଆଲ ନେତା ତଥା ସମ୍ଭାବ୍ୟ ଅସନ୍ତୁଷ୍ଟଙ୍କ ଉପରେ ରଖିଛନ୍ତି ନଜର । ଖେପା ଧରି ବିଜେପି ବାଳିଆ ମାରିବାକୁ ସଜବାଜ ହେଉଥିବା ବେଳେ ସେଠି ବିଜେଡିର ବର୍ତ୍ତମାନ ନେତୃତ୍ୱ ନେଉଥିବା ନେତା ବ୍ୟାକ ଫୁଟରେ ରହିଲା ଭଳି ଅନୁଭୁତ ହେଉଛି । ଧର୍ମେଦ୍ର ଲଢ଼ିବାକୁ ପ୍ରସ୍ତୁତ ହେଉଛନ୍ତି ବୋଲି ଜାଣିବା ପରେ ଅଧିକ କ୍ରିୟାଶୀଳ ହେବା ପରିବର୍ତ୍ତେ ସାଂସଦ ମହେଶ ସାହୁ ଏବେ ଝାଉଁଳି ଗଲାପରି ବା ନିର୍ବାଚନମଣ୍ଡଳୀରେ ଆଗ୍ରହ ନଥିବା ପରି ଲାଗୁଛନ୍ତି |
ସାଂସଦଙ୍କ କଥା ତ ଏମିତି । ବିଧାନସଭା ନିର୍ବାଚନମଣ୍ଡଳୀ ସ୍ତରରେ ବି ସ୍ଥିତି ବିଜେଡି ପାଇଁ ବି ନିରଂକୁଶ ବା ସୁଗମ ନୁହେ । ସାଂସଦଙ୍କ ସହ ବିଧାୟକମାନଙ୍କ ତାଳମେଳ ନାହିଁ । ବିଧାୟକମାନେ ବି ବିଭିନ୍ନ କାରଣରୁ ନିଜ ନିର୍ବାଚନମଣ୍ଡଳୀରେ ଲୋକପ୍ରିୟତା ହରାଇଛନ୍ତି । ନିର୍ବାଚନମଣ୍ଡଳୀ ଭିତରେ ବି ଅନେକ ଯୁବନେତା ବି ଲୋକଙ୍କ ପାଇଁ କାମ କରି, ଦଳୀୟ ସଂଗଠନ କରି ଲୋକଙ୍କ ସୁଖଦୁଃଖରେ ଠିଆ ହୋଇ ଲୋକଙ୍କ ଭିତରେ ଗ୍ରହଣୀୟ ବି ହେଲେଣି । ଆଶାୟୀ ହେବା ବି ସ୍ୱାଭାବିକ | ଲୋକ ବି ପୁରୁଣା ମୁହଁ ବଦଳରେ ନୂଆ ମୁହଁ ଖୋଜିବା ଆରମ୍ଭ କଲେଣି । କେଉଁଥି ବିଧାୟକଙ୍କୁ ମଧ୍ୟ ତାଙ୍କ କାର୍ଯ୍ୟ ଶୈଳୀ ପାଇଁ ଲୋକ ପସନ୍ଦ ବି କରୁନାହାନ୍ତି । ତେଣୁ ନିର୍ବାଚନମଣ୍ଡଳୀ ଭିତରେ ଲୋକଙ୍କ ଭିତରେ ଓ କର୍ମୀ ନେତାଙ୍କ ଭିତରେ ଅସନ୍ତୋଷ ରହିଛି ବିଜେଡି ଭିତରେ ବିଭିନ୍ନ ବିଭିନ୍ନ କାରଣରୁ ।
ଢେଙ୍କାନାଳ ଜିଲ୍ଲା କଥା ବିଚାରକୁ ନିଆଯାଉ । ଢେଙ୍କାନାଳର 4ଟି ନିର୍ବାଚନମଣ୍ଡଳୀ ମଧ୍ୟରୁ ଢେଙ୍କାନାଳ ନିର୍ବାଚନ ମଣ୍ଡଳୀରେ ପ୍ରାୟତଃ ବିଧାୟକ ବା ପ୍ରାର୍ଥୀ ରିପିଟ ହେବାର ନଜିର ନାହିଁ । ସେଠି ଏମିତି ବି ବିଧାୟକ ଥିବା ନିଧି ସାମଲଙ୍କ ପ୍ରତି ଭୋଟର ଓ କର୍ମୀଙ୍କ ଉତ୍ସାହ ହ୍ରାସ ପାଇଥିବା ଜଣାପଡିଛି । ନିଜ ବ୍ୟବସାୟକୁ ପ୍ରାଥମିକତା ଦେଉଥିବା ଶ୍ରୀ ସାମଲ ଦଳର କିଛି ନିର୍ଣ୍ଣାୟକ ନେତାଙ୍କ ଆଶୀର୍ବାଦରେ ଦବଦବା ଦେଖାଉଥିବା ବେଳେ ଏବେ ଅର୍ଚନା ନାଗ ବେପାରରେ ତାଙ୍କ ସମ୍ପୃକ୍ତି ତାଙ୍କୁ ଅଡୁଆରେ ପକାଇଛି । କୀଚକ ବହୁବଳେ ବିରାଟ ରାଜା ପରି ବିଜେଡ଼ିରେ କିଛି ତୁଙ୍ଗ ନେତାଙ୍କ ପ୍ରୋତ୍ସାହନରେ ତାଙ୍କ ପତିଆରା । ଲୋକଙ୍କ ଭିତରେ ତାଙ୍କର ତାଙ୍କର ଗ୍ରହଣୀୟତା ଯାହା ରହିଛି ତାହା ଶଙ୍ଖ ଚିହ୍ନ ଓ ନବୀନ ବାବୁଙ୍କ ନାଁ ରେ । ରାଜନୈତିକ ପତିଆରାରେ କେବଳ ନିଜ ବ୍ୟବସାୟକୁ ସୁରକ୍ଷା ଦେବା ଓ ବ୍ୟବସାୟ ବୃଦ୍ଧି କରିବାରେ ସେ ବ୍ୟସ୍ତ । ନିର୍ବାଚନମଣ୍ଡଳୀରେ ଅନେକ ଆଶାୟୀ ମଧ୍ୟ ସକ୍ରିୟ ରହିଥିବା ବେଳେ ସେମାନଙ୍କ ସଂଗଠନ ମଜଭୁତ କରିଚାଲିଛନ୍ତି ।
ତାପରେ ହିନ୍ଦୋଳ ନିର୍ବାଚନମଣ୍ଡଳୀରେ ମଧ୍ୟ ଅବସ୍ଥା ତଦ୍ରୁପ । ଦୁଇଦୁଇଥରର ବିଧାୟିକା ସୀମା ନାୟକଙ୍କ ପ୍ରତି ଲୋକଙ୍କ ବିତସ୍ପୃହତା ବୃଦ୍ଧି ପାଇବାରେ ଲାଗିଛି । ଦଳର କର୍ମୀମାନେ ମଧ୍ୟ ତାଙ୍କ ତାଙ୍କର କାର୍ଯ୍ୟଧାରାକୁ ନେଇ ସନ୍ତୁଷ୍ଟ ନଥିବା ଚର୍ଚ୍ଚା ହେଉଛି । ତାଙ୍କ ପାଇଁ କେବଳ ଶଙ୍ଖ ଚିହ୍ନ ଓ ନବୀନ ବାବୁଙ୍କ ନାଁ ହିଁ ଭରସା । ଅପରପକ୍ଷରେ ନିର୍ବାଚନମଣ୍ଡଳୀରେ ଦୀର୍ଘଦିନ ଧରି ଦଳର ସାଂଗଠନିକ କାର୍ଯ୍ୟ ସହ ଜଡିତ ହୋଇଥିବା ନେତା ବି 2024ରେ ଟିକଟ ପାଇଁ ଆଶାବାନ୍ଧି ବସିଛନ୍ତି । ୧୦୦ ବର୍ଷ କଥା କହୁଥିବା ନବୀନ ବାବୁ ବା ବିଜେଡି ନିଶ୍ଚିତ ଭାବେ ସଙ୍ଗଠନକୁ କ୍ରିୟାଶୀଳ କଲାଭଳି ନେତାଙ୍କୁ ଗୁରୁତ୍ୱ ଦେଇପାରନ୍ତି |
ତାପରେ ଆସିବା ଅନ୍ୟତମ ନିର୍ବାଚନ ମଣ୍ଡଳୀ କାମାକ୍ଷାନଗର କୁ । କାମାକ୍ଷା ନଗରର ପ୍ରତିନିଧିତ୍ଵ କରୁଛନ୍ତି ଖଣି ଇସ୍ପାତ ଓ ପୂର୍ତ୍ତ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ । 2004 ମସିହାରୁ ଲଗାତାର ଭାବେ ସେ ଏହି ନିର୍ବାଚନମଣ୍ଡଳୀର ପ୍ରତିନିଧିତ୍ଵ କରୁଥିବା ବେଳେ ରାଜ୍ୟସରକାରଙ୍କ ଗୁରୁତ୍ୱପୂର୍ଣ୍ଣ ମନ୍ତ୍ରୀ ପଦରେ ରହି ବି ନିର୍ବାଚନ ମଣ୍ଡଳୀର ଆଶାନୁରୂପ ବା ଆଖିଦୃଶିଆ ବିକାଶ ହୋଇପାରିନାହି । ତାଙ୍କ ପାଇଁ ନବୀନ ବାବୁ ଓ ଶଙ୍ଖ ଚିହ୍ନ ଏକମାତ୍ର ଭରସା । ଅପରପକ୍ଷରେ ଲୋକଙ୍କ ଭିତରେ ତାଙ୍କର ଗ୍ରହଣୀୟତା ହ୍ରାସ ପାଇବାରେ ଲାଗିଛି । ଶ୍ରୀ ମଲ୍ଲିକ ଲଗାତାର ଚାରିଚାରି ଥର ବିଧାୟକ ହୋଇଥିବା ବେଳେ ଲୋକମାନେ ବି ନୂଆ ମୁହଁ ସପକ୍ଷରେ । ଶ୍ରୀ ମଲ୍ଲିକ ଏଥର ବୟସ ଦୃଷ୍ଟିରୁ ଟିକଟ ପାଇବା ଆଶା କ୍ଷୀଣ ଥିବା ଜାଣି ତାଙ୍କ ପରିବାର ଭିତରୁ କାହାକୁ ଖେପି ଦେଇପାରନ୍ତି ବୋଲି କର୍ମୀଙ୍କ ମହଲରେ ଚର୍ଚା ହେଉଛି । ଅପରପକ୍ଷରେ ନିର୍ବାଚନମଣ୍ଡଳୀରେ କିଛି ପୋଟେନସିଆଲ ଆଶାୟୀ ସଂଗଠନ କାର୍ଯ୍ୟରେ ନିଜକୁ ନିୟୋଜିତ କରିଥିବା ବେଳେ ଲୋକଙ୍କ ସୁଖ ଦ୍ୱଖରେ ସାମିଲ ରହି ସେମାନଙ୍କ ଗ୍ରହଣୀୟତା ବୃଦ୍ଧି କରିବାରେ ଲାଗିଛନ୍ତି । ତେଣୁ ସେମାନେ ମଧ୍ୟ ଟିକଟ ପାଇଁ ଦଳର ସୁପ୍ରିମୋଙ୍କ ଆଶୀର୍ବାଦ ଓ ନିଷ୍ପତ୍ତିକୁ ଅପେକ୍ଷା କରି ରହିଛନ୍ତି ।
ଏହାପରେ ଆଉ ଏକ ନିର୍ବାଚନମଣ୍ଡଳୀ ହେଉଛି ପରଜଙ୍ଗ । ସେଠାରୁ ପ୍ରତିନିଧିତ୍ଵ କରୁଛନ୍ତି ବିଜୁ ଜନତା ଦଳରୁ ପୂର୍ବତନ ମନ୍ତ୍ରୀ ଡ଼ ନୃସିଂହ ସାହୁ । ସେ 2009 ରୁ ବିଜେଡି ଟିକଟରେ ଜିତି ଆସୁଛନ୍ତି । ଯଦିଓ ଅନ୍ୟ ବିଧାୟକଙ୍କ ପରି ସେ ଲୋକାପ୍ରିୟତା ଓ ଗ୍ରହନୀୟତା ଏତେ ମାତ୍ରାରେ ହରାଇନାହାନ୍ତି, ତଥାପି ବୟସାଧିକ୍ୟ କାରଣରୁ ସେଠାରେ ତାଙ୍କ ସ୍ଥାନରେ ନୂଆ ପ୍ରାର୍ଥୀ ଅବଶ୍ୟମ୍ବାବି ହୋଇପଡିଛନ୍ତି । ପରଜଙ୍ଗ ନିର୍ବାଚନମଣ୍ଡକିରେ ଶ୍ରୀ ସାହୁ ନିଜ ପରିବାରରୁ କାହାକୁ ଟିକଟ ଦେବା ପାଇଁ ଚାହିଁଲେ ସେଠାରେ ଆଶାୟୀ ଥିବା କିଛି ଉଦ୍ଦେୟମାନ ଯୁବ ନେତା ଅସନ୍ତୁଷ୍ଟ ହୋଇପାରନ୍ତି ।
ଅପରପକ୍ଷରେ ବିଧାୟକ ଓ ସାଂସଦଙ୍କ ମଧ୍ୟରେ ଆଦୌ ତାଳମେଳ ନାହିଁ । ତେଣୁ ଲୋକଙ୍କ ମତକୁ ଗୁରୁତ୍ବଦେଇ ସେଠାରେ ଉଚିତ ତାଳମେଳ ଥିବା ଯୋଗ୍ୟ ସାଂସଦ ପ୍ରାର୍ଥୀ ଓ ବିଧାୟକ ପ୍ରାର୍ଥୀ ନଦେଲେ ବିଜେଡି ପାଇଁ ଅସୁବିଧା ସୃଷ୍ଟି କରିପାରେ । ପୂର୍ବରୁ ତାହା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ରଙ୍କ ଜିଲ୍ଲା ବୋଲି ଯେତିକି ଗୁରୁତ୍ୱ ନଥିଲା, ଏଥର 2024ରେ ତାହା କେନ୍ଦ୍ରମନ୍ତ୍ରୀଙ୍କ ନିର୍ବାଚନମଣ୍ଡଳୀ ହେବାକୁ ଯାଉଥିବାରୁ ତାହା ବେଶ ଗୁରୁତ୍ୱ ବହନ କରୁଛି । ନିଜ ସପକ୍ଷରେ ଲୋକସଭା ଆସନଟିକୁ ନେବା ପାଇଁ ଧର୍ମେଦ୍ର ଯେ କୌଣସି ସ୍ତରକୁ ଯାଇପାରନ୍ତି ଓ ନିଜର ସମସ୍ତ କଳ ବଳ କୌଶଳ ପ୍ରୟୋଗ କରିପାରନ୍ତି । ଆବଶ୍ୟକ ସ୍ଥଳେ ତାହା ଦେଶର ସର୍ବାଧିକ ବ୍ୟୟବହୁଳ ନିର୍ବାଚନ ମଣ୍ଡଳୀ ବି ହୋଇ ଯାଇପାରେ | ଜିଲ୍ଲାର ଚାରି ବିଧାନସଭା ନିର୍ବାଚନମଣ୍ଡଳୀରେ ଶାସକ ଦଳର ପୋଟେନସିଆଲ ନେତାମାନଙ୍କ ଉପରେ ବି ଧର୍ମେନ୍ଦ୍ର ନଜର ରଖିଛନ୍ତି ଓ ଯୋଗାଯୋଗ ସ୍ଥାପନ କରିବାକୁ ନିଜ ଟିମକୁ ନିୟୋଜିତ କରିଛନ୍ତି । କିଛି ଦିନ ତଳେ  ବିଜେଡି ପରିତ୍ୟାଗ କରିଥିବା ପୂର୍ବତନ ବିଜେଡି ସାଂସଦ ତଥାଗତ ସତପଥି ମଧ୍ୟ ପରୋକ୍ଷରେ ପ୍ରାର୍ଥୀ ହେଇପାରନ୍ତି ବୋଲି ଇଙ୍ଗିତ ଦେଇଛନ୍ତି ।  ଅପରପକ୍ଷରେ ଓଡିଶା ରାଜନୀତିରେ 2024ରେ କିଛି ଗୋଟେ ନୂଆ ସମିକରଣ ହେବାର ସମ୍ଭାବନା ଶୁଣାଯାଉଥିବା ବେଳେ ସେ ସବୁକୁ ଦୃଷ୍ଟିରେ ରଖି  ଆସନ୍ତା ସାଧାରଣ ନିର୍ବାଚନ ରେ ଏହି ହାଇ ପ୍ରୋଫାଇଲ ଲୋକସଭା ନିର୍ବାଚନ  ନିର୍ବାଚନମଣ୍ଡଳୀ ଅନ୍ତର୍ଗତ ବିଧାନସଭା ନିର୍ବାଚନମଣ୍ଡଳୀରେ ବିଜେଡି ଯଦି ଲୋକମତକୁ ସମ୍ମାନ ଦେଇ ଠିକଣା ଚାଲ ନଖେଳେ ତେବେ ଗୋଳିଆ ପାଣିରୁ ଧର୍ମେନ୍ଦ୍ର ବାଳିଆ ମାରିନେବାର ସମ୍ଭାବନାକୁ ଏଡାଇଦିଆଯାଇନପାରେ ।