•  ମୁଖ୍ୟମନ୍ତ୍ରୀଙ୍କ ରାଲିରେ ଲୋକଙ୍କ ଜୋସ୍ ଦେଖି କେନ୍ଦ୍ରମନ୍ତ୍ରୀ ବିଚଳିତ ଓ ଭୟଭୀତ ହୋଇ ପଡ଼ିଛନ୍ତି ।

•  ଜଣେ ବାପଛେଉଣ୍ଡ ଆଦିବାସୀ ଝିଅକୁ ବିଜେପି ନେତା ଲଞ୍ଛନା ଦେଲାବେଳେ କେନ୍ଦ୍ରମନ୍ତ୍ରୀ ନିରବ କାହିଁକି ?

•  ଜିଏସ୍ଟି କାଉନସିଲ ବୈଠକରେ କେନ୍ଦୁପତ୍ର ଉପରେ ୧୮% ଜିଏସ୍ଟି ପ୍ରସ୍ତାବକୁ ଓଡ଼ିଶାର ଅର୍ଥମନ୍ତ୍ରୀ ବିରୋଧ କରିଥିଲେ ।

•  ରେଳ ମନ୍ତ୍ରଣାଳୟ ଓଡ଼ିଶାରୁ ୩୦ ହଜାର କୋଟି ଟଙ୍କାର ରାଜସ୍ୱ ନ ନେଲେ ନିଜ ଖର୍ଚ୍ଚରେ ସବୁ ରେଳଲାଇନ ନିର୍ମାଣ କରିବୁ ।

•  ନିଜ ବିଭାଗରେ ଥିବା ଚୁକ୍ତିଭିତ୍ତିକ କର୍ମଚାରୀଙ୍କୁ ଏଯାଏ ନିୟମିତ କରିଛନ୍ତି କି କେନ୍ଦ୍ରମନ୍ତ୍ରୀ ?

•  ପଦ୍ମପୁର ଜିଲ୍ଲା ଓ ପାଇକମାଳ ଏନ୍ଏସି ଗଠନ ପାଇଁ ମୁଖ୍ୟମନ୍ତ୍ରୀଙ୍କ ନିଷ୍ପତ୍ତିକୁ କାହିଁକି ସ୍ୱାଗତ କରୁନାହାନ୍ତି କେନ୍ଦ୍ରମନ୍ତ୍ରୀ ?

ଭୁବନେଶ୍ୱର: ମୁଖ୍ୟମନ୍ତ୍ରୀ ହେଉଛନ୍ତି ଓଡ଼ିଶାର ସବୁଠାରୁ ଲୋକପ୍ରିୟ ସର୍ବମାନ୍ୟ ନେତା । ତେଣୁ ଓଡ଼ିଶାର ଜନସାଧାରଣ ତାଙ୍କ ବିରୋଧରେ କୌଣସି ଅସମ୍ମାନସୂଚକ ଆକ୍ରମଣକୁ ପସନ୍ଦ କରିବେ ନାହିଁ କି ବରଦାସ୍ତ କରିବେ ନାହିଁ । ୨୦୧୮ ମସିହା ବିଜେପୁର ଉପନିର୍ବାଚନ ସମୟରେ ଯେତେବେଳେ ଜଣେ ବିଜେପି କର୍ମୀ ମାନ୍ୟବର ମୁଖ୍ୟମନ୍ତ୍ରୀଙ୍କ ଉପରକୁ ଚପଲ ଫିଙ୍ଗିଥିଲା, ବିଜେପୁରବାସୀ ଏହାକୁ ପସନ୍ଦ କରି ନଥିଲେ । ଏହି ଉପନିର୍ବାଚନରେ ବିଜେଡି ବିପୁଳ ବ୍ୟବଧାନରେ ବିଜୟୀ ହୋଇଥିଲା । ମାତ୍ର ଏଥିରୁ ଶିକ୍ଷାଲାଭ ନକରି ପଦ୍ମପୁରରେ ନିର୍ବାଚନ ପ୍ରଚାର ସମୟରେ ଆଜି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟମନ୍ତ୍ରୀଙ୍କ ବିରୋଧରେ ଅପଶବ୍ଦ ପ୍ରୟୋଗ କରିଛନ୍ତି । ପଦ୍ମପୁରବାସୀ କେବେ ବି ଏହାକୁ ବରଦାସ୍ତ କରିବେନି ଏବଂ ଏହାର ଉଚିତ ଜବାବ ଦେବେ । ତେଣୁ ଆପଣ ମୁଖ୍ୟମନ୍ତ୍ରୀଙ୍କ ସଂପର୍କରେ ଯେତେବେଳେ ବି କିଛି କହୁଛନ୍ତି, ଦୟାକରି ସୌଜନ୍ୟ ଓ ଶାଳୀନତା ରକ୍ଷା କରନ୍ତୁ ବୋଲି ବିଜେଡି ସାଂସଦ ଡ. ସସ୍ମିତ ପାତ୍ର ଶ୍ରୀ ପ୍ରଧାନଙ୍କୁ ସତର୍କ କରି ଦେଇଛନ୍ତି ।
ପଦ୍ମପୁର ଠାରେ କେନ୍ଦ୍ରମନ୍ତ୍ରୀ ଦେଇଥିବା ବିଭ୍ରାନ୍ତିକର ବୟାନର ଜବାବ ଦେଇ ଡ. ପାତ୍ର କହିଛନ୍ତି ଯେ ଗତକାଲି ପଦ୍ମପୁରରେ ମାନ୍ୟବର ମୁଖ୍ୟମନ୍ତ୍ରୀ ବିଶାଳ ରାଲିରେ ଲୋକଙ୍କ ଉତ୍ସାହ ଓ ଜୋସ୍ ଦେଖି ଆପଣ ବିଚଳିତ ଓ ଭୟଭୀତ ହୋଇ ପଡ଼ିଥିବା ଜଣାପଡ଼ୁଛି। ଆପଣ ଭଲଭାବେ ଆଭାସ ପାଇ ସାରିଲେଣି ଯେ ପଦ୍ମପୁରରେ ବିଜେପି ଏକ ବଡ଼ ପରାଜୟ ଆଡ଼କୁ ମୁହାଁଉଛି । ତେଣୁ ଏହି ବାସ୍ତବତାକୁ ଦୟାକରି ସ୍ୱୀକାର କରି ନିଅନ୍ତୁ ।
ଡ. ପାତ୍ର ଆହୁରି କହିଛନ୍ତି, ବିଜେପି ଦଳର ନେତାମାନେ ସଭାସମିତିରେ ପ୍ରକାଶ୍ୟରେ ପଦ୍ମପୁର ଉପନିର୍ବାଚନରେ ବିଜୁ ଜନତା ଦଳର ପ୍ରାର୍ଥିନୀ ସଦ୍ୟ ବାପଛେଉଣ୍ଡ ହୋଇଥିବା ଜଣେ ଓଡ଼ିଆ, ଆଦିବାସୀ ଝିଅକୁ ଅଶାଳୀନ, ଅରୁଚିକର ଓ ଅପମାନସୂଚକ ମନ୍ତବ୍ୟ ଦେଇ ଲାଞ୍ଛନା ଦେଇ ଆସୁଛନ୍ତି । ବିଜେପି ନେତାମାନେ ରାଜନୀତି ଛାଡ଼ି ଦେବା ଉଚିତ ଏବଂ ପ୍ରଥମେ ରାଜନୈତିକ ଦଳ ନିର୍ବିଶେଷରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ଜଣେ ଓଡ଼ିଆ ଆଦିବାସୀ ମହିଳାଙ୍କୁ କେମିତି ସମ୍ମାନ ଦିଆଯାଏ ତାହା ଶିକ୍ଷା କରିବା ଆବଶ୍ୟକ । ଜଣେ ନାରୀ ଏବଂ ତାଙ୍କ ନାରୀତ୍ୱକୁ ଲାଞ୍ଛନା ଓ ଅପମାନ ଦେଉଥିବା ଆପଣଙ୍କ ଦଳର ନେତାମାନଙ୍କୁ ଆପଣ ଏଥିରୁ ନିବୃତ୍ତ କରି ପାରୁନାହାନ୍ତି । ଏ ସଂପର୍କରେ ଆପଣ ପଦଟିଏ ବି କହୁନାହାନ୍ତି । ଆମ ସମସ୍ତଙ୍କର ବି ଝିଅ ଓ ଭଉଣୀ ଅଛନ୍ତି । ଆମେ ସଭାସମିତିରେ ସେମାନଙ୍କୁ ଏଭଳି ଅପମାନିତ ଓ ଲାଞ୍ଛିତ ହେବାକୁ ଛାଡ଼ିଦେଇ ପାରିବା କି ? ଏ ସଂପର୍କରେ ଆପଣ ନିରବ କାହିଁକି ?
ଶ୍ରୀ ପ୍ରଧାନଙ୍କୁ ଆହ୍ବାନ ଦେଇ ଡ.ପାତ୍ର କହିଛନ୍ତି ଯେ ଜିଏସ୍ଟି କାଉନସିଲ ବୈଠକରେ ଓଡ଼ିଶାର ଅର୍ଥମନ୍ତ୍ରୀ କେନ୍ଦୁପତ୍ର ଉପରେ ୧୮% ଜିଏସ୍ଟି ଲାଗୁ କରିବା ପ୍ରସ୍ତାବକୁ ବାରମ୍ବାର ବିରୋଧ କରିଥିଲେ । ଆମର ମାନ୍ୟବର ମୁଖ୍ୟମନ୍ତ୍ରୀ ମଧ୍ୟ କେନ୍ଦ୍ରକୁ ଚିଠି ଲେଖି କେନ୍ଦୁପତ୍ର ଉପରୁ ୧୮% ଜିଏସ୍ଟିକୁ ବିରୋଧ କରିଥିଲେ । ଆପଣ ଜଣେ କେନ୍ଦ୍ରମନ୍ତ୍ରୀ । ଆପଣଙ୍କ ବିଧାୟକ ପ୍ରାର୍ଥୀ ନିଜକୁ କେନ୍ଦୁପତ୍ର ତୋଳାଳିଙ୍କ ନେତା ବୋଲି କହୁଛନ୍ତି । ମାତ୍ର ଆପଣ କିମ୍ବା ଆପଣଙ୍କ ବିଧାୟକ ପ୍ରାର୍ଥୀ କେବେ କେନ୍ଦ୍ର ଅର୍ଥମନ୍ତ୍ରୀଙ୍କୁ ଭେଟି କେନ୍ଦୁପତ୍ର ଉପରୁ ୧୮% ଜିଏସ୍ଟି ପ୍ରତ୍ୟାହାର ପାଇଁ ଦାବି କରିଛନ୍ତି କି? ଆପଣ ପଦ୍ମପୁରବାସୀଙ୍କୁ କାହିଁକି ଏଭଳି ମିଛ କହି ଭୁଆଁ ବୁଲାଉଛନ୍ତି?
ସେହିପରି ଡ.ପାତ୍ର ରେଳ ମନ୍ତ୍ରଣାଳୟ ଓଡ଼ିଶାରେ ଅଛି ନା କେନ୍ଦ୍ରରେ ଅଛି ବୋଲି କେନ୍ଦ୍ରମନ୍ତ୍ରୀଙ୍କୁ ପ୍ରଶ୍ନ କରିଛନ୍ତି । ମୁଁ ଭାବୁଛି ଆପଣ ଏହାକୁ ନେଇ ଦ୍ୱନ୍ଦ୍ୱରେ ଅଛନ୍ତି । ନୂଆ ରେଳଲାଇନ କେଉଁଠି ନିର୍ମାଣ ହେବ, ସେ ଦାୟିତ୍ୱ କେନ୍ଦ୍ରରେ ଥିବା ରେଳ ମନ୍ତ୍ରଣାଳୟର। ତଥାପି ପଦ୍ମପୁର ରେଳଲାଇନ ପାଇଁ ଆଗଭର ହୋଇ ଓଡ଼ିଶା ସରକାର ୩୦୦ କୋଟି ଟଙ୍କା ଏବଂ ମାଗଣ।ରେ ଜମି ଯୋଗାଇ ଦେବାକୁ ପ୍ରସ୍ତାବ ଦେଇଥିଲେ । ଏହା ପ୍ରତିପାଦିତ କରୁଛି ଯେ ଓଡ଼ିଶାବାସୀଙ୍କ ପ୍ରତି ଓଡ଼ିଶା ସରକାରଙ୍କ କେତେ ପ୍ରତିବଦ୍ଧତା ରହିଛି । ଯଦି ଆପଣ ଚାହୁଛନ୍ତି ଯେ ଓଡ଼ିଶାରେ ରାଜ୍ୟ ସରକାର ନିଜସ୍ୱ ଉଦ୍ୟମରେ ରେଳଲାଇନ ନିର୍ମାଣ କରନ୍ତୁ, ତେବେ ଆପଣ ରେଳ ମନ୍ତ୍ରଣାଳୟ ଓଡ଼ିଶାରୁ ୩୦ ହଜାର କୋଟି ଟଙ୍କାର ରାଜସ୍ୱ ନ ନେଉ । ଆମେ ଏହି ଅର୍ଥ ନିଜ ପାଖରେ ରଖି ନିଜ ପାଇଁ ଅନେକ ରେଳପଥ ନିର୍ମାଣ କରିପାରିବୁ । ଆପଣଙ୍କୁ ଆଦୌ ବିରକ୍ତ କରିବୁ ନାହିଁ।
ନୂତନ ପଦ୍ମପୁର ଜିଲ୍ଲା ଗଠନ ଏବଂ ପାଇକମାଳରେ ଏନ୍ଏସି ଗଠନ ପାଇଁ ମୁଖ୍ୟମନ୍ତ୍ରୀ ଯେଉଁ ବଡ଼ ନିଷ୍ପତ୍ତି ନେଇଛନ୍ତି, ଆପଣ ଏହାକୁ ସ୍ୱ।ଗତ କରିବା କଥା । ପଦ୍ମପୁରବାସୀ ଓ ପାଇକମାଳବାସୀଙ୍କ କଲ୍ୟାଣ ଓ ବିକାଶ ଲାଗି ମାନ୍ୟବର ମୁଖ୍ୟମନ୍ତ୍ରୀଙ୍କ ଏହି ଘୋଷଣା ପ୍ରତି ଆପଣଙ୍କର ସର୍ବନିମ୍ନ ସୌଜନ୍ୟ ଓ ସମ୍ମାନ ରହିବା ଆବଶ୍ୟକ । ମାତ୍ର ଆପଣ ଏହାକୁ ମଧ୍ୟ ଅପମାନିତ କରିଛନ୍ତି । ଏହା ଆପଣଙ୍କ ହୀନ ରାଜନୈତିକ ଉଦ୍ଦେଶ୍ୟକୁ ଦର୍ଶାଉଛି ।
ଶ୍ରୀ ପ୍ରଧାନଙ୍କୁ ଜବାବ ଦେଇ ଡ. ପାତ୍ର କହିଛନ୍ତି, ଆପଣଙ୍କ ବୟାନରୁ ଜଣାପଡ଼ୁଛି ଯେ ୨୦୧୯ ପରେ ଆପଣ କେବେ ବିଜେପୁର ଯାଇ ନାହାନ୍ତି । ଯଦି ଆପଣ ବିଜେପୁର ଯାଇଥାନ୍ତେ, ତାହେଲେ ଆପଣ ବିଜେପୁରରେ ହୋଇଥିବା ବିପୁଳ ବିକାଶର ଚିତ୍ର ଦେଖି ଜାଣି ପାରିଥାନ୍ତେ । ଜଣେ କେନ୍ଦ୍ରମନ୍ତ୍ରୀ ଭାବେ ଆମେ ୨୦୨୩ ଡିସେମ୍ବର ମାସରେ ବିଜେପୁରରେ ହେବାକୁ ଥିବା ଗଙ୍ଗାଧର ମେହେର ମେଗା ଜଳସେଚନ ପ୍ରକଳ୍ପର ଉଦ୍ଘାଟନୀ ଉତ୍ସବକୁ ନିମନ୍ତ୍ରଣ କରୁଛୁ । ସେଦିନ ଆପଣ ବିଜେପୁରରେ ହୋଇଥିବା ବିଶାଳ ରୂପାନ୍ତରଣକୁ ପ୍ରତ୍ୟକ୍ଷ କରିପାରିବେ । ଦୟାକରି ଆପଣ ଏହି ମାସ ଓ ବର୍ଷକୁ ଡାଏରିରେ ଲେଖି ରଖନ୍ତୁ । ଆମେ ଉଦ୍ଘାଟନୀ ଉତ୍ସବରେ ଆପଣଙ୍କ ସଦୟ ଉପସ୍ଥିତିକୁ ଅପେକ୍ଷା କରିବୁ ।
ଡ. ପାତ୍ର ଆହୁରି କହିଛନ୍ତି; ଓଡ଼ିଶା ହେଉଛି ପ୍ରଥମ ରାଜ୍ୟ ଏବଂ ମାନ୍ୟବର ହେଉଛନ୍ତି ପ୍ରଥମ ମୁଖ୍ୟମନ୍ତ୍ରୀ ଯିଏ କି ଚୁକ୍ତିଭିତ୍ତିକ କର୍ମଚାରୀଙ୍କୁ ନିୟମିତ କରିଛନ୍ତି । ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀମାନେ ଏଥିପାଇଁ ତାଙ୍କୁ ଫୋନ୍ କରି ପଚାରୁଛନ୍ତି, ଆପଣ ଏହା କଲେ କିପରି ? ଆପଣ ଜଣେ କେନ୍ଦ୍ରମନ୍ତ୍ରୀ । ଆପଣଙ୍କ ମନ୍ତ୍ରଣାଳୟ ଅଧୀନରେ ଥିବା ଅଧିକାଂଶ ଯୋଜନା ଚୁକ୍ତିଭିତ୍ତିକ କର୍ମଚାରୀଙ୍କ ଦ୍ବାରା କାର‌୍ୟ୍ୟକାରୀ ହେଉଛି । ମାତ୍ର ଆପଣ କାହିଁକି ଏହି ଚୁକ୍ତିଭିତ୍ତିକ କର୍ମଚାରୀଙ୍କ ପଦକୁ ଏଯାଏ ନିୟମିତ କରିବାକୁ ସମର୍ଥ ହୋଇନାହାନ୍ତି ? ଯେତେବେଳେ ମାନ୍ୟବର ମୁଖ୍ୟମନ୍ତ୍ରୀ ଲୋକଙ୍କ ପାଇଁ କିଛି ଭଲ କାର‌୍ୟ୍ୟ କରୁଛନ୍ତି, ଈର୍ଷା ପରାୟଣ ହୋଇ ଆପଣ ଏହାକୁ ସମାଲୋଚନା କରୁଛନ୍ତି କାହିଁକି ? ମାନ୍ୟବର ମୁଖ୍ୟମନ୍ତ୍ରୀ ଭଲ କାମକୁ ସ୍ୱ।ଗତ କରିବାକୁ ଆପଣ ଉଦାରତା ଦେଖାଇ ପାରୁନାହାନ୍ତି କାହିଁକି ?
ଗ୍ରାମୀଣ ଗୃହ ନିର୍ମାଣ କ୍ଷେତ୍ରରେ ଓଡ଼ିଶାକୁ ଶ୍ରେଷ୍ଠ ରାଜ୍ୟ ଭାବେ କେନ୍ଦ୍ର ସରକାର ପୁରସ୍କୃତ କରିଛନ୍ତି । କିନ୍ତୁ ଏହା ପରେ ବିଜେପି ଓଡ଼ିଶାର ଗ୍ରାମାଞ୍ଚଳରେ ଆବାସ ନିର୍ମାଣକୁ ଚକ୍ରାନ୍ତ କରି ବନ୍ଦ କରି ଦେଇଛି କାହିଁକି ? କାହିଁକି ଆପଣ ଗରିବ ଲୋକଙ୍କ ପାଇଁ ଉଦ୍ଦିଷ୍ଟ ଗୃହ ନିର୍ମାଣକୁ ବନ୍ଦ କରିଦେଲେ ? ଆପଣ ଏହି ପ୍ରଶ୍ନର କୌଣସି ଉତ୍ତର ଦେଇନାହାନ୍ତି ।
ଡ. ପାତ୍ର କହିଛନ୍ତି; ପଦ୍ମପୁରର ଚାଷୀମାନଙ୍କୁ ଏଯାଏ ଫସଲବୀମା ରାଶି ଦିଆଯାଇ ନାହିଁ । ଏ ପ୍ରଶ୍ନର ଉତ୍ତର ମଧ୍ୟ ଆପଣଙ୍କ ନିକଟରେ ନାହିଁ । ପଦ୍ମପୁରରେ ଆପଣଙ୍କ ଦଳର ପ୍ରାର୍ଥୀ ପ୍ରାର୍ଥିପତ୍ର ଦାଖଲ କରିବାକୁ ଗଲାବେଳେ ଚାଷୀ ସଂଗଠନମାନେ ତାଙ୍କୁ ଅଟକାଇଲେ । ଚାଷୀଙ୍କ ଆକ୍ରୋଶ ଫଳରେ ଏବଂ ଓଡ଼ିଶା ସରକାର ଆଡ଼ୁ ମାନ୍ୟବର ମୁଖ୍ୟମନ୍ତ୍ରୀ କ୍ରମାଗତ ଭାବେ ଏ ନେଇ କେନ୍ଦ୍ର ଉପରେ ଚାପ ପକାଇବା ଯୋଗୁଁ ୪୮ ଘଣ୍ଟା ଭିତରେ ଫସଲବୀମା ଦେଇ ଦିଆଗଲା । ଏହା ସତ ନା ନୁହେଁ ? ଦୟାକରି ଏହି ସବୁ ଅଶ୍ଵସ୍ତିକର ପ୍ରଶ୍ନର ଉତ୍ତର ଦିଅନ୍ତୁ ।
ଶେଷରେ ଡ. ପାତ୍ର କହିଛନ୍ତି; ଯେଉଁ ବିଜେପି ନେତାମାନେ ବାପାଙ୍କୁ ହରାଇଥିବା ଜଣେ ଓଡ଼ିଆ ଆଦିବାସୀ ଝିଅ ବର୍ଷା ସିଂ ବରିହାଙ୍କୁ ଅଶାଳୀନ ଓ ଅରୁଚିକର ଶବ୍ଦ ପ୍ରୟୋଗ କରି ପ୍ରକାଶ୍ୟରେ ଅପମାନିତ ଓ ଲାଞ୍ଛିତ କରିଛନ୍ତି; ସେମାନଙ୍କ ବିରୋଧରେ ଆପଣ କାର‌୍ୟ୍ୟାନୁଷ୍ଠାନ ନେବେ ବୋଲି ପଦ୍ମପୁରବାସୀ ଆଶା କରିଥିଲେ । ମାତ୍ର ଆପଣ ତାହା କଲେ ନାହିଁ । ପଦ୍ମପୁରବାସୀ ଏହା ମଧ୍ୟ ଆଶା କରିଥିଲେ ଯେ ପଦ୍ମପୁରକୁ ନୂତନ ଜିଲ୍ଲା ଏବଂ ପାଇକମାଳରେ ନୂତନ ଏନ୍ଏସି ଗଠନ ଲାଗି ମାନ୍ୟବର ମୁଖ୍ୟମନ୍ତ୍ରୀଙ୍କ ପ୍ରତିଶ୍ରୁତିକୁ ଆପଣ ସ୍ବାଗତ କରିବେ । ମାତ୍ର ଆପଣ ତାହା କଲେ ନାହିଁ । ପଦ୍ମପୁରବାସୀ ଭାବିଥିଲେ, ଆପଣ କେନ୍ଦୁପତ୍ର ଉପରୁ ୧୮% ଜିଏସ୍ଟି ପ୍ରତ୍ୟାହାର, ନୂତନ ରେଳଲାଇନ ନିର୍ମାଣ, ଫସଲବୀମା ରାଶି ପ୍ରଦାନ ଏବଂ ଗ୍ରାମୀଣ ଆବାସ ଯୋଜନାରେ ଗୃହ ନିର୍ମାଣ ଭଳି ବିଭିନ୍ନ ଦାବିକୁ ମଧ୍ୟ ଆପଣ ସମର୍ଥନ କରିବେ । ମାତ୍ର ଆପଣ ତାହା ବି କଲେ ନାହିଁ। ଏହି କାରଣରୁ ପଦ୍ମପୁରବାସୀ ଆପଣ ଏବଂ ବିଜେପିକୁ ନେଇ ଦୁଃଖିତ ଏବଂ ମର୍ମାହତ । ତେଣୁ ଆସନ୍ତା ୫ ତାରିଖ ଦିନ ହେବାକୁ ଯାଉଥିବା ଉପନିର୍ବାଚନରେ ପଦ୍ମପୁରବାସୀ ବିଜେପିକୁ ଏହାର ଉଚିତ ଜବାବ ଦେବେ।