ମାହାଙ୍ଗା(ଦେବେନ୍ଦ୍ର ଷଢଙ୍ଗୀ): ନିଶ୍ଚିନ୍ତକୋଇଲି ଗ୍ରାମ୍ୟ ଉନ୍ନୟନ ନିର୍ବାହୀ ଯନ୍ତ୍ରୀଙ୍କ ଅଧିନରେ ୮ନଂ କେନାଲ ପାର୍ଶ୍ୱ ଗୋତରା ପ୍ରହରାଜପୁର ଛକ ନିକଟରୁ ଆପିଲୋ-ଉମର-ବାଲିଆଛକ ପର୍ଯ୍ୟନ୍ତ ରାସ୍ତାର ଅବସ୍ଥା ମରଣଯନ୍ତାରେ ପରିଣତ ହୋଇଛି । ସରକାର ଜନସାଧାରଣ, ଯାନବାହନ ଗମନାଗମନ ସୁବିଧା ପାଇଁ ଗ୍ରାମ୍ୟ ଉନ୍ନୟନ ବିଭାଗୀୟ ଅଧିକାରୀଙ୍କୁ ଦାୟିତ୍ୱ ଦେଇଛନ୍ତି । କିନ୍ତୁ ଗ୍ରାମ୍ୟ ଉନ୍ନୟନ ବିଭାଗର କର୍ତବ୍ୟରେ ଚରମ ଅବହେଳା ହେତୁ ଗୋତରା ପ୍ରହରାଜପୁର ଛକ ଠାରୁ ଆପିଲୋ ଜହ୍ନିଆ ବଜାର ରାସ୍ତା , ଗୋତରା ବାଉରୀ ସାହି ପାଖ ୮ନଂ କେନାଲ ପାର୍ଶ୍ୱ ରାସ୍ତା ର ଅବସ୍ଥା ଶୋଚନୀୟ ହେତୁ ଦୈନନ୍ଦିନ ଛୋଟ ବଡ଼ ଦୁର୍ଘଟଣା ଘଟି ଧନଜୀବନ ହାନି ଘଟୁଛି । ବାରମ୍ବାର ଏହି ରାସ୍ତାର ଅବସ୍ଥା ସମ୍ପର୍କରେ ବିଭିନ୍ନ ଗଣମାଧ୍ୟମ ଖବରକାଗଜ ରେ ଖବର ବାହାରିଲେ ମଧ୍ୟ ଗ୍ରାମ୍ୟ ଉନ୍ନୟନ ବିଭାଗ ଅଧିକାରୀ ଏହାକୁ କର୍ଣ୍ଣପାତ କରୁନାହାଁନ୍ତି । ଯାହାଫଳରେ ସାଧାରଣରେ ଦିନକୁ ଦିନ ଅସନ୍ତୋଷ ବଢିବାକୁ ବସିଲାଣି । ବିଶେଷ କରି ନିଶ୍ଚିନ୍ତକୋଇଲି ରୁ ବାହାରିଥିବା ୮ନଂ କେନାଲ ପାର୍ଶ୍ୱ ରାସ୍ତା ଅର୍ଥାତ ମାହାଙ୍ଗା ବ୍ଲକ ଗୋତରା ଗ୍ରାମପଂଚାୟତ ଗୋତରା ବାଉରୀ ସାହି ପାଖ ରାସ୍ତା, ଆପିଲୋ ଜହ୍ନିଆ ବଜାର ନିକଟସ୍ଥ ୮ନଂ କେନାଲ ପାର୍ଶ୍ୱ ରାସ୍ତାର ଅବସ୍ଥା ଶୋଚନୀୟ ହୋଇପଡ଼ିଛି । ଯାହାଫଳରେ ପ୍ରତ୍ୟକ ଦିନ ଛୋଟ ବଡ଼ ଦୁର୍ଘଟଣା ଘଟି ଧନଜୀବନ ହାନି ହେଉଥିବାର ନଜିର ରହିଛି । ଏହି ରାସ୍ତା ଦେଇ ଗମନାଗମନ ନିମନ୍ତେ ଦୈନନ୍ଦିନ ଗୋତରା, ଉମର, ନାହାଙ୍ଗ,ଭଦ୍ରେଶ୍ୱର, ବଡ଼କ୍ଷୀର, ନିଶ୍ଚିନ୍ତକୋଇଲି, ନତକାଇ, ମାହାଙ୍ଗା ବ୍ଲକ ଓ ନିଶ୍ଚିନ୍ତକୋଇଲି ବ୍ଲକ ଅଂଚଳର ବହୁ ଗ୍ରାମ ପଂଚାୟତର ହଜାର ହଜାର ଲୋକ ଗମନାଗମନ ଉପରେ ନିର୍ଭର କରିଥାନ୍ତି । ଏପରିକି ବହୁ ବିଦ୍ୟାଳୟ , କଲେଜ ଛାତ୍ର ଛାତ୍ରୀ ଓ ଅଙ୍ଗନୱାଡ଼ି କେନ୍ଦ୍ରର କୋମଳମତୀ ଛାତ୍ର ଛାତ୍ରୀମାନେ ଯାତାୟତ କରିବା ନିମନ୍ତେ ନାନା ଅସୁବିଧାର ସମ୍ମୁଖୀନ ହେଉଛନ୍ତି । ଏହି ରାସ୍ତାରେ ଦୈନିକ ଶହ ଶହ ସଂଖ୍ୟାରେ ବସ,ଟ୍ରକ, ଚାରିଚକିଆ ଯାନ ଓ ବାଇକ ଯାଆସ କରିଥାଏ । ରାସ୍ତାର ବିଭିନ୍ନ ସ୍ଥାନରେ ବିରାଟ ବିରାଟ ଗର୍ତ ସୃଷ୍ଟି ହେବା ସହ ଖାଲ ଖମାରେ ରାସ୍ତାଟି ମରଣଯନ୍ତାରେ ପରିଣତ ହୋଇଛି । ସେହିପରି ଭାବେ ରାସ୍ତାର ଅବସ୍ଥା ଶୋଚନୀୟ ହୋଇପଡ଼ିଥିବା ହେତୁ ଜରୁରୀକାଳୀନ ପରିସ୍ଥିତିରେ ଆମ୍ବୁଲାନସ, ଦମକଳ ଗାଡ଼ି ଯାଇଆସି ପାରୁନାହିଁ । ଫଳରେ ଗର୍ଭବତୀ ପ୍ରସୂତି ମହିଳା ରୋଗାଗ୍ରସ୍ତ ଲୋକେ ସର୍ବୋପରି କୋମଳମତୀ ଶିଶୁମାନେ ଡ଼ାକ୍ତରଖାନାକୁ ଚିକିତ୍ସାନିମନ୍ତେ ଯାଇନପାରି ଅକାଳରେ ମୃତ୍ୟୁ ମୁଖରେ ପଡ଼ୁଥିବାର ଅଭିଯୋଗ ହୋଇଛି । ଏହି ରାସ୍ତାକୁ ମରାମତି କରାଯିବା ନିମନ୍ତେ ସ୍ଥାନୀୟ ଲୋକେ ବାରମ୍ବାର କଟକ ଜିଲ୍ଲା ନିଶ୍ଚିନ୍ତକୋଇଲି ଗ୍ରାମ୍ୟ ଉନ୍ନୟନ ବିଭାଗୀୟ ଅଧିକାରୀଙ୍କ ନିକଟରେ ଆପତି ଅଭିଯୋଗ କରୁଥିଲେ ମଧ୍ୟ ଏଥିପ୍ରତି କେହିହେଲେ କର୍ଣ୍ଣପାତ କରୁନଥିବା ହେତୁ ସାଧାରଣରେ ଗଭୀର ଅସନ୍ତୋଷ ପ୍ରକାଶ ପାଇଛି । ତେବେ ଗ୍ରାମ୍ୟ ଉନ୍ନୟନ ଉଚ୍ଚପଦସ୍ଥ ଅଧିକାରୀ ସର୍ବୋପରି ପ୍ରଶାସନ ତରଫରୁ ତୁରନ୍ତ ଏହି ରାସ୍ତା ମରାମତି ଦିଗରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସାଧାରଣରେ ଦୃଢ ଦାବି ହୋଇଛି । ନଚେତ୍ ଆଗାମୀ ଦିନରେ ଲୋକେ ବାଧ୍ୟ ହୋଇ ରାଜରାସ୍ତାକୁ ଓହ୍ଲାଇବେ ଓ ଏହାର କୁପରିଣାମ ପାଇଁ ପ୍ରଶାସନ ସମ୍ପୂର୍ଣ୍ଣ ଦାୟୀ ରହିବ ବୋଲି ଜନସାଧାରଣ ଚରମ ଚେତାବନୀ ଦେଇଛନ୍ତି ।