• ପଦଯାତ୍ରାରେ ସାମିଲ ହେଲେ ଶତାଧିକ ସମର୍ଥକ

• କୋରପିଠା ପଞ୍ଚାୟତ ପଦଯାତ୍ରାର ନେତୃତ୍ୱ ନେଲେ ବ୍ଳକ ଅଧ୍ୟକ୍ଷ ଲୋକନାଥ

ଓଡ଼ଗାଁ(ଶ୍ରୀକାନ୍ତ କୁମାର ମିଶ୍ର): ବିଜେଡି ଦଳ ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଙ୍କର ନିର୍ଦେଶକ୍ରମେ ଓଡଗାଁ ବିଜୁ ଜନତା ଦଳ ପକ୍ଷରୁ ସାକେରୀ ଓ କୋରପିଠା ପଂଚାୟତରେ ଜନସମ୍ପର୍କ ପଦଯାତ୍ରା ବୁଧବାର ଦିନ ଅନୁଷ୍ଠିତ ହୋଇଯାଇଛି । ନୟାଗଡ ବିଧାୟକ ଡ଼. ଅରୁଣ କୁମାର ସାହୁଙ୍କ ନେତୃତ୍ୱରେ ସାକେରୀ ଜଗନ୍ନାଥ ମନ୍ଦିର ଠାରୁ ଶହ ଶହ ମହିଳା ଓ ପୁରୁଷ ବିଜୁପ୍ରେମୀ, ସମର୍ଥକମାନେ ଏକ ବିଶାଳ ଶୋଭା ଯାତ୍ରାରେ ବାହାରି ମରେଈସାହି, ଗୋଡ଼ିପାଟଣା ରାସ୍ତା ଦେଇ ନିମ୍ବେଶ୍ବର ମନ୍ଦିରରେ ପହଁଚିଲେ । ସେହିପରି କୋରପିଠା ପଞ୍ଚାୟତ ଠାରୁ ଓଡ଼ଗାଁ ବ୍ଳକ ପଞ୍ଚାୟତ ସମିତି ଅଧ୍ୟକ୍ଷ ଲୋକନାଥ ସାହୁଙ୍କ ନେତୃତ୍ୱରେ ସ୍ଥାନୀୟ ଜନପ୍ରତିନିଧି, ନେତୃବର୍ଗ ଓ ବହୁ ସଂଖ୍ୟାରେ ସାଧାରଣ ସମର୍ଥକଙ୍କ ସହିତ ସରମରେଇସାହି, କୁଟୁଣି, ଭୋଇ ସାହି, ଦୁର୍ଗାପ୍ରସାଦ ଗ୍ରାମ ଦେଇ ନିମ୍ବେଶ୍ବରଙ୍କ ପରିସରରେ ପହଞ୍ଚିଥିଲେ ।

ସେଠାରେ ଏକ ପଥପ୍ରାନ୍ତ ସଭାରେ ଉପସ୍ଥିତ ଜନସାଧାରଣଙ୍କୁ ବିଧାୟକ ଡ଼. ଅରୁଣ କୁମାର ସାହୁ ପଞ୍ଚାୟତରେ କରାଯାଇଥିବା ଉନ୍ନୟନ ମୁଳକ କାର୍ଯ୍ୟ ସମ୍ପର୍କରେ ମନେପକାଇବା ସହିତ କୋରପିଠା-ସାକେରୀ ରାସ୍ତା ପାଇଁ ଅର୍ଥ ମଞ୍ଜୁର ହୋଇଥିବା ଘୋଷଣା କରିଥିଲେ । ଅନ୍ୟମାନଙ୍କ ମଧ୍ୟରେ ନୟାଗଡ ଜିଲ୍ଲା ବିଜୁ ମହିଳା ଜନତା ଦଳ ସଭାନେତ୍ରୀ ବିରଜା ଲଷ୍ମୀ ସାହୁ, ସାକେରୀ ସରପଞ୍ଚ ପାୟଲ କୁମାରୀ ପ୍ରଧାନ, ସମିତି ସଭ୍ୟା ମମତା ପ୍ରଧାନ ସମେତ ଶହ ଶହ ସଂଖ୍ୟାରେ ବିଜୁ ଜନତା ଦଳର କର୍ମୀ ଓ ସମର୍ଥକ ପଦଯାତ୍ରାରେ ସାମିଲ ହୋଇଥିବାରୁ ଜନପ୍ରତିନିଧି ମାନେ ଧନ୍ୟବାଦ ଜଣାଇଥିଲେ ।