ବଡ଼ବିଲ : (ଚିତ୍ତରଞ୍ଜନ କର) ଚମ୍ପୁଆ ରେଞ୍ଜ ଅଂଚଳରେ ଘୁରି ବୁଲୁଥିବା ଏକ ଦନ୍ତା ହାତୀ ଶରୀରରେ କ୍ଷତ ସୂଚନା ମିଳିଛି । ଦନ୍ତା ହାତୀଟିର ପିଠିରେ କ୍ଷତ ହୋଇଥିବା ସୂଚନା ଦେଇଛନ୍ତି ଚମ୍ପୁଆ ଡେପୁଟି ରେଞ୍ଜର । ଗତ ସୋମବାର ଝରଣ ଜଙ୍ଗଲରେ ଏହି କ୍ଷତାକ୍ତ ଦନ୍ତାକୁ କିଛି ଲୋକ ଦେଖି ବନ ବିଭାଗକୁ ଖବର ଦେଇଥିଲେ । ବନ କର୍ମଚାରୀ ମଧ୍ୟ କ୍ଷତାକ୍ତ ଦନ୍ତାହାତୀକୁ ଦେଖିଥିଲେ । ମାତ୍ର ଆହତ ହାତୀଟିକୁ ଟ୍ରାକରେ ନ ରଖି ଛାଡି ଦିଆଗଲା ପରେ ଏବେ ହାତୀଟିକୁ ଠାବ କରି ଚିକିତ୍ସା କରିବାପାଇଁ ବନ ବିଭାଗ ତରଫରୁ ପ୍ରୟାସ ଚାଲିଛି । ମାତ୍ର ୩ ଦିନ ପରେ ସୁଦ୍ଧା ଆହତ ଦନ୍ତାହାତୀକୁ ଠାବ କରିବାକୁ ସକ୍ଷମ ହୋଇପାରି ନାହାନ୍ତି ବନ କର୍ମଚାରୀ । ଏବେ ଆହତ ହାତୀ ଚମକପୁର ଓ ଶରଗିତଳିଆ ଜଙ୍ଗଲ ଅଂଚଳରେ ଥିବା କୁହାଯାଉଛି । ତେବେ କ୍ଷତାକ୍ତ ଦନ୍ତାକୁ ଅତି ଶୀଘ୍ର ଠାବ କରାଯାଇ ଚିକତ୍ସା କରା ନ ଗଲେ ହାତୀର ଜୀବନ ପ୍ରତି ବିପଦ ଦେଖାଯିବ। ଆହତ ଦନ୍ତା ହାତୀର ବୟସ ପ୍ରାୟ ୨୦ ବର୍ଷ ମଧ୍ୟରେ ହେବ । ଡ୍ରନ କ୍ୟାମେରାର ସାହାଯ୍ୟ ନିଆଗଲେ ହାତୀର ସନ୍ଧାନ ମିଳିପାରିବ ଏବଂ ହାତୀଟିର ସ୍ୱାସ୍ଥ୍ୟ ଉପଚାର କରାଯାଇ ପାରିବ ବୋଲି ସାଧାରଣରେ ଦାବି କରାଯାଇଛି ।
