ବଲାଙ୍ଗିର/ପୁଇଁନ୍ତଲା(ନିରୋଜ ମିଶ୍ର)  : ପୁଇଁନ୍ତଲା ବ୍ଲକ ଅନ୍ତର୍ଗତ ବିଲେଇସର୍ଡା ସ୍ଥିତ ଜବାହରଲାଲ ନୋଡାଲ ଉଚ୍ଚ ବିଦ୍ୟାଳୟରେ ପାନୀୟ ଜଳର ଘୋର ଅଭାବ ଦେଖାଦେଇଛି । ବିଦ୍ୟାଳୟରେ ଷଷ୍ଠରୁ  ଦଶମ ଶ୍ରେଣୀ ପର୍ଯ୍ୟନ୍ତ ୫୦୦ରୁ ଉର୍ଦ୍ଧ୍ବ  ଛାତ୍ର ଛାତ୍ରୀ ଅଧ୍ୟୟନରତ । ବର୍ଷା ସମୟରେ ସଂକ୍ରମଣ ହେବାର ଆଶଂକା ଥିବା ଯୋଗୁଁ ପିଲାମାନଙ୍କୁ ପାନୀୟ ଜଳର ବ୍ୟବସ୍ଥା କରାଯିବା ନିତାନ୍ତ ଆବଶ୍ୟକ । ବିଦ୍ୟାଳୟରେ ଥିବା ଏକମାତ୍ର ନଳକୂପ ଅଚଳ ହୋଇ ପଡି ରହିଛି । ଛାତ୍ର ଛାତ୍ରୀମାନେ ପାଣି ପିଇବା ପାଇଁ ସ୍ଥାନୀୟ ବ୍ୟାଙ୍କ ଓ ପ୍ରାଥମିକ ବିଦ୍ୟାଳୟକୁ ଯିବା ପାଇଁ ବାଧ୍ୟ ହେଉଛନ୍ତି । ବର୍ତ୍ତମାନ ସରକାରଙ୍କ ତରଫରୁ ଏକ ସତର୍କ ମୂଳକ ବିଜ୍ଞପ୍ତି ଜାରି କରାଯାଇଛି ଯେଉଁଥିରେ କି ପିଲାମାନଙ୍କୁ ସ୍କୁଲ ପରିସର ବାହାରକୁ ଯିବା ପାଇଁ ମନା । କିନ୍ତୁ ପାନୀୟ ଜଳର ବ୍ୟବସ୍ଥା ନ ଥିବାରୁ ପିଲାମାନେ ବାହାରକୁ ଯାଉଛନ୍ତି । ଏହାର ବିହୀତ ବ୍ୟବସ୍ଥା କରିବା ପାଇଁ ଅଭିଭାବକ ମାନେ ଦାବୀ କରିଛନ୍ତି ।