ବାରିପଦା,(ଦିଲ୍ଲୀପ ମହାନ୍ତି):ଯଶିପୁର ନିର୍ବାଚନ ମଣ୍ଡଳୀର ପୂର୍ବତନ ବିଧାୟକ କମଳାକାନ୍ତ ନାୟକ(୬୭)ଙ୍କର ଆଜି ସକାଳେ କେନ୍ଦୁଝରଠାରେ ଚିକିତ୍ସାଧିନ ଅବସ୍ଥାରେ ପରଲୋକ ଘଟିଛି । ବିଜୁ ଜନତା ଦଳରୁ ଚତୁର୍ଦ୍ଦଶ ବିଧାନସଭାକୁ ନିର୍ବାଚିତ ହୋଇ (୨୦୦୯-୨୦୧୪) ଯଶିପୁରର ବିଧାୟକ ହୋଇଥିଲେ । ରରୁଆଁ ବ୍ଲକ୍ ଅନ୍ତର୍ଗତ ବୈଦ୍ୟନାଥ ଗ୍ରାମପଞ୍ଚାୟତର ଜାମୁନ୍ତି ଗ୍ରାମରେ ଆଦିବାସୀ ପରିବାରରେ ୧୯୫୪ ଫେବୃଆରୀ ୧ତାରିଖରେ କମଳାକାନ୍ତ ଜନ୍ମଗ୍ରହଣ କରିଥିଲେ । ସେ କଳାରେ ସ୍ନାକକୋତ୍ତର ଡ଼ିଗ୍ରୀ ହାସଲ କରିବା ପରେ ଓଡ଼ିଶା ପ୍ରଶାସନିକ ସେବା(ଓ.ଏ.ଏସ୍) ଯୋଗ ଦେଇଥିଲେ । ଚାକିରି କାଳ ମଧ୍ୟରେ କେନ୍ଦୁଝର ଓ ମୟୂରଭଞ୍ଜର ବିଭିନ୍ନ ସ୍ଥାନରେ ବିଡ଼ିଓ, ତହସିଲଦାର ରୂପେ କାର୍ଯ୍ୟ କରିବାର ସୁଯୋଗ ପାଇଥିଲେ । ୧୯୯୫ ମସିହାରେ ସ୍ୱେଚ୍ଛାକୃତ ଭାବେ ଓଡ଼ିଶା ପ୍ରଶାସନିକ ସେବା ଚାକିରୀରୁ ଅବସର ନେବା ପରେ ରାଜନୀତିରେ ପାଦ ଦେଇଥିଲେ । ସେହିବର୍ଷ ସେ ପ୍ରଥମେ ଜନତା ଦଳରୁ ପ୍ରାର୍ଥୀ ହୋଇ ପରାଜିତ ହୋଇଥିଲେ । ବିଜୁ ପଟ୍ଟନାୟକଙ୍କ ମୃତ୍ୟୁ ପରେ ଜନତା ଦଳ ବିଜୁ ଜନତା ଦଳ(ବିଜେଡ଼ି)ରେ ପରିଣତ ହୋଇଥିଲା । ବିଜେଡ଼ି-ବିଜେପି ମେଣ୍ଟ ମିଳିତ ଭାବେ ନିର୍ବାଚନ ଲଢ଼ିଥିଲେ । ୨୦୦୦ ନିର୍ବାଚନରେ ଏହି ଆସନଟି ବିଜେପି ଭାଗରେ ପଡ଼ିଥିଲା । ସେ ବିଜେପିରୁ ଟିକେଟ୍ ପାଇଁ ଆଶାୟୀ ଥାଇ ନିରାଶ ହେବାପରେ ତୃଣମୂଳ କଂଗ୍ରେସରୁ ପ୍ରାର୍ଥୀ ହୋଇଥିଲେ । ଏହାପରେ ପୁଣି ୨୦୦୪ ମସିହାରେ ସ୍ୱାଧୀନ ପ୍ରାର୍ଥୀ ରୂପେ ପ୍ରତିଦ୍ୱନ୍ଦିତା କରିଥିଲେ । ୨୦୦୯ ମସିହାରେ ସେ ବିଜୁ ଜନତା ଦଳରୁ ପ୍ରତିଦ୍ୱନ୍ଦିତା କରି ଓଡ଼ିଶା ବିଧାନସଭାର ବିଧାୟକ ହୋଇଥିଲେ । ଗତ ୨୦୧୯ ନିର୍ବାଚନ ପୂର୍ବରୁ ସେ ବିଜେପି ଦଳରେ ସାମିଲ ହୋଇଥିଲେ । ଶିକ୍ଷା ସମାପ୍ତ ପରେ କିଛି ଦିନ ଅଙ୍ଗାରପଦା ପଞ୍ଚାୟତ ମହାବିଦ୍ୟାଳୟ, ରରୁଆଁରେ ଅବୈତନିକ ଅଧ୍ୟାପକ ରୂପେ ଅଧ୍ୟାପନା କରିଥିଲେ । ତାଙ୍କର କଳା, ସାହିତ୍ୟ ପ୍ରତି ଅନେକ ରୁଚି ରହିଥିଲା । ତାଙ୍କର ବିଧବା ପତ୍ନୀଙ୍କ ସମେତ ଦୁଇ ପୁଅ, ଜଣେ ଝିଅ ରହିଛନ୍ତି । ତାଙ୍କରି ବିୟୋଗରେ ଯଶିପୁର ବିଧାୟକ ଗଣେଶରାମ ସିଂଖୁଣ୍ଟିଆ ଗଭୀର ଶୋକ ବ୍ୟକ୍ତ କରିଛନ୍ତି । ତାଙ୍କର ସେବା ପାଇଁ ସେ ସବୁଦିନ ଅଞ୍ଚଳବାସୀଙ୍କ ନିକଟରେ ସ୍ମରଣୀୟ ହୋଇ ରହିଥିବେ ବୋଲି ତାଙ୍କର ଶୋକବାର୍ତ୍ତାରେ ପ୍ରକାଶ କରିଛନ୍ତି । ରରୁଆଁ ବ୍ଲକର ବିଜେଡ଼ି ନେତା ବିପିନ୍ ବିହାରୀ ମହାନ୍ତ ଓରଫ୍ ଲାଲି, ଆଦିବାସୀ ନେତା ତଥା ସାମାଜିକ କର୍ମୀ ମନୋରଞ୍ଜନ ତିରିଆ, ତିଳକୁଟି ପଞ୍ଚାୟତର ସରପଞ୍ଚ ଶ୍ରୀମତୀ ମିନୁ ଚାତାର, ବୈତ୍ୟନାଥ ପଞ୍ଚାୟତର ସରପଞ୍ଚ ନର୍ମଦା ନାୟକ ପ୍ରମୁଖ ପୂର୍ବତନ ବିଧାୟକ କମଳାକାନ୍ତ ନାୟକଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି ।
