ଭୁବନେଶ୍ୱର (ଶାସକ ପ୍ରଶାସକ) କେନ୍ଦ୍ର ସରକାର ନିଜ ଭୁଲ ସୁଧାରି ଗୋଟିଏ ବିବାଦୀୟ ଉପନିୟମକୁ ପ୍ରତ୍ୟାହାର କରିଥିବା ବେଳେ ଏବେ ଅନୁରୂପ ଭାବେ ଜାତୀୟ ସ୍ମାରକୀ କର୍ତ୍ତୃପକ୍ଷ (ନ୍ୟାସନାଲ୍ ମନୁମେଣ୍ଟ ଅଥରିଟି) ଦ୍ୱାରା ଏକାମ୍ର କ୍ଷେତ୍ରରେ ଅନନ୍ତ ବାସୁଦେବ ମନ୍ଦିର ଓ ବ୍ରହ୍ମେଶ୍ୱର ମନ୍ଦିର ପାଇଁ ଜାରି ହୋଇଥିବା ଉପ ନିୟମ ’ ପ୍ରତ୍ୟାହାର ଦାବିରେ ଏକାମ୍ର କ୍ଷେତ୍ରରେ ଜଳିଛି ଅସନ୍ତୋଷର ନିଆଁ | ଏ ପ୍ରସଙ୍ଗରେ ସ୍ଥାନୀୟ ସାଂସଦ ଅପରାଜିତାଙ୍କୁ ନିଖୋଜ ପୋଷ୍ଟର ଲାଗିଥିବା ବେଳେ ସେବାୟତ ମାନେ ଦେଇଛନ୍ତି ଚେତାବନୀ | ୨୪ ଘଣ୍ଟା ମଧ୍ୟରେ ଏହି ବିବାଦିତ ଉପ ନିୟମ ପ୍ରତ୍ୟାହାର କରା ନ ଗଲେ ବିରାଟ ଗଣ ଆନ୍ଦୋଳନ ହେବ ଏବଂ ମନ୍ଦିର ଆଗରେ ଦୀପ ଜାଳି ପ୍ରତିବାଦ କରାଯିବ ବୋଲି ବିଭିନ୍ନ ନିଯୋଗ ପକ୍ଷରୁ ଚେତାଇ ଦିଆଯାଇଛି | କେବଳ ସେତିକି ନୁହେ ଏହି ବିବାଦିତ ଅଧିନିୟମ ଏକାମ୍ରକ୍ଷେତ୍ରର ଅଧିଷ୍ଠାତା ଶ୍ରୀ ଶ୍ରୀ ଲିଙ୍ଗରାଜ, ସେବାୟତ ସର୍ବୋପରି ଏକାମ୍ରକ୍ଷେତ୍ରର ସ୍ୱାତନ୍ତ୍ର୍ୟ ନଷ୍ଟ କରିବାର ଆଶଙ୍କା ଥିବା ନେଇ ମବାୟତ ଓ ସ୍ଥାନୀୟ ଜନସାଧାରଣଙ୍କ ଭାବନାକୁ ଗୁରୁତ୍ୱ ଦେଇ ଲିଙ୍ଗରାଜ ମନ୍ଦିର ଟ୍ରଷ୍ଟ ବୋର୍ଡ ଅଧ୍ୟକ୍ଷ ତଥା ଖୋାର୍ଦ୍ଧା ଜିଲ୍ଲାପାଳ ଓ ଦେବୋତ୍ତର କମିଶନର ଏ ପ୍ରସଙ୍ଗରେ ଏନଏମଏର ସଦସ୍ୟ ସଚିବଙ୍କୁ ଗତ ୭ ତାରିଖରେ ପତ୍ର ଲେଖିଛନ୍ତି | ଏହି ଉପ ନିୟମକୁ ପ୍ରତ୍ୟାହାର କରିବା ପାଇଁ ପତ୍ରରେ ଅନୁରୋଧ କରିଛନ୍ତି | ଅପରପକ୍ଷରେ ଏହି ଉପନିୟମ ପ୍ରତ୍ୟାହାର ପାଇଁ ଲିଙ୍ଗରାଜ ମନ୍ଦିରର ଚାରି ନିଯୋଗ ପକ୍ଷରୁ ଏକ ମିଳିତ ସାମ୍ବାଦିକ ସମ୍ମିଳନୀ ଜରିଆରେ ୨୪ ଘଣ୍ଟିଆ କଣ୍ଟ ଦିଆଯାଇଛି ।
ବ୍ରାହ୍ମଣ ନିଯୋଗ, ପୂଜାପଣ୍ଡା ନିଯୋଗ, ବଡୁ ନିଯୋଗ ଓ ସମର୍ଥା ନିଯୋଗ ପକ୍ଷରୁ ଲିଙ୍ଗରାଜ ମନ୍ଦିର ସାମନାରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏନଏମଏର ପ୍ରସ୍ତାବିତ ଉପନିୟମଙ୍କୁ ଘୋର ବିରୋଧ କରାଯାଇଥିଲା । ଶ୍ରୀମନ୍ଦିର ପାଇଁ ଉପନିୟମ ଯେଭଳି ପ୍ରଯୁଜ୍ୟ ନୁହେଁ, ଅନନ୍ତ ବାସୁଦେବ ଓ ବ୍ରହ୍ମେଶ୍ୱର ମନ୍ଦିର ପାଇଁ ମଧ୍ୟ ସେମିତି ପ୍ରଯୁଜ୍ୟ ନୁହେଁ । ଠାକୁରଙ୍କୁ ଭାଗ ଭାଗ କରିବାକୁ ହୀନ ଉଦ୍ୟମ କରାଯାଇଛି ବୋଲି ନିଯୋଗ କର୍ମକର୍ତ୍ତାମାନେ ଅଭିଯୋଗ କରି ବେଆଇନ ନିର୍ମାଣ ବେଳେ ୫୦ ବର୍ଷ ଧରି ଏଏସଆଇ କ’ଣ କରୁଥିଲା ବୋଲି ପାଲଟା ପ୍ରଶ୍ନ କରିଛନ୍ତି । ପାଲଟା ସେମାନେ କହିଛନ୍ତି ଯେ, ଏକାମ୍ର କ୍ଷେତ୍ରର ବିକାଶ ପାଇଁ ରାଜ୍ୟ ସରକାରଙ୍କ ଐତିହାସିକ ପଦକ୍ଷେପରେ ସେବାୟତ ଓ ସ୍ଥାନୀୟ ଅଞ୍ଚଳବାସୀ ପୂର୍ଣ୍ଣ ସହଯୋଗ କରୁଛନ୍ତି । ଏଥିପାଇଁ ୨୦୦ ସେବାୟତ ପରିବାର ସେମାନଙ୍କ ଜମି ବି ରାଜ୍ୟ ସରକାରଙ୍କୁ ଦେଇଛନ୍ତି । ଏନଏମଏର ଏହି ଏକତରଫା ଉପନିୟମ ଏକାମ୍ର ଐତିହ୍ୟ ବିକାଶ କାର୍ଯ୍ୟରେ ଏହା ବାଧା ସୃଷ୍ଟି କରିବ ବୋଲି ସେମାନେ ଅଭିଯୋଗ କରିଛନ୍ତି | ଭୁବନେଶ୍ୱର ସଂସଦ ଏ ବିଷୟରେ କାହିଁକି ନିରବ ରହିଛନ୍ତି ବୋଲି ପ୍ରଶ୍ନ କରିଛନ୍ତି ସେବାୟତ ମାନେ |
