ବିଭାଗୀୟ ଅଧିକାରୀମାନଙ୍କୁ ଓଏଲଆଇସି ଅଧ୍ୟକ୍ଷ ଶ୍ରୀ ପତ୍ରୀ ପରାମର୍ଶ
ବରଗଡ (ଶାସକ ପ୍ରଶାସକ) : ଓଡିଶା ଉଠାଜଳସେଚନ ନିଗମ ଅଧ୍ୟକ୍ଷ ଶ୍ରୀ ଅମରେଶ ପତ୍ରୀ ତାଙ୍କର ବରଗଡ ଜିଲ୍ଲା ଗସ୍ତର ଦ୍ଵିତୀୟ ଦିନରେ ଜିଲ୍ଲାର ବରଗଡ ଓ ବରପାଲି ଅଞ୍ଚଳରେ ଉଠା ଜଳସେଚନର ବିଭିନ୍ନ ପ୍ରକଳ୍ପ ପରିଦର୍ଶନ କରିଥିଲେ । ପାଣି ପଞ୍ଚାୟତର କାର୍ଯ୍ୟକର୍ତ୍ତାନଙ୍କ ସହ ବୈଠକ କରିଥିଲେ ଓ ଚାଷୀମାନଙ୍କ ସହ ସିଧାସଳଖ ଆଲୋଚନା କରି ତାଙ୍କର ସୁଵିଧା ଅସୁବିଧା ବୁଝିଥିଲେ | ସେସବୁର ତୁରନ୍ତ ସମାଧାନ ନିମନ୍ତେ ବିଭାଗୀୟ ଅଧିକାରୀଙ୍କୁ ଆବଶ୍ୟକ ନିର୍ଦ୍ଦେଶ ଓ ପରାମର୍ଶ ଦେଇଥିଲେ ।
ଚାଷୀଭାଇମାନେ ସେମାନଙ୍କର ସମସ୍ୟା ନେଇ କାର୍ୟ୍ୟ।ଳୟକୁ ଆସିବେ ନାହିଁ ଓ ଆବଶ୍ୟକତା ଅନୁଯାୟୀ ଅଧିକାରୀମାନେ କ୍ୟାମ୍ପ କରି କୃଷକମାନଙ୍କ ନିକଟରେ ପହଞ୍ଚିବା ଦରକାର ବୋଲି ଶ୍ରୀ ପତ୍ରୀ ପରାମର୍ଶ ଦେଇଛନ୍ତି । ଜିଲ୍ଲାରେ ଅଧିକ ସଂଖ୍ୟକ ଉଠାଜଳ ପ୍ରକଳ୍ପ ଥିବାରୁ ଓ ଚାଷୀମାନଙ୍କ ଉତ୍ସାହ ଏବଂ ଅନୁରୋଧ କ୍ରମେ ସେ ତାଙ୍କର ଗସ୍ତ କାର୍ଯ୍ୟକ୍ରମକୁ ବୃଦ୍ଧି କରି ତୃତୀୟ ଦିନରେ ଜିଲ୍ଲାର ଗାଇସିଲଟ , ପଦ୍ମପୁର , ପାଇକମାଲ ଗସ୍ତ କରି ବିଭିନ୍ନ ପ୍ରକଳ୍ପ ପରିଦର୍ଶନପୂର୍ବକ ଚାଷୀମାନଙ୍କ ସହ ପ୍ରତ୍ୟକ୍ଷ ଆଲୋଚନା କରିଥିଲେ ।
ଚାଷୀମାନେ ଉଠାଜଳସେଚନ ପ୍ରକଳ୍ପରୁ ବହୁଳ ଭାବେ ଉପକୃତ ହେଉଥିବାରୁ ଏବଂ ଏହା ଯୋଗୁଁ ସବୁ ଋତୁରେ ଅନ୍ୟାନ୍ୟ କିସମର ଚାଷ କରି ସେମାନେ ଲାଭବାନ ହେଉଥିବାରୁ ଜିଲ୍ଲାର କୃଷକମାନେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି । ଶ୍ରୀ ପତ୍ରୀଙ୍କର ଏହି ପରିଦର୍ଶନ ସମୟରେ ଉଠାଜଳସେଚନ ନିର୍ବାହୀଯନ୍ତ୍ରୀ ସତ୍ୟନାରାୟଣ ତ୍ରିପାଠୀ, ଏସଡିଓ ବରଗଡ ସହଦେବ ସେଠୀ, ଏସଡିଓ ସୋହେଲା ବିଜୟ କୁମାର ଧର ଏବଂ ଏସଡିଓ ପଦ୍ମପୁର କିଶୋର ଚନ୍ଦ୍ର ମହାଳିକ ପ୍ରମୁଖ ଉପସ୍ଥିତ ଥିଲେ ।
