ବଲାଙ୍ଗୀର( ନିରୋଜ ମିଶ୍ର) ବର୍ତ୍ତମାନ ସାରା ଦେଶରେ କରୋନା ଆତଙ୍କ ସୃଷ୍ଟି ହୋଇଥିବା ବେଳେ ଏଭଳି ଏକ ମାରାତ୍ମକ ଭୁତଣୁ କବଳରୁ ରକ୍ଷା ପାଇବା ପାଇଁ ରାଜ୍ୟ ସରକାର ବିଭିନ୍ନ ଆଇନ୍ ପ୍ରଣୟନ କରିଛନ୍ତି । ରାଜ୍ୟ ଓ ଦେଶର ଜନସାଧାରଣଙ୍କ ବହୁମୂଲ୍ୟ ଜନଜୀବନକୁ ବଞ୍ଚାଇବାକୁ ନିଜ ଜୀବନକୁ ବିପନ୍ନ କରି, ସରକାରୀ କଳ ଦିନରାତି ଏକ କରିଦେଇଛନ୍ତି । ସାରା ଦେଶକୁ ଲକଡାଉନ ଘୋଷଣା କରି ଶୃଙ୍ଖଳିତ ଭାବେ ଆଇନ କାନୁନ ଭିତରେ ଜୀବନ ଜାପନ କରିବାକୁ ନିର୍ଦ୍ଦେଶ ଦେଇଛନ୍ତି ସରକାର । ବଜାରରୁ ଜିନିଷ କିଣିବା ହେଉ କି ଔଷଧ ଦୋକାନରୁ ଔଷଧ କିଣିବା ହେଉ ସବୁଠି ସାମାଜିକ ଦୂରତା ବଜାୟ ରଖିବାକୁ ନିର୍ଦ୍ଦେଶ ରହିଛି । ଯେକୌଣସି ଜରୁରୀ କାମରେ ବାହାରକୁ ବାହାରିଲେ ମୁହଁରେ ମାସ୍କ ପିନ୍ଧିବା ଜରୁରୀ ଭଳି ଅନେକ ନିତି ନିୟମ କରାଯାଇଛି । କୋଭିଡ -୧୯ ନିୟମକୁ ବଲାଙ୍ଗୀର ସହରର ସୁଡ଼ପଡା ରେ ଥିବା ହରିହର ନର୍ସିଂହୋମ ଖୋଲାଖୋଲି ଉଲଙ୍ଘନ କରିଥିବା ଅଭିଯୋଗ ହୋଇଛି । ଯାହା ବଲାଙ୍ଗୀର ଜିଲ୍ଲାପାଳଙ୍କ ସ୍କେନର ପରିସର କୁ ଆସିଥିଲା । ଏହାର ତଦନ୍ତ କରି ଜିଲ୍ଲାପାଳ ଶ୍ରୀ ଅରିନ୍ଦମ ଡାକୁଆ ନର୍ସିଂହୋମ୍ କୁ ସିଲ୍ କରାଯିବା ପାଇଁ ପୋଲିସକୁ ନିର୍ଦ୍ଦେଶ ଦେଇଛନ୍ତି । ଜିଲ୍ଲାପାଳଙ୍କ ନିର୍ଦ୍ଦେଶରେ ଆଜି ହରିହର ନର୍ସିଂହୋମ୍ କୁ ସିଲ୍ କରିଛି ବଲାଙ୍ଗୀର ପ୍ରଶାସନ ।
