କଲ୍ୟାଣସିଂହପୁର:ପ୍ରଦୀପ ଦଲାଇ/ମାଓପ୍ରବଣ ରାଇଲିମାର ବୁଥ ନମ୍ବର ୧୪ରେ ଆଜି ଶାନ୍ତିଶୃଙ୍ଖଳା ସହ ସାନି ମତଦାନ ଅନୁଷ୍ଠିତ ହେଉଛି । ସକାଳ ୯ଟାରୁ ଆରମ୍ଭ ହୋଇଥିବା ଭୋଟଗ୍ରହଣରେ ରାଇଲିମା,ତଳମୁଶୁଡି ଓ ଉପର ମୁଶୁଡି ଗ୍ରାମର ମତଦାତାମାନେ ଉତ୍ସାହିତ ସହିତ ମତଦାନ ସାବ୍ୟସ୍ତ କରିଛନ୍ତି । ଭୋଟର ତାଲିକାରେ ୧୯୯ ଜଣଙ୍କ ନାମ ରହିଛି।
ଗତ ୨୦ତାରିଖ ତୃତୀୟ ପର୍ଯ୍ୟାୟ ଭୋଟଗ୍ରହଣ ବେଳେ ଉକ୍ତ ବୁଥର ଭୋଟ ଲିଷ୍ଟରେ ତଳମୁଶୁଡି ଓ ଉପର ମୁଶୁଡି ଗ୍ରାମବାସୀଙ୍କ ନାମ ପ୍ରକାଶିତ ହୋଇ ନ ଥିବାରୁ ୨ଗ୍ରାମବାସୀ ଉତ୍ୟକ୍ତ ହୋଇ ଭୋଟବାକ୍ସ ଉଠାଇ ନେଇଥିଲେ । ଘଟଣାକୁ ନେଇ ନିର୍ବାଚନ ଆୟୋଗଙ୍କ ନିର୍ଦ୍ଦେଶ ପରେ ଶାନ୍ତିପୂର୍ଣ୍ଣ ଭାବେ ଆଜି ପୁଣି ସାନି ମତଦାନ ପ୍ରକ୍ରିୟା ଅନୁଷ୍ଠିତ ହେଉଥିବା ନେଇ ଉପଜିଲ୍ଲାପାଳ ତଥା ନିର୍ବାଚନ ଅଧିକାରି ପ୍ରତାପଚନ୍ଦ୍ର ପ୍ରଧାନ ପ୍ରକାଶ କରିଛନ୍ତି । ସେହିପରି ପୋଲିସ ପ୍ରଶାସନ ପକ୍ଷରୁ ଥ୍ରି ଟାୟର ସୁରକ୍ଷା ବ୍ୟବସ୍ଥା ସହ ୩ ପ୍ଳାଟୁନ ପୋଲିସ ଫୋର୍ସ ମୁତୟନ କରାଯାଇଥିବା ବେଳେ ମାଓ ଅଂଚଳରେ ଡିଭିଏଫ,ସିଆରପିଏଫ,ଏସଓଜି ପକ୍ଷରୁ କୁମ୍ଭିଂ ଜୋରଦାର କରାଯାଇଥିବା ନେଇ ଅତିରିକ୍ତ ଏସପି ପ୍ରକାଶ କରିଛନ୍ତି । ଘଟଣାସ୍ଥଳରେ ଏସଡିପିଓ,କଲ୍ୟାଣସିଂହପୁର ବିଡିଓ,ତହସିଲଦାର,ଆଇଆଇସି ଉପସ୍ଥିତ ରହି ସ୍ଥିତି ଉପରେ ନଜର ରଖିଛନ୍ତି ।
