ଲକ୍ଷ୍ମୀପୁର ଏବଂ କାଶୀପୁରରେ ବିଜେପି ବିଜୟ ସଂକଳ୍ପ ସଭାରେ କେନ୍ଦ୍ରମନ୍ତ୍ରୀ
ଓଡିଶାର ସର୍ବାଙ୍ଗୀନ ବିକାଶ ପାଇଁ ଡବଲ ଇଞ୍ଜିନ ସରକାରର ଆବଶ୍ୟକତା ରହିଛି
ବିକାଶ କାମ କରିବେ ନାହିଁ କିମ୍ବା ନରେନ୍ଦ୍ର ମୋଦିଙ୍କ ବିକାଶର କାମକୁ କରେଇଦେବେ ନାହିଁ ନବୀନ
ସ୍ୱାଧୀନତାର ୭୦ ବର୍ଷ ପରେ ଓଡିଶାରେ ୪୦ ଲକ୍ଷ ପରିବାରରେ ପକ୍କା ଘର ନାହିଁ
ଭୁବନେଶ୍ୱର/ଲକ୍ଷ୍ମୀପୁର/କାଶୀପୁର – ଯେଉଁମାନେ ଓଡିଶାକୁ ଭଲ ପାଉଛନ୍ତି, ଓଡିଶାରେ ସୁଶାସନ ପ୍ରତିଷ୍ଠା କରିବାକୁ ଚାହୁଁଛନ୍ତି ସେମାନେ ଏକଜୁଟ ହେବା ଦରକାର । ସେହିପରି ଓଡିଶାର ସର୍ବାଙ୍ଗୀନ ବିକାଶ ପାଇଁ ଡବଲ ଇଞ୍ଜିନ ସରକାରର ଆବଶ୍ୟକତା ରହିଛି ବୋଲି କୋରାପୁଟ ଜିଲ୍ଲା ଲକ୍ଷ୍ମୀପୁର ଏବଂ ରାୟଗଡା ଜିଲ୍ଲା କାଶୀପୁରରେ ଆୟୋଜିତ ବିଜେପିର ବିଜୟ ସଂକଳ୍ପ ସଭାରେ ଯୋଗଦେଇ କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ଯେ ଓଡିଆ ଲୋକମାନେ ପିସିରେ ପେଶି ହୋଇଗଲେଣି । ଚିଟ୍ଫଣ୍ଡ ମାମଲାରେ ଡର୍ଜନ ବିଧାୟକ ଓ ସାଂସଦ ଅଛନ୍ତି । ଏଥର ନବୀନ ବାବୁ ସବୁ ଚିଟଫଣ୍ଡରେ ସମ୍ପୃକ୍ତ ଲୋକଙ୍କୁ ଟିକେଟ୍ ଦେଇଛନ୍ତି । ଚିଟପଣ୍ଡର ମହାନାୟକ ନବୀନ ପଟ୍ଟାନାୟକ । ସେହିପରି ବିକାଶ କାମ କରିବେ ନାହିଁ କିମ୍ବା ନରେନ୍ଦ୍ର ମୋଦିଙ୍କ ବିକାଶର କାମକୁ କରେଇଦେବେ ନାହିଁ ନବୀନ ବାବୁଙ୍କ ଦମ୍ଭ ବୋଲି ଶ୍ରୀ ପ୍ରଧାନ କହିଛନ୍ତି ।
କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ଯେ ନବୀନ ସରକାର ଦୁର୍ନୀତିର ସରକାର । ନବୀନ ତାଙ୍କ ପ୍ରଚାରରେ କେନ୍ଦ୍ରୀୟ ଅବହେଳା କଥା କହୁଛନ୍ତି । କୋରାପୁଟର ଖଣି ସମ୍ପଦର ମାଲିକ ହେଲେ ଆଦିବାସୀ । କୋରାପୁଟ, ରାୟଗଡା ଓ କଳାହାଣ୍ଡିର ବକ୍ସସାଇଟରେ ଦିଲ୍ଲୀ ଲୋକମାନେ ଧନୀ ହୁଅନ୍ତି କିନ୍ତୁ କୋରାପୁଟର ଲୋକମାନେ ଗରିବରୁ ଗରିବ ହୁଅନ୍ତି । ନବୀନ ପଟ୍ଟନାୟକଙ୍କ ଆନାକୁଣ୍ଡାମାନେ ଦଲାଲି କରି ଧନୀ ହୁଅନ୍ତି ଏବଂ ତାଙ୍କ ଗୁମାସ୍ତା ମାନେ ଏହି ପଇସାରେ ବଡ ବଡ କୋଠା ନିର୍ମାଣ କରନ୍ତି ।
ଖଣି ଅଂଚଳର ଆଦିବାସୀଙ୍କ ବିକାଶ ପାଇଁ ମୋଦି ଡିଏମଏଫ ଫଣ୍ଡର ବ୍ୟବସ୍ଥା କରିଥିବା ବେଳେ ଫଣ୍ଡରେ ଥିବା ସାଢେ ୬ ହଜାର କୋଟି ଟଙ୍କା ପଇସାକୁ ନବୀନ ବାବୁ ଖର୍ଚ୍ଚ କରିପାରୁନାହାନ୍ତି । ନବୀନ ବାବୁ ଓ ତାଙ୍କ ଆନାକୁଣ୍ଡା ମାନଙ୍କର ପକେଟ ଗରମ ହେବ ନାହିଁ ବୋଲି ସେ ଏହି ପଇସା ଖର୍ଚ୍ଚ କରିପାରିଲେ ନାହିଁ । ସେହିଭଳି ଓଡିଶାର ବିକାଶ ପାଇଁ ନରେନ୍ଦ୍ର ମୋଦି ୫ ବର୍ଷରେ ସାଢେ ୫ ଲକ୍ଷ କୋଟି ଦେଇଛନ୍ତି । ସେହି ପଇସାକୁ ବିଜେଡି ସରକାର ଖର୍ଚ୍ଚ କରିପାରୁନଥିବା ବେଳେ ପକେଟକୁ ପିସି ଆସିବା ପରେ ଏହି ପଇସା ଖର୍ଚ୍ଚ ହେଲା ବୋଲି ଶ୍ରୀ ପ୍ରଧାନ କହିଛନ୍ତିା
ଓଡିଶାରେ ମୋଦିଙ୍କ ସରକାରରେ ବିଗତ ୫ ବର୍ଷରେ ପ୍ରଧାନମନ୍ତ୍ରୀ ଆବାସ ଯୋଜନାରେ ୮ ଲକ୍ଷ ଗରିବ ପରିବାରକୁ ପକ୍କା ଘର ମିଳିଛି, ୨୪ ଲକ୍ଷ ଘରକୁ ମାଗଣା ବିଜୁଳି ଓ ସ୍ୱାଧୀନତାର ୭୦ ବର୍ଷ ପରେ ମାଗଣାରେ ୩ ହଜାର ଗାଁରେ ମାଗଣା ବିଜୁଳି ପହଁଚିଛି, ୪୨ ଲକ୍ଷ ଗରିବ ମା’ ଭଉଣୀଙ୍କୁ ଉଜ୍ଜଳା ଯୋଜନାରେ ମାଗଣା ଗ୍ୟାସ ମିଳିଛି, ପ୍ରାୟ ଦେଢ କୋଟି ଲୋକଙ୍କର ବ୍ୟାଙ୍କ ଖାତା ଖୋଲାଯାଇଛି, ୫୦ ଲକ୍ଷ ଶୌଚାଳୟ ମହିଳାଙ୍କ ଇଜ୍ଜତ ଘରସ୍ୱରୂପ ବନାଯାଇଛି । ମୋଦିଙ୍କ ପାଇଁ ଏହା ସମ୍ଭବ ହୋଇପାରିଛି । ଅନ୍ୟପଟେ କାଶୀପୁରରେ ପାଇପରେ ପାନୀୟ ଜଳ ଆସୁନାହିଁ, ୨୪ ଘଂଟା ବିଜୁଳି ନାହିଁ, ଡାକ୍ତର ନାହାଁନ୍ତି, ଆଦିବାସୀ ପଛୁଆ ଜାତିକୁ ରୋଜଗାର ମିଳୁନଥିବା ବେଳେ ବାହାରକୁ ରୋଜଗାର କରିବାର କରିବା ପାଇଁ ଯିବାକୁ ବାଧ୍ୟ ହେଉଛି । ରାୟଗଡାରେ ଜଣେ ଓ ତୃତୀୟ ମହଲାରେ ଜଣେ ଆନାକୁଣ୍ଡା ଅଛି । ଏ ଆନାକୁଣ୍ଡା ମାନଙ୍କୁ ଓଡିଆ ବୀର ଏଥର କବର ଦେବ । ଯେଉଁମାନେ ରୋଜଗାର, ଜମିକୁ ପାଣି, ଶିକ୍ଷକ, ଡାକ୍ତର, ବିଜୁଳି ଦେଉନାହାନ୍ତି ସେମାନଙ୍କୁ ପରାସ୍ତ କରିବାର ସମୟ ଆସିଛି ବୋଲି ଶ୍ରୀ ପ୍ରଧାନ କହିଛନ୍ତି । ଚିଟ୍ଫଣ୍ଡ କାରବାରରେ ଥିବା ଲିପ୍ତ ଥିବା ଲୋକମାନଙ୍କୁ ବାହାର କରିବା ଦରକାର ବୋଲି ସେ କହିଛନ୍ତି ।
ଶ୍ରୀ ପ୍ରଧାନ କହିଛନ୍ତି ଯେ ୧୯ ବର୍ଷରେ ନବୀନ ବାବୁ କାଶୀପୁର ଆସି ଓଡିଆରେ ଦୁଇ ପଦ କଥା ହୋଇନାହାନ୍ତି । ଯେ ଓଡିଆ ଭାଷା ବୁଝିନାହିଁ, ସେ କଣ ସମସ୍ୟା ବୁଝିବ ବୋଲି ସେ ପ୍ରଶ୍ନ କରିଛନ୍ତି । କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଗାମୀ ୫ ବର୍ଷରେ ରାୟଗଡାରେ ସବୁ ଗରିବ ଲୋକଙ୍କ ନାଁରେ ଜମି ପଟ୍ଟା କରିବାକୁ ଇଚ୍ଛା ରଖିଛନ୍ତି । ସମସ୍ତ ମୌଳିକ ସୁବିଧା ତଥା ରୋଜଗାର ଓ ଅନ୍ୟାନ୍ୟ ପାଇଁ ରାଜ୍ୟ ସରକାରକୁ ବଦଳାଇ ବିକାଶ, ସୁରକ୍ଷା ଓ ସମ୍ମାନ ବଢାଇଥିବା ସରକାରକୁ ଆଣାଯିବା ଦରକାର ।
ନବୀନ ବାବୁ ଦେଶରେ ଅସ୍ଥିର ସରକାର କରିବାକୁ ଚାହୁଁଛନ୍ତିା କାରଣ ଦେଶରେ ଅସ୍ଥିର ସରକାର ହେଲେ ନବୀନ ବାବୁ ଓ ତାଙ୍କ ଆନାକୁଣ୍ଡାମାନେ ଦୁଇ ପଇସା ରୋଜଗାର କରିବାର ସୁଯୋଗ ପାଇବେ । ଦେଶରେ ମଜବୁର ନୁହେଁ ମଜଭୂତ ସରକାର ହେବା ଦରକାର । ମୋଦି ହିଁ ମଜଭୂତ ସରକାର ଦେଇ ପାରିବେ ବୋଲି ଶ୍ରୀ ପ୍ରଧାନ କହିଛନ୍ତି ।
