ଖେଳ ଭାଇଚାରା ସୃଷ୍ଟିର ଉତ୍କୃଷ୍ଟ ମାଧ୍ୟମ : ବିଇଓ
ବେଲଗୁଣ୍ଠା, -(ଶିବରାମ ଚୌଧୁରୀ )-,ବେଲଗୁଣ୍ଠା ବ୍ଳକ୍ କ୍ଷତ୍ରିୟବରପୁର ଉଚ୍ଚ ବିଦ୍ୟାଳୟ ପଡିଆରେ ବେଲଗୁଣ୍ଠା ପଂଚାୟତ ସମିତି ଆନୁକୂଲ୍ୟରେ ତିନି ଦିନିଆ ବ୍ଳକ୍ ସ୍ତରୀୟ ସାଂସଦ ଖେଳ ମହୋତ୍ସବ ଉଦଯାପିତ ହୋଇଯାଇଛି I ବେଲଗୁଣ୍ଠା ଗୋଷ୍ଠୀ ଉନ୍ନୟନ ଅଧିକାରୀ କଳାକୃଷ୍ଣ ପ୍ରଧାନଙ୍କ ତତ୍ତ୍ୱାବଧାନରେ ଅନୁଷ୍ଠିତ ଏହି ଖେଳ ମହୋତ୍ସବରେ ବ୍ଳକ୍ ର ୧୮ ଟି ପଂଚାୟତରୁ ପ୍ରାୟ ଚାରିଶହ କ୍ରୀଡ଼ାବିତ୍ ଅଂଶଗ୍ରହଣ କରିଥିଲେ I ପ୍ରଥମ ପର୍ଯ୍ୟାୟ କବାଡ଼ି, ଭଲିବଲ୍, ବ୍ୟାଡ୍ ମିଣ୍ଟନ୍,କ୍ରିକେଟ୍ ଆଦି କ୍ରୀଡା ଅନୁଷ୍ଠିତ ହୋଇଥିବା ବେଳେ ଦ୍ୱିତୀୟ ପର୍ଯ୍ୟାୟରେ ଦୌଡକୁଦ ପ୍ରତିଯୋଗିତା ଅନୁଷ୍ଠିତ ହୋଇଥିଲା I କ୍ରିକେଟ୍ ରେ ଉଢୁରା ପଂଚାୟତ ବିଜେତା ହୋଇଥିବା ବେଳେ ଗାଙ୍ଗପୁର ପଂଚାୟତ ଉପବିଜେତା ହୋଇଥିଲା I ସେହିପରି ଭଲିବଲ୍ ରେ ଗାଙ୍ଗପୁର,ବରିଷ୍ଠ କବାଡ଼ିରେ କ୍ଷତ୍ରିୟବରପୁର ଆଦି ଟିମ୍ ଶ୍ରେଷ୍ଠ ପ୍ରଦର୍ଶନ କରିଥିଲେ I ଏହି ମହୋତ୍ସବରେ ମୁଖ୍ୟ ଅତିଥି ରୂପେ ବେଲଗୁଣ୍ଠା ଗୋଷ୍ଠୀ ଶିକ୍ଷା ଅଧିକାରିଣୀ ଲୋପାମୁଦ୍ରା ରଥ ଯୋଗ ଦେଇ ଖେଳ ମଣିଷକୁ ଶାରୀରିକ ଭାବେ ସୁସ୍ଥ ରଖିବା ସହିତ ସେମାନଙ୍କୁ ଶୃଙ୍ଖଳିତ କାରିଥାଏ ବୋଲି ବକ୍ତବ୍ୟ ରଖିଥିଲେ I ଏହା ସହ ଶ୍ରୀମତୀ ରଥ ଖେଳ ହିଁ ଭାଇ ଚାରା ସୃଷ୍ଟିର ଉତ୍କୃଷ୍ଟ ମାଧ୍ୟମ ବୋଲି ପ୍ରକାଶ କରିଥିଲେ I ଏଥିରେ ମୁଖ୍ୟ ବକ୍ତା ରୂପେ କ୍ଷତ୍ରିୟବରପୁର ସରପଞ୍ଚ କମଳ କୁମାରୀ ପ୍ରଧାନ ଯୋଗ ଦେଇଥିବା ବେଳେ ସମ୍ମାନିତ ଅତିଥି ରୂପେ ବ୍ଳକ୍ ସହକାରୀ ନିର୍ବାହି ଯନ୍ତ୍ରୀ ପ୍ରକାଶ ଚନ୍ଦ୍ର ତ୍ରିପାଠି, କନିଷ୍ଠ ଯନ୍ତ୍ରୀ କ୍ଷୀରୋଦ ଦାସ,ପଂଚାୟତ ନୀର୍ବାହୀ ଅଧିକାରୀ ପ୍ରମୁଖ ମଞ୍ଚାସୀନ ରହି ଖେଳରେ ଅଂଶଗ୍ରହଣକାରୀ ଯୁବଗୋଷ୍ଠୀଙ୍କୁ ଉତ୍ସାହିତ କରିବା ସହିତ ଶ୍ରେଷ୍ଠ ପ୍ରଦର୍ଶନ କରିଥିବା କ୍ରୀଡ଼ାବିତଙ୍କୁ ପୁରସ୍କୃତ କରିଥିଲେ I କାର୍ଯ୍ୟକ୍ରମରେ ବେଲଗୁଣ୍ଠା ବ୍ଳକ୍ କ୍ରୀଡ଼ା ସମ୍ପାଦକ ଆଶୁତୋଷ ସ୍ଵାଇଁଙ୍କ ନେତୃତ୍ୱରେ ବ୍ଳକ୍ ର ସମସ୍ତ କ୍ରୀଡ଼ା ଶିକ୍ଷକ ସହଯୋଗ କରିଥିଲେ I











