ବିଧାୟିକାଙ୍କ ବିରୋଧରେ ଅପପ୍ରଚାରକୁ ନେଇ ବର୍ଷିଲା ବିଜେଡି
ବିଧାୟିକାଙ୍କୁ ବଦନାମ କରିବାକୁ ବାରମ୍ବାର କରାଯାଉଛି ମିଥ୍ୟା ଅପପ୍ରଚାର
"କିଛି ଗଣମାଧ୍ୟମ ଉଦ୍ଦେଶ୍ୟମୂଳକ ଭାବରେ ପଦ୍ମପୁର ନିର୍ବାଚନ ମଣ୍ଡଳୀରେ ବିରୋଧୀ ମାନଙ୍କ ଏଜେଣ୍ଡା ଅନୁସାରେ ବିଧାୟିକାଙ୍କୁ ବଦନାମ କରିବାର ପ୍ରୟାସ କରୁଛନ୍ତି"
ପଦ୍ମପୁର : ( ଶିବାଶିଷ ପଟ୍ଟନାୟକ ) ପଦ୍ମପୁର ନିର୍ବାଚନ ମଣ୍ଡଳୀର ବିଧାୟିକା ବର୍ଷା ସିଂ ବରିହାଙ୍କ ନାମ , ଗତ ଉପନିର୍ବାଚନରେ ବିଜୁ ଜନତା ଦଳର ପ୍ରାର୍ଥୀ ଭାବରେ ମୁଖ୍ୟମନ୍ତ୍ରୀଙ୍କ ଦ୍ୱାରା ଘୋଷଣା କରାଯିବା ପରଠାରୁ ବିରୋଧୀ ଓ କିଛି ଖଳ ପ୍ରକୃତିର ଲୋକଙ୍କ ଆରମ୍ଭ ହୋଇଯାଇଥିଲା ବର୍ଷାଙ୍କ ଵିରୋଧରେ ଅପପ୍ରଚାର ଓ ଷଡ଼ଯନ୍ତ୍ର । ପ୍ରଥମେ କେମିତି ଓ କଣ କଲେ ବର୍ଷାଙ୍କୁ ଉପନିର୍ବାଚନରେ ହରେଇ ହେବ ସେଥିପାଇଁ ଯିଏ ଯାହା ପାରିଲା ଅପପ୍ରଚାର କଲା । କିନ୍ତୁ ଉପନିର୍ବାଚନ ସମୟରେ ବିରୋଧୀଙ୍କୁ ଧୂଳି ଚଟେଇ ରେକର୍ଡ ସଂଖ୍ୟକ ଭୋଟ ବ୍ୟବଧାନରେ ବିଜୟ ଲାଭ କରିଥିବା ବର୍ଷା ସିଂ ବରିହା ବିରୋଧୀଙ୍କୁ କଡା ଜବାବ ଦେବାରେ ସକ୍ଷମ ହୋଇଥିଲେ । ଉପନିର୍ବାଚନ ପରେ ମଧ୍ୟ କ୍ରମାଗତ ଭାବରେ ତାଙ୍କ ବିରୋଧରେ ଲଗାତାର ଅପପ୍ରଚାରର ମହୋଲ କୁ ଗରମ କରି ରଖିଛନ୍ତି ବିରୋଧୀ । ଏହାର ଏକ ମାତ୍ର କାରଣ ହେଲା ପଦ୍ମପୁର ନିର୍ବାଚନ ମଣ୍ଡଳୀରେ ବୃଦ୍ଧି ପାଉଥିବା ବର୍ଷାଙ୍କ ଲୋକପ୍ରିୟତା । ଉପନିର୍ବାଚନ ପରେ ବିଧାୟିକା ବର୍ଷା ସିଂ ବରିହା ପ୍ରତ୍ୟେକ ଦିନ ସକାଳୁ ବିଳମ୍ବିତ ରାତ୍ରୀ ପର୍ଯ୍ୟନ୍ତ ନିର୍ବାଚନ ମଣ୍ଡଳୀ ର ଗାଁ ଗାଁ ବୁଲି ନିଜର ଲୋକ ସମ୍ପର୍କ ବଢାଇବା ସହିତ ଲୋକଙ୍କ ସୁଖଦୁଃଖ ରେ ପ୍ରତ୍ୟକ୍ଷ ଭାବରେ ସାମିଲ ହେଉଛନ୍ତି । ଯାହା ଫଳରେ ବର୍ତ୍ତମାନ ସେ ପଦ୍ମପୁର ନିର୍ବାଚନ ମଣ୍ଡଳୀର ଘରେ ଘରେ ନିଜର ସ୍ୱତନ୍ତ୍ର ଛାପ ଛାଡି ପାରିଛନ୍ତି । ମୁଖ୍ୟତଃ ମହିଳା ଓ ଯୁବ ସମାଜ ଭିତରେ ବୃଦ୍ଧି ପାଉଥିବା ବର୍ଷାଙ୍କ କ୍ରେଜ କୁ ସହଜରେ ହଜମ କରି ପାରୁ ନାହାନ୍ତି ବିରୋଧୀ । ଏଣୁ ବିରୋଧୀଙ୍କ ବର୍ତ୍ତମାନ କେବଳ ଗୋଟିଏ ଉଦ୍ଦେଶ୍ୟ ଯେ ଜେଣ ତେଣ ପ୍ରକାରେଣ ବିଧାୟିକା ଙ୍କୁ ବଦନାମ କରିବାର ପ୍ରୟାସ କ୍ରମାଗତ ଭାବରେ ଜାରି ରଖିଛନ୍ତି ।
ସଦ୍ୟ ଘଟିତ ଘଟଣା କ୍ରମେ ଆଜି ସକାଳୁ ଗୋଟେ ନିର୍ଦିଷ୍ଟ ଛପା ଗଣମାଧ୍ୟମ ଓ ଗୋଟେ ବୈଦୁତିକ ଗଣମାଧ୍ୟମରେ ବିଧାୟିକା ବର୍ଷାଙ୍କ ନାମରେ ପାଇକମାଲ ଥାନାରେ ଏକ ମମାଲ ରୁଜୁ ହୋଇଥିବା ମିଥ୍ୟା ଖବର ପ୍ରସାରିତ କରାଯାଇଥିଲା । କପୋଲ କଳ୍ପିତ , ଭିତ୍ତିହୀନ , ମିଥ୍ଯା ଖବର ପଦ୍ମପୁର ନିର୍ବାଚନ ମଣ୍ଡଳୀରେ ପ୍ରଚାର ହେବା ପରେ ବିଜୁ ଜନତା ଦଳର କର୍ମୀ ତଥା ନେତୃ ମଣ୍ଡଳୀ ଙ୍କର ଭିତରେ ଆଲୋଡନ ସୃଷ୍ଟି ହୋଇଥିଲା । ଏହାପରେ ସନ୍ଧ୍ୟା ସମୟରେ ପଦ୍ମପୁର ବିଜୁ ଜନତା ଦଳର କାର୍ଯ୍ୟାଳୟରେ ଦଳର ସମ୍ପାଦକ ଶ୍ରୀ ରାଜୁ ଘିବେଲା ଆଜି ପ୍ରସାରିତ ଖବର ସମ୍ପୂର୍ଣ୍ଣ ଭିତ୍ତିହୀନ ଓ କପୋଲକଳ୍ପିତ ବୋଲି ସୂଚନା ଦେବା ସହିତ ବିରୋଧି ମାନଙ୍କ ଉପରେ ବର୍ଷିଛନ୍ତି । କିଛି ଗଣମାଧ୍ୟମ ଉଦ୍ଦେଶ୍ୟମୂଳକ ଭାବରେ ପଦ୍ମପୁର ନିର୍ବାଚନ ମଣ୍ଡଳୀରେ ବିରୋଧୀ ମାନଙ୍କ ଏଜେଣ୍ଡା ଅନୁସାରେ ବିଧାୟିକାଙ୍କୁ ବଦନାମ କରିବାର ପ୍ରୟାସ କରୁଛନ୍ତି ବୋଲି ପାଇକମାଲ ବିଜୁ ଜନତା ଦଳର ସଭାପତି ଶ୍ରୀ ରାଜେନ୍ଦ୍ର ରାଉତ ସୂଚନା ପ୍ରଦାନ କରିଥିବା ବେଳେ , ଭିତ୍ତିହୀନ ସମ୍ବାଦ ପରିବେଷଣ କରି ଲୋକଙ୍କୁ ଭୁଆଁ ବୁଲେଇବା କେତେଦୂର ଉଚିତ ବୋଲି ସାଧାରଣରେ ଚର୍ଚ୍ଚା ହେଉଛି ।
