ରାଜ୍ୟବାସୀଙ୍କୁ ମୌଳିକ ସୁବିଧା ବି ଯୋଗାଇ ଦେଇ ପାରୁନାହାଁନ୍ତି ରାଜ୍ୟସରକାର
ମୁଖ୍ୟମନ୍ତ୍ରୀ ଖୋଦ୍ ଆମ ଗାଁ ଆମ ବିକାଶ ମାଧ୍ୟମରେ ପିସିକୁ ପୋତ୍ସାହନ ଦେଉଛନ୍ତି
ଦୀର୍ଘ ୧୯ ବର୍ଷ ଶାସନ ସତ୍ୱେ ରାଜ୍ୟରେ ୩୪ ଲକ୍ଷ ଭୋକିଲା ଥିବା ମୁଖ୍ୟମନ୍ତ୍ରୀ ନିଜେ ପରୋକ୍ଷରେ ସ୍ୱୀକାର କରିବା ହିଁ ଶାସକ ବିଜେଡିର ସବୁଠୁ ବଡ ବିଫଳତା
ଛତିଶଗଡ, ମଧ୍ୟପ୍ରଦେଶ ଏବଂ ଗୁଜୁରାଟ ଭଳି ବିଜେପି ଶାସିତ ରାଜ୍ୟରେ ୨୪ ଘଂଟିଆ ବିଜୁଳି ଲୋକମାନଙ୍କୁ ଯୋଗାଇ ଦିଆଯାଉଛି
ଧାନ କିଣିବା ସମୟରେ ରାଜ୍ୟସରକାର ଚାଷୀଙ୍କୁ ବୋନସ ଦିଅନ୍ତୁ
ରାଜ୍ୟରେ ସ୍ୱାସ୍ଥ୍ୟସେବା ବିପର୍ଯ୍ୟସ୍ତ ହୋଇ ପଡିଛି
ଗାଁ ମାନଙ୍କରେ ଥିବା ଅଙ୍ଗନବାଡି କର୍ମୀମାନଙ୍କ ଠାରୁ ପିସି ଆଦାୟ କରାଯାଉଛି
ବିଜେପି କାର୍ଯ୍ୟକର୍ତାମାନେ ବୁଥ ସ୍ତରରେ କ୍ଷିପ୍ର ଗତିରେ କାର୍ଯ୍ୟ କରୁଛନ୍ତି
ଭୁବନେଶ୍ୱର(manasi mishra) : ରାଜ୍ୟସରକାର ରାଜ୍ୟବାସୀଙ୍କୁ ମୌଳିକ ସୁବିଧା ଯୋଗାଇ ଦେଇ ପାରୁନାହାଁନ୍ତି । ଦୀର୍ଘ ୧୯ ବର୍ଷ ଧରି ବିଜେଡି ସରକାର ବ୍ୟାପକ ଭଷ୍ଟ୍ରାଚାର କରିଚାଲିଛି । ପିସି ବନ୍ଦ କରିବା କଥା କହୁଥିବା ମୁଖ୍ୟମନ୍ତ୍ରୀ ଖୋଦ୍ ଆମ ଗାଁ ଆମ ବିକାଶ ମାଧ୍ୟମରେ ପିସିକୁ ପୋତ୍ସାହନ ଦେଉଛନ୍ତି । ବିକାଶର କାର୍ଯ୍ୟ ପାଇଁ ଟେଣ୍ଡର ହେଉନାହିଁ । ଗାଁ ଗାଁରେ ବିଜେଡିର ନେତାଠୁ ଆରମ୍ଭ କରି କାର୍ଯ୍ୟକର୍ତା ପର୍ଯ୍ୟନ୍ତ ସମସ୍ତେ ଦଲାଲି କରି ଚାଲିଛନ୍ତି ବୋଲି ବିଜେପି ରାଷ୍ଟ୍ରୀୟ ସାଧାରଣ ସଂପାଦକ ଓ ରାଜ୍ୟ ବିଜେପି ପ୍ରଭାରୀ ଅରୁଣ ସିଂ ଅଭିଯୋଗ କରିଛନ୍ତି ।
ରାଜ୍ୟ କାର୍ଯ୍ୟାଳୟରେ ଏକ ସାମ୍ବାଦିକ ସମ୍ମିଳନୀରେ ଶ୍ରୀ ସିଂହ କହିଛନ୍ତି ଯେ, ରାଜ୍ୟର ଗ୍ରାମାଂଚଳର ବିକାଶ ପାଇଁ ମୁଖ୍ୟମନ୍ତ୍ରୀ ଆରମ୍ଭ କରିଥିବା ଆମ ଗାଁ ଆମ ବିକାଶ କାର୍ଯ୍ୟକ୍ରମରେ କୌଣସି ଜନପ୍ରତିନିଧୀମାନଙ୍କୁ ସାମିଲ କରାନଯିବା ଅତ୍ୟନ୍ତ ଦୁର୍ଭାଗ୍ୟଜନକ ଘଟଣା । ଏହି ଯୋଜନାକୁ ଖୋଦ୍ ମୁଖ୍ୟମନ୍ତ୍ରୀ ପରିଚାଳନା କରୁଥିବାବେଳେ ଏହା ମାଧ୍ୟମରେ ବ୍ୟାପକ ଭ୍ରଷ୍ଟାଚାର ହେଉଛି । ପଂଚାୟତ ସଭ୍ୟ, ସରପଂଚ,ୱାର୍ଡ ମେମ୍ବର, ଏପରିକି ବିଧାୟକମାନଙ୍କୁ ଏଥିରେ ନିବୃତ ରଖାଯାଉଛି । ଏହି କାର୍ଯ୍ୟକ୍ରମକୁ ଗ୍ରାମ ସଭା ନକରି ସିଧାସଳଖ ବିଜେଡି ଦଳୀୟ ନେତାଙ୍କୁ ଦେଇ ୩ ପ୍ରତିଶତରୁ ୧୦ ପ୍ରତିଶତ ପିସି ଆଦାୟ କରାଯାଉଛି । ଗାଁ ମାନଙ୍କରେ ଥିବା ଅଙ୍ଗନବାଡି କର୍ମୀମାନଙ୍କ ଠାରୁ ପିସି ଆଦାୟ କରାଯାଉଛି । ଅନ୍ୟ ପଟେ ସରକାର ଠିକାଦାରମାନଙ୍କୁ ପୋଷି ଚାଲିଛନ୍ତି ବୋଲି ଶ୍ରୀ ସିଂ ଅଭିଯୋଗ କରିଛନ୍ତି ।
ରାଜ୍ୟରେ ୧୯ ବର୍ଷ ମଧ୍ୟରେ ଯୁବକମାନଙ୍କୁ ନିଯୁକ୍ତି ଦେବାରେ ରାଜ୍ୟସରକାର ସଂପୂର୍ଣ୍ଣଭାବେ ବିଫଳ ହୋଇଛନ୍ତି । ସେଥିପାଇଁ ବିଜୁ ଯୁବ ବାହିନୀ ନାମରେ ଏକ ଯୋଜନା କରି ନବୀନ ସରକାର ରାଜ୍ୟବାସୀଙ୍କ ଆଖିରେ ଧୂଳି ଦେବାକୁ ଚେଷ୍ଟା କରୁଛନ୍ତି । ଆଗାମୀ ନିର୍ବାଚନକୁ ଆଖିରେ ରଖି ବିଜେଡି ସରକାର ପୁଣି ଥରେ ଏକ ବିଭ୍ରାନ୍ତିକର ଯୋଜନା କରି ଯୁବକମାନଙ୍କୁ ପ୍ରତାରଣା କରିବାକୁ ଉଦ୍ୟମ କରୁଛି । ଗତ ୨୦୦୯ ନିର୍ବାଚନ ପୂର୍ବରୁ ଶାସକ ବିଜେଡି ‘ଗ୍ରାମ ସାଥୀ’ ନାମରେ ଏକ ଯୋଜନା କରି ଲକ୍ଷ ଲକ୍ଷ ଲୋକଙ୍କୁ ସାମିଲ କରାଇଥିଲା । ସେହିପରି ୨୦୧୪ ନିର୍ବାଚନ ସମୟରେ ‘କୃଷକ ସାଥୀ’ନାମରେ ଏକ ଯୋଜନା କରି ରାଜ୍ୟସରକାର ସମାନ ନୀତି ଆପଣେଇଥିଲେ । ଆଉ ଏବେ ବିଜୁ ଯୁବ ବାହିନୀରେ କିଛି ଦଳୀୟ ଯୁବକମାନଙ୍କୁ ସାମିଲ କରି ସେମାନଙ୍କୁ କିଛି ଅର୍ଥ ଦେଇ ‘ଲଲିପପ୍’ ଧରାଇଛନ୍ତି । ବିଜେଡି ହେଉଛି ବାସ୍ତବରେ ‘ଲଲିପପ୍ର ସରକାର’ ବୋଲି ଶ୍ରୀ ସିଂ କହିଛନ୍ତି ।
ରାଜ୍ୟରେ ବିଦୁ୍୍ୟତର ଘୋର ଅଭାବ ଦେଖା ଦେଇଛି । ରାଜ୍ୟର ସବୁ ଅଂଚଳରେ ଅଘୋଷିତ ବିଦୁ୍ୟତ୍ କଟ୍ ହେଉଛି । ରାଜ୍ୟ ସରକାର ଏହାର ସମାଧାନ କରିପାରୁ ନାହାଁନ୍ତି । ପଡୋଶୀ ଛତିଶଗଡ, ମଧ୍ୟପ୍ରଦେଶ ଏବଂ ଗୁଜୁରାଟ ଭଳି ବିଜେପି ଶାସିତ ରାଜ୍ୟରେ ୨୪ ଘଂଟିଆ ବିଜୁଳି ସେବା ଲୋକମାନଙ୍କୁ ଯୋଗାଇ ଦିଆଯାଉଛି ବୋଲି ଶ୍ରୀ ସିଂହ କହିଛନ୍ତି ।
ସେହିପରି ରାଜ୍ୟରେ ସ୍ୱାସ୍ଥ୍ୟସେବା ବିପର୍ଯ୍ୟସ୍ତ ହୋଇ ପଡିଛି । ସରକାରୀ ଡାକ୍ତରଖାନାରେ ରୋଗୀ ଦେଖିବା ପାଇଁ ଡାକ୍ତର ନାହାଁନ୍ତି । ମାଗଣା ଔଷଧ ବଂଟନ କରୁଥିବାର ଦାବି କରୁଥିବା ସରକାର ଗରିବ ରୋଗୀମାନଙ୍କୁ ଔଷଧ ଯୋଗାଇ ପାରୁନି ଏବଂ ଯାହା ବି ମିଳୁଛି ତାହା ପୁଣି ନିମ୍ନ ମାନର ଔଷଧ ବୋଲି ପ୍ରମାଣିତ ହୋଇଛି । ଲୋକମାନଙ୍କୁ ମୌଳିକ ସୁବିଧା ଯୋଗାଇବାରେ ରାଜ୍ୟସରକାର ସଂପୂର୍ଣ୍ଣରୂପେ ଫେଲ୍ ମାରିଛନ୍ତି । ସବୁ ସ୍ଥାନରେ ଆମ୍ବୁଲାନ୍ସ ପହଂଚି ପାରୁନଥିବାରୁ ସାଧାରଣ ଲୋକ ମେଡିକାଲ ଚିକିତ୍ସାରୁ ବଂଚିତ ହେଉଛି ବୋଲି ଶ୍ରୀ ସିଂ କହିଛନ୍ତି ।
ରାଜ୍ୟ ସରକାରଙ୍କ ନିଜସ୍ୱ ଖାଦ୍ୟ ସୁରକ୍ଷା ଯୋଜନା ପ୍ରସଙ୍ଗରେ ଉତର ଦେଇ ଶ୍ରୀ ସିଂହ କହିଛନ୍ତି ଯେ, ଶାସକ ବିଜେଡିର ଦୀର୍ଘ ୧୯ ବର୍ଷ ଶାସନ ସତ୍ୱେ ରାଜ୍ୟରେ ୩୪ ଲକ୍ଷ ଭୋକିଲା ଥିବା ମୁଖ୍ୟମନ୍ତ୍ରୀ ନିଜେ ପରୋକ୍ଷରେ ସ୍ୱୀକାର କରିଛନ୍ତି । ଏହା ହିଁ ଶାସକ ବିଜେଡିର ସବୁଠୁ ବଡ ବିଫଳତା ବୋଲି ଶ୍ରୀ ସିଂହ କହିଛନ୍ତି ।
ରାଜ୍ୟରେ ଚାଷୀମାନେ ବହୁତ ଦୟନୀୟ ଅବସ୍ଥାରେ ଅଛନ୍ତି । ରାଜ୍ୟ ସରକାର ଚାଷୀମାରଣ ନୀତି ଅବଲମ୍ବନ କରୁଛନ୍ତି । ମଧ୍ୟପ୍ରଦେଶ ସରକାର ଚାଷୀଙ୍କମାନଙ୍କୁ ବିନା ସୁଧରେ ଋଣ ଦେଉଛନ୍ତି । ଠିକ୍ ସେହିପରି ନବୀନ ସରକାର ଓଡିଶାରେ ଲାଗୁ କରିବା ପାଇଁ ବିଜେପି ଦାବି କରୁଛି । ଏଥି ସହ ଧାନ କିଣିବା ସମୟରେ ରାଜ୍ୟସରକାର ଚାଷୀଙ୍କୁ ବୋନସ ଦିଅନ୍ତୁ ବୋଲି ଶ୍ରୀ ସିଂହ ଦାବି କରିଛନ୍ତି ।
ଆଗାମୀ ନିର୍ବାଚନକୁ ଦୃଷ୍ଟିରେ ରଖି ବିଜେପି କାର୍ଯ୍ୟକର୍ତାମାନେ ବୁଥ ସ୍ତରରେ କ୍ଷିପ୍ର ଗତିରେ କାର୍ଯ୍ୟ କରୁଛନ୍ତି । ରାଜ୍ୟରେ ବିଜେପି ସଙ୍ଗଠନର ଶକ୍ତି ୧୦ ଗୁଣା ବୃଦ୍ଧି ପାଇଛି । ପ୍ରତିଦିନ ସୋସିଆଲ ମିଡିଆରେ ଲକ୍ଷ ଲକ୍ଷ କାର୍ଯ୍ୟକର୍ତା ଯୋଡି ହେଉଛନ୍ତି । ମୋଦି ସରକାରଙ୍କ ଜନକଲ୍ୟାଣ ଯୋଜନାକୁ ନେଇ ବିଜେପି ତୃଣମୂଳସ୍ତରରେ ପହଂଚାଉଛି । ଓଡିଶାବାସୀ ବିଜେଡିକୁୁ ପ୍ରତ୍ୟାଖାନ କରିବା ଆରମ୍ଭ କଲେଣି । ଶ୍ରୀ ସିଂହ ଦୁଇ ଦିନିଆ କେନ୍ଦୁଝର ଓ ମୟୁରଭଂଜ ଜିଲ୍ଲା ଗସ୍ତ କରି ଧରି ସାଙ୍ଗଠନିକ ବୈଠକରେ ଯୋଗଦେଇ ତୃଣମୂଳସ୍ତରରେ ହେଉଥିବା ବ୍ୟାପକ ଦୁର୍ନୀତି ସଂପର୍କରେ ଅବଗତ ହୋଇଥିବାର କହିବା ସହ ଆଗାମୀ ଦିନରେ ରାଷ୍ଟ୍ରୀୟ ଅଧ୍ୟକ୍ଷ ଶ୍ରୀ ଅମିତ ଶାହା ଦେଇଥିବା ମିଶନ ୧୨୦+ ଲକ୍ଷ ଓଡିଶାରେ ନିଶ୍ଚିତ ପୂରଣ ହେବ ବୋଲି ଶ୍ରୀ ସିଂହ ଦୃଢୋକ୍ତି ପ୍ରକାଶ କରିଛନ୍ତି । ଏହି ସାମ୍ବାଦିକ ସମ୍ମିଳନୀରେ ରାଜ୍ୟ ବିଜେପି ଉପସଭାପତି ଶ୍ରୀ ସମୀର ମହାନ୍ତି ଏବଂ ମୁଖପାତ୍ର ଶ୍ରୀ ଗୋଲକ ମହାପାତ୍ର ପ୍ରମୁଖ ଉପସ୍ଥିତ ଥିଲେ ।
