ନୂଆଦିଲ୍ଲୀ/ଭୁବନେଶ୍ୱର:(ଚକ୍ରଧର ମାଝି): ରାଜ୍ୟରେ ଦଶଟି ମଣ୍ଡି ଇ-ନାମ ପ୍ଲାଟଫର୍ମ ସହ ଯୋଡି ହୋଇଥିବା ବେଳେ ଓଡିଶା ଷ୍ଟେଟ ଏଗ୍ରିକଲଚରାଲ ମାର୍କେଟିଂ ବୋର୍ଡ (ଓଏସଏଏମବି)ର ନିୟନ୍ତ୍ରଣ ଓ ତତ୍ୱାବଧାନରେ କାମ କରୁଥିବା ରାଜ୍ୟର ସମସ୍ତ ୬୬ଟି ରେଗୁଲେଟେଡ ମାର୍କେଟ କଂପ୍ଲେକ୍ସକୁ ଯୋଡିବାକୁ ଅନୁରୋଧ କରିଛନ୍ତି କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏହା ଦ୍ୱାରା ·ଷୀମାନଙ୍କୁ ଲାଭ ହେବା ସହ ସେମାନଙ୍କର ଆୟ ବଢି ପାରିବ । ଶ୍ରୀ ପ୍ରଧାନ କେନ୍ଦ୍ର କୃଷି ମନ୍ତ୍ରୀ ରାଧାମୋହନ ସିଂହଙ୍କୁ ପତ୍ର ଲେଖୀ ଏହି ଅନୁରୋଧ କରିଛନ୍ତି ।
ଶ୍ରୀ ପ୍ରଧାନ ଏହି ପତ୍ରରେ ଭୁବନେଶ୍ୱରରେ ନିକଟରେ ଅନୁଷ୍ଠିତ ହୋଇଥିବା ଏଗ୍ରି-ବିକାଶ ୨୦୧୮ରେ କେନ୍ଦ୍ର କୃଷି ମନ୍ତ୍ରଣାଳୟ ଦେଇଥିବା ସହଯୋଗ ପାଇଁ ଧନ୍ୟବାଦ ଦେଇଛନ୍ତି । ଶ୍ରୀ ପ୍ରଧାନ ଏହି ପତ୍ରରେ କହିଛନ୍ତି ଯେ ରାଜ୍ୟରେ ଥିବା ଅଧିକାଂଶ ଆରଏମସିରେ ଆବଶ୍ୟକୀୟ ସୁବିଧା ଓ ଭିତ୍ତିଭୂମିର ଅଭାବ ରହିଛି । ଏହି ଆରଏମସି ଗୁଡିକୁ ଇ- ନାମ ପ୍ଲାଟଫର୍ମ ସହ ଯୋଡିେଲେ ଭିତ୍ତିଭୂମିଓ ସୁବିଧା ମିଳିବା ସହ ଚାଷୀ ମାନଙ୍କର ସମସ୍ୟା ଦୂର ହୋଇ ପାରିବ ।
ଏଗ୍ରି ବିକାଶ -୨୦୧୮ ସମ୍ପର୍କରେ ସୂଚନା ଦେଇ ଶ୍ରୀ ପ୍ରଧାନ କହିଛନ୍ତି ଯେ ଏହି ସମ୍ମିଳନୀରେ ଏକ ହଜାରରୁ ଉର୍ଧ୍ଵ ଚାଷୀ ,କୃଷି ଉଦ୍ୟମୀ, କୃଷି ଶିକ୍ଷାବିତ, କୃଷି ଛାତ୍ର ଯୋଗ ଦେଇଥିଲେ । ଏହି ସମ୍ମିଳନୀରେ ସେ କେନ୍ଦ୍ର କୃଷି ମନ୍ତ୍ରଣାଳୟ ପକ୍ଷରୁ ଆରମ୍ଭ କରାଯାଇଥିବା ଇ- ନାମ ପ୍ଲାଟଫର୍ମର ସଫଳତା ସମ୍ପର୍କରେ କହିଥିଲେ । ଏହା ଦ୍ୱାରା କିପରି ବର୍ତ୍ତମାନର କୃଷି ଉତ୍ପାଦ ମାର୍କେଟିଂ କମିଟିକୁ କୃଷକ ଓ କୃଷକ ଉତ୍ପାଦକ ସଂଗଠନ ମାନଙ୍କ ସହ ଯୋଡା ଯାଇ କୃଷକ ମାନଙ୍କ ପାଇଁ ବଜାର ସୃଷ୍ଟି କରା ଯାଇ ପାରୁଛି । ସେ ସମ୍ପର୍କରେ ସେ ଏହି ସମ୍ମିଳନୀରେ କହିଥିଲେ ବୋଲି ଶ୍ରୀ ପ୍ରଧାନ ତାଙ୍କ ପତ୍ରରେ ଉଲ୍ଲେଖ କରିଛନ୍ତି ।
ଓଡିଶାରେ ୬୦ରୁ ୭୦ ପ୍ରତିଶତ ଲୋକ ଚାଷ ଓ ଏହା ସହ ଜଡିତ ଅନ୍ୟ ଆନୁଷଙ୍ଗିକ କାମ ଦ୍ୱାରା ନିଜର ଜୀବିକା ନିର୍ବାହ କରିଥାନ୍ତି । ତେବେ କୃଷି ଉତ୍ପାଦର ବିପଣନ ଓ ପ୍ରକ୍ରିୟାକରଣରେ ରାଜ୍ୟର ଚାଷୀମାନେ ପଛରେ ଥିବା କାରଣରୁ କୃଷି କ୍ଷେତ୍ରରେ ପ୍ରତି ବ୍ୟକ୍ତିି ଆୟ ଖୁବ କମ ରହିଛି । ଏହି ପରିପ୍ରେକ୍ଷୀରେ କୃଷକ ଓ କୃଷି ସମ୍ପର୍କିତ ସଂଗଠନ ଗୁଡିକୁ ଇ- ନାମ ସହ ଯୋଡିବାର ଆବଶ୍ୟକତା ରହିଛି । ଏହା ଦ୍ୱାରା ଚାଷୀ ମାନେ ସେମାନଙ୍କର ଉତ୍ପାଦର ସଠିକ ମୂଲ୍ୟ ପାଇ ପାରିବେ ଓ କେନ୍ଦ୍ର ସରକାର ୨୦୨୨ ସୁଦ୍ଧା ଚାଷୀମାନଙ୍କର ଆୟକୁ ଦ୍ୱିଗୁଣିତ କରିବାର ଧାର୍ଯ୍ୟ ଲକ୍ଷ୍ୟକୁ ହାସଲ କରାଯାଇପାରିବ ବୋଲି ସେ ଏହି ପତ୍ରରେ ଉଲ୍ଲେଖ କରିଛନ୍ତି ।
ରାଜ୍ୟର ଏହି ବଜାର ଗୁଡିକୁ ଇ- ନାମ ପ୍ଲାଟଫର୍ମ ସହ ଯୋଡିବା ପାଇଁ ସହଯୋଗ କରିବା ପାଇଁ ସେ ଏହି ସମ୍ମିଳନୀରେ କହିଥିବା ଏହି ପତ୍ରରେ ଦର୍ଶାଇଛନ୍ତି । ତେଣୁ ରାଜ୍ୟର ସମସ୍ତ ୬୬ଟି ରେଗୁଲେଟେଡ ମାର୍କେଟ କଂପ୍ଲେକ୍ସକୁ ଯୋଡିବାକୁ ଅନୁରୋଧ କରିଛନ୍ତି କେନ୍ଦ୍ରମନ୍ତ୍ରୀ ।
