ବାରିପଦା(ଅରବିନ୍ଦ ଦାସ )- ଅଗଷ୍ଟ ୪ ରବିବାର ହାଟକୁ ଯାଇ ନିରୁଦ୍ଧିଷ୍ଟ ରହିଥିବା ଏକ ମହିଳାଙ୍କ ଗଳିତ ଶବକୁ ଆଜି ବାରିପଦା ସଦର ଥାନା ପୁଲିସ ଉଦ୍ଧାର କରିଛି । ଉକ୍ତ ଘଟଣାକୁ ନେଇ ପୁଲିସ ପକ୍ଷରୁ ଥାନାରେ ଏକ ଅପମୃତ୍ୟୁ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଛି । ପ୍ରାପ୍ତ ସୂଚନାରୁ ଜଣାପଡ଼ିଛି, ବାରିପଦା ସଦର ଥାନା ଅନ୍ତର୍ଗତ ଗୋବର୍ଦ୍ଧନଶୋଳ ଗ୍ରାମର ଚମ୍ପା ମାର୍ଣ୍ଡି ଗତ ରବିବାର ଘରୁ ହାଟକୁ ଯାଇ ଆଉ ଘରକୁ ଫେରିନଥିଲେ  । ଆଜି ବିଲରେ ଚମ୍ପାର ଗଳିତ ଶବ ପଡ଼ିଥିବାର ଖବରପାଇ ଘଟଣାସ୍ଥଳରେ ଘର ଲୋକମାନେ ପହଁଞ୍ଚି ଶବକୁ ଚିହ୍ନଟ କରିବା ସହ ବାରିପଦା ସଦର ଥାନାକୁ ଖବର ଦେଇଥିଲେ । ପୁଲିସ ପହଁଞ୍ଚି ଶବକୁ ଜବତ କରି ବ୍ୟବଚ୍ଛେଦ ନିମନ୍ତେ ସ୍ଥାନୀୟ ପିଆରଏମ ସରକାରୀ ମେଡ଼ିକାଲ କଲେଜକୁ ପଠାଇ ଦେଇଛି । ତେବେ ଚମ୍ପାଙ୍କ ପୁଅ ତଥା ଗୋବର୍ଦ୍ଧନଶୋଳ ଗ୍ରାମର ୱାଡ ମେମ୍ବର  ଦୁର୍ଗା ମାର୍ଣ୍ଡିଙ୍କ କହିବା ଅନୁସାରେ ତାଙ୍କ ମା ଚମ୍ପା ପ୍ରାୟତଃ ତାଙ୍କ ବାପ ଓ ଝିଅ ଘରେ ରହିଥାନ୍ତି । ଆଜି ଗ୍ରାମରେ ସମ୍ପର୍କିୟ ଖୁଡ଼ିଙ୍କ ନିକଟରୁ ମା ଚମ୍ପା ବିଲରେ ମରି ପଡ଼ିଥିବାର ଶୁଣି ଘଟଣା ସ୍ଥଳକୁ ଯାଇ ମୃତ ମହିଳା ତାଙ୍କ ମା ଚମ୍ପା ବୋଲି ଚିହ୍ନଟ କରିଥିଲେ । ତେବେ ତାଙ୍କ ମା ଚମ୍ପାଙ୍କୁ କିଏ ମାରିଲା ଏବଂ ତାଙ୍କର କେହି ଶତ୍ରୁ ରହିଥିଲା କି ନାହିଁ ସେ ସମ୍ପର୍କରେ ପୁଅ ଦୁର୍ଗା କିଛି ଜାଣି ନାହାନ୍ତି ବୋଲି କହିଥିଲେ । ସେହିପରି ବାରିପଦା ସଦର ଏସଡ଼ିପିଓ କୃଷ୍ଣପ୍ରଦାସ ପଟ୍ଟନାୟକଙ୍କୁ ଚମ୍ପା କିପରି ମରିଲା ଏବଂ ବିଲ ମଧ୍ୟକୁ ଶବ କିପରି ଆସିଲା ଆଦି ପ୍ରଶ୍ନର ଉତ୍ତରରେ ପୁଲିସ ତଦନ୍ତ ଜାରି ରହିଛି । ବ୍ୟବଚ୍ଛେଦ ରିପୋର୍ଟ ଆସିବା ପର୍ଯ୍ୟନ୍ତ ଅପେକ୍ଷା କରିବାକୁ କହିଥିଲେ ।