ନୂଆପଡ଼ା(ଅମିତ ପୁରୋହିତ):  ନୂଆପଡ଼ା ଜିଲ୍ଲାର ବିଭିନ୍ନ ଥାନା ଅଚଂଳରୁ ଟଙ୍କା, ବାଇକ ଲୁଟ ରାହାଜାନୀ ଚାଲିଥିବା ବେଳେ ବର୍ତ୍ତମାନ ପୋଲିସ ସକ୍ରିୟ ହୋଇପଡିଥିବା ଦେଖାଯାଇଛି । ବିଶେଷ କରି ଏହି ଲୁଟେରାମାନଙ୍କ ଉପରେ ଟାର୍ଗେଟ କରି ସଫଳତା ପାଉଥିବା ତଥ୍ୟ ସାମନାକୁ ଆସୁଛି । କିଛି ଦିନତଳେ ନୂଆପଡ଼ା ଥାନା ପୋଲିସ ଗଞାମ ଜିଲ୍ଲାରୁ ୩ ଲୁଟେରା ସହ ୭ ଲକ୍ଷ ୭୦ ହଜାର ଟଙ୍କା ଜବତ କରିଥିବା ବେଳେ ବର୍ତ୍ତମାନ ନୂଆପଡ଼ା ଜିଲ୍ଲା ବୋଡେନ ଥାନା ପୋଲିସ ୨ ଜଣ ଆନ୍ତଃଜିଲ୍ଲା ଲୁଟେରାଙ୍କୁ ଗିରଫ କରିଛି । ସେମାନଙ୍କଠାରୁ ବହୁ ସାମଗ୍ରୀ ଜବତ କରାଯାଇଛି । ଏହି ଘଟଣାକୁ ବିଭିନ୍ନ ମହଲରେ ସ୍ୱାଗତ କରାଯାଇଛି । ଲୁଟେରାମାନେ ହେଲେ ପଡୋଶୀ ବଲାଙ୍ଗୀର ଜିଲ୍ଲା କଣ୍ଟାବାଞି ଥାନା ଅଣ୍ଡାଲପୁରୀ ଗାଁର ନବୀନ ନିଆଲ (୧୯) ଏବଂ ସ୍ଥାନୀୟ ବୋଡେନ ଥାନା ଡଣ୍ଡେଇବସା ଗାଁର ପ୍ରେମ ଜଗତ(୨୦) । ଏମାନଙ୍କୁ ବୋଡେନ କୋର୍ଟକୁ ଚାଲାଣ କରାଯାଇଛି । ଏମାନଙ୍କ ବିରୋଧରେ ବୋଡେନ ଥାନାରେ ୨ଟି ପୃଥକ୍ ମାମଲା (ନଂ. ୧୧୪/୧୯ ଏବଂ ୧୧୫/୧୯) ରୁଜୁ କରାଯାଇଛି । ଏହି ୨ ଜଣ ଯୁବକ ଏଥିରେ ସମ୍ପୃକ୍ତ ରହିଥିବା ସ୍ୱୀକାର କରିଛନ୍ତି । ସେମାନଙ୍କଠାରୁ ମୋବାଇଲ ଫୋନ, ଲ୍ୟାପଟପ ସହ ୨ଟି ବାଇକ ଜବତ କରାଯାଇଛି । ବିବରଣୀମତେ ଗତ ବିଳମ୍ବିତ ରାତିରେ ଦୁଇଜଣ ଯୁବକ ଗୋଟିଏ ବାଇକ୍ରେ ଆସି ପ୍ରଥମେ ଏଟିଏମକୁ ଲୁଟିବାକୁ ଉଦ୍ୟମ କରିଥିଲେ । ଏଥିରେ ଅସଫଳ ହେବା ପରେ ନିକଟରେ ଥିବା ଏକ ଗ୍ୟାରେଜରୁ ଗୋଟିଏ ବାଇକ୍କୁ ନେଇଯାଇଥିଲେ । ଏହା ସ୍ଥାନୀୟ ଏକ ଦୋକାନର ସିସିଟିଭିରେ କଏଦ ହୋଇଥିଲା । ଏହାକୁ ଭିତ୍ତି କରି ପୋଲିସ ତନାଘନା ତଦନ୍ତ ଜାରି ରଖିଥିଲା । ଶେଷରେ ସଫଳତା ପାଇଛି ବୋଲି ବୋଡନେ ଆଇଆଇସି ସରୋଜ ମଲ୍ଲିକ ପ୍ରକାଶ କରିଛନ୍ତି ।