ଓଡଗାଁ,(ଶ୍ରୀକାନ୍ତ ମିଶ୍ର): ଓଡଗାଁ ବ୍ଲକ ଗୋଡିପଡା ଅନ୍ତର୍ଗତ ହରିଡାବାଡି ଗ୍ରାମରେ ଗତକାଲି ବିଳମ୍ବିତ ରାତ୍ରୀରେ ନିଆଁଲାଗି ୪ଟି ପରିବାର ଲକ୍ଷାଧିକ ଟଙ୍କାର ସମ୍ପତି ପୋଡିଯିବା ସହିତ ୨ଟି ବଳଦ ଜୀବନ୍ତ ପୋଡି ମୃତ୍ୟୁବରଣ କରିଛନ୍ତି । ସୁଚନା ଅନୁସାରେ ଗତକାଲି ରାତି ୧.୩୦ ମିନିଟ ସମୟରେ ଅଗ୍ନିକାଣ୍ଡ ଘଟି ଲୋକନାଥ ପଲେଇ, ଗୋପିନାଥ ପଲେଇ, ଜଗନ୍ନଥ ପଲେଇ ଓ ମଞ୍ଜୁଲତା ପଲେଇଙ୍କ ଚାଳଘରେ ନିଆଁ ଲାଗିଥିଲା । ବିଦ୍ୟୁତ୍ ସଟ୍ ସର୍କିଟରୁ ନିଆଁ ଲାଗିଥିବା ସନେ୍ଦହ କରାଯାଉଥିବା ବେଳେ ବିଳମ୍ବିତ ରାତ୍ରୀ କାରଣରୁ ନିଆଁ ଲାଗିବା ସମ୍ପର୍କରେ ଘରଲୋକମାନେ ଜାଣିବା ବେଳକୁ ବହୁତ ଡେରି ହୋଇଯାଥିଲା । ନିଆଁର ପରିମାଣ ବଢିଯାଇଥିବାରୁ ଉଧାରକାର୍ଯ୍ୟ ସମ୍ଭବପର ହୋଇନଥିଲା । ଫଳରେ ପ୍ରତ୍ୟେକଙ୍କର ୨ବଖରା ଲେଖାଏଁ ଚାଳଘର ସହିତ ଧାନ ଚାଉଳ ଓ ଆସବାବ ପତ୍ର ମଧ୍ୟ ପୋଡିଯାଇଥିଲା । ଏଥି ସହିତ ଗୋପିନାଥ ପଲେଇଙ୍କର ଗୁହାଳ ମଧ୍ୟରେ ବନ୍ଧା ହୋଇଥିବା ୨ଟି ବଳଦ ଜୀବନ୍ତ ପୋଡି ମୃତ୍ୟୁ ବରଣ କରିଥିଲେ ଏବଂ ଲୋକନାଥ ପଲେଇ ଓ ଜଗନ୍ନାଥ ପଲେଇଙ୍କର ୧ଟି ଲେଖାଏଁ ବଳଦ  ଆହତ ହୋଇଥିଲେ । ନିଆଁ ମଧ୍ୟରୁ ନିଜକୁ ରକ୍ଷାକରିବା ସମୟରେ ଲୋକନାଥ ପଲେଇଙ୍କର ବୋହୁ ମଧ୍ୟ ଆହତ ହୋଇଥିଲେ । ଖବର ପାଇ ଓଡଗାଁ ଦମକଳ ବାହିନୀ ଘଟଣା ସ୍ଥଳରେ ପହଁଚି ନିଆଁକୁ ଆୟତ କରିଥିଲେ । କ୍ଷତିଗ୍ରସ୍ତ ପରିବାର ଗୁଡିକୁ ତୁରନ୍ତ ସରକାରୀ ସହାୟତା ଯୋଗାଇ ଦେବାପାଇଁ ଦାବି ହୋଇଛି ।