ବାରିପଦା (ଦିଲ୍ଲୀପ ମହାନ୍ତି ): ମୟୁରଭଞ୍ଜ ଜିଲ୍ଲା ବଡସାହି ଥାନା ପୁଲିସ  ସ୍ଥାନୀୟ ଜୁଣପଦା ବନ୍ଧରୁ ଏକ ଅଜଣା ବ୍ୟକ୍ତିର ଗଳିତ ମୃତଦେହ ଉଦ୍ଧାର କରିଛି । ଆଜି ପୂର୍ବାହ୍ନରେ ଜୁନାପଡା ଗ୍ରାମର କେତେକ ଲୋକ ବନ୍ଧକୁ ଯାଇଥିବା ସମୟରେ ସେଠାରେ  ଏକ ମୃତଦେହ ଦେଖି ସ୍ଥାନୀୟ ସରପଞ୍ଚଙ୍କୁ ଖବର ଦେଇଥିଲେ । ସରପଞ୍ଚ ଏବିଷୟରେ ବଡସାହି ଥାନାକୁ  ଜଣାଇଥିଲେ । ଘଟଣାସ୍ଥଳରେ ବଡସାହି ଥାନା ଅଧିକାରୀ ପହଞ୍ଚି ଶବ ଉଦ୍ଧାର କରିବା ପାଇଁ ଅଗ୍ନିଶମ ବିଭାଗର ସହାୟତା ନେଇଥିଲେ । ପୋଲିସ ଉପସ୍ଥିତିରେ ଅଗ୍ନିଶମ ବିଭାଗର କର୍ମଚାରୀମାନେ ମୃତ ବ୍ୟକ୍ତିର ଗଳିତ ଶବକୁ ପାଣିରୁ ଉଦ୍ଧାର କରିଥିଲେ । ବଡସାହି ପୋଲିସ ମୃତଦେହ ଜବତ କରି ତଦନ୍ତ ଚଳାଇଛି । ଖବର ଲେଖାଯିବା ପର୍ଯ୍ୟନ୍ତ ମୃତକର ପରିଚୟ ମିଳିନାହିଁ  । ତେବେ  କେହି ତାଙ୍କୁ ହତ୍ୟା କରିବା ପରେ ସେଠାରେ ଫିଙ୍ଗି ଦେଇଥିବା ସନ୍ଦେହ କରାଯାଉଛି ।