ବାରିପଦା(ଦିଲ୍ଲୀପ ମହାନ୍ତି )-  ମୟୂରଭଞ୍ଜ ଜିଲ୍ଲା ବାରିପଦା-ଚିତ୍ରଡ଼ା ରାସ୍ତାର ରଙ୍ଗାମାଟିଆ ପିଆରଏମ ମେଡ଼ିକାଲ କଲେଜ ଛକ ନିକଟରେ ଏକ ପିକଅପ ଭ୍ୟାନ ଦୃତ ବେଗରେ ଆସି ସମ୍ମୁଖରୁ ବାଇକକୁ ଧକ୍କା ଦେବାରୁ ଘଟଣାସ୍ଥଳରେ ବାଇକ ଚାଳକର ମୃତ୍ୟୁ ହୋଇଥିବା ବେଳେ ବାଇକ ଆରୋହୀ ଗୁରୁତ୍ତର ଆହତ ହୋଇ ବାରିପଦା ମେଡ଼ିକାଲ କଲେଜ ହସପିଟାଲରେ ଚିକିତ୍ସିତ ହେଉଥିବାର ଜଣାପଡ଼ିଛି । ଆଜି ସକାଳ ପ୍ରାୟ ୭ଟା ସମୟରେ ଏହି ଦୁର୍ଘଟଣା ଘଟାଇବା ପରେ ପିକଅପ ଚାଳକ ଗାଡ଼ି ଧରି ଘଟଣାସ୍ଥଳରୁ ଫେରାର ହୋଇଯାଇଥିଲା । ମାତ୍ର କେତେକ ଯୁବକ ପିକଅପକୁ ଧରିବା ନିମନ୍ତେ ପଛରୁ ଗୁଡ଼ାଇ ପରେ ଚାଳକ ରାସ୍ତାରେ ଗାଡ଼ିକୁ ଛାଡ଼ି ଫେରାର ହୋଇଯାଇଥିଲା । ବାରିପଦା ସଦର ଥାନା ଫୁଲିସ ଖବର ପାଇ ଉକ୍ତ ପିକଅପକୁ ଜବତ କରି ଥାନାକୁ ନେଇଆସିଥିଲା । ମୃତ ନୃସିଂହ କିସ୍କୁଙ୍କ ଭାଇ ଲମ୍ବୋଦର କିସ୍କୁ ବାରିପଦା ସଦର ଥାନାରେ କରିଥିବା ଅଭିଯୋଗ ଆଧାରରେ ବାରିପଦା ସଦର ଥାନା ଅନ୍ତର୍ଗତ ଇନ୍ଦୁପାହି ଅଞ୍ଚଳର ନୃସିଂହ କିସ୍କୁ(୨୪) ବାରିପଦା ତକତପୁର ଅଞ୍ଚଳର ଝିଆରୀ ଦୁଲାରୀ ମାଝିକୁ ନିଜର ଓଡ଼ି ୧୧ ଜି ୯୬୫୫ ନମ୍ବର ପଲସର ବାଇକରେ ବସାଇ ନିଜ ଘରକୁ ଫେରୁଥିବା ବେଳେ  ରଙ୍ଗାମାଟିଆ ଗ୍ରାମ ନିକଟରେ ସମ୍ମୁଖରୁ ଓଡ଼ି ୧୧ଜେ ୩୪୬୧ ନମ୍ବର ବିଶିଷ୍ଟ କୁକୁଡ଼ା ବୋଝେଇ ପିକଅପ୍ ଭ୍ୟାନ ଦୃତ ବେଗରେ ଆସି ବାଇକକୁ ଧକ୍କା ଦେଇଥିଲା । ଫଳରେ ବାଇକର ସମ୍ମୁଖ ଭାଗ ଭାଙ୍ଗିରୁଜି ଚୁରମାର ହୋଇଯାଇଥିବା ବେଳେ ବାଇକ ଚାଳକ ବାଇକରୁ ଛିଟିକି ରାସ୍ତା ଉପରେ ପଡ଼ିଥିଲା । ଏଥିରେ ତାର ମୁଣ୍ଡରେ ଗଭୀର ଆଘାତ ଲାଗି ପ୍ରବଳ ରକ୍ତସ୍ରାବ ହୋଇଥିଲା ଏବଂ ଘଟଣାସ୍ଥଳରେ ମୃତ୍ୟୁ ହୋଇଥିଲା । ମାତ୍ର ପଛରେ ବସିଥିବା ଦୁଲାରୀ ମାଝି ଅଳ୍ପକେ ବର୍ତ୍ତି ଯାଇଥିଲା । ଦୁଲାରୀକୁ ସ୍ଥାନୀୟ ଜନସାଧାରଣ ଉଦ୍ଧାର କରି ତୁରନ୍ତ ଚିକିତ୍ସା ଯୋଗାଇ ଦେବା ନିମନ୍ତେ ବାରିପଦା ପିଆରଏମ ମେଡ଼ିକାଲ କଲେଜ ଓ ହସପିଟାଲକୁ ପଠାଇଦେଇଥିଲେ । ଏହି ଘଟଣାକୁ ନେଇ ବାରିପଦା ସଦର ଥାନାରେ ୫୬/୨୦୧୯ରେ ଏକ ମାମଲା ରୁଜୁ କରାଯାଇଛି ।