ନୂଆପଡ଼ା(ଅମିତ କୁମାର ପୁରୋହିତ):  ଜିଲ୍ଲା ଖରିଆରରୋଡ ଜୋଙ୍କ ଥାନା ଅଧିନ ଜେଞରା ନିକଟ ବଏଲର ଫାର୍ମ ନିକଟରେ ଏକ ଅଜଣା ଶବ କୁ ପୁଲିସ ଦ୍ୱାରା ଉଦ୍ଧାର କରାଯାଇଛି । ମୃତବ୍ୟକ୍ତିଙ୍କ ପରିଚୟ ମିଳିପାରି ନାହିଁ । ଏନେଇ ଜୋଙ୍କ ଥାନାରେ ଏକ ଅପମୃତ୍ୟୁ  ମାମଲା ରୁଜୁ କରି ପୁଲିସ ଛାନଭିନ ଆରମ୍ଭ କରିଥିବା ଜଣାପଡିଛି । ସୂଚନାମତେ, ଆଜି ଭୋର ସମୟରେ ବଏଲର ଫାର୍ମ ପଛପଟେ ଏକ ଅଜଣା ମୃତଦେହ ପଡିଥିବା ଗାଁ ଲୋକେ ଦେଖି ଜୋଙ୍କ ପୁଲିସକୁ ଖବର ଦେଇଥିଲେ । ଘଟଣା ସ୍ଥଳରେ ପୁଲିସ ପହଂଚି ଶବ ଜବତ କରିଥିଲେ । ଖବର ପାଇ ଆଖ ପାଖ ଗାଁ ଲୋକେ ମଧ୍ୟ ରୁଣ୍ଡ ହୋଇଥିଲେ । ଏହା ସତ୍ତ୍ୱେ ମୃତବ୍ୟକ୍ତିଙ୍କ ପରିଚୟ ମିଳିପାରି ନଥିଲା । ତେବେ ଶବ ନିକଟରେ ଏକ ବିଷ ବୋତଲ ପଡିଥିବାରୁ ବ୍ୟକ୍ତିଜଣକ ବିଷ ପିଇ ଆତ୍ମହତ୍ୟା କରିଥିବା ସନ୍ଦେହକରାଯାଉଛି । ହେଲେ ସେ କେଉଁ ଗାଁର ଓ କାହିଁକି ଆତ୍ମହତ୍ୟା କଲେ ତାହା ଜଣା ପଡିନାହିଁ । ତାଙ୍କୁ କେହି ହତ୍ୟା କରି ପାଖରେ ବିଷ ବୋତଲକୁ ରଖି ଦେଇ ଥାଇପାରନ୍ତି ବୋଲି ମଧ୍ୟ ସନ୍ଦେହ  ପ୍ରକାଶ ପାଇଛି । ତେବେ ପୁଲିସ ତଦନ୍ତରୁ ସବୁ ସ୍ପଷ୍ଟ ହେବ ବୋଲି କୁହାଯାଉଛି । ବର୍ତ୍ତମାନ ଶବକୁ ଜିଲ୍ଲା ମୁଖ୍ୟ ଚିକିତ୍ସାଳୟ  ରଖାଯାଇଛି । ତାଙ୍କ କୌଣସି ପରିବାର ଲୋକେ ନ ଆସିବାରୁ ଶବ ବ୍ୟବଚ୍ଛେଦ ହୋଇ ପାରିନାହିଁ । ଏବେ ତଦନ୍ତ ଚାଲିଛି ଓ ତାଙ୍କ ପରିଚୟ ଚିହ୍ନଟ ପାଇଁ ଆଖ ପାଖ ଅଚଂଳର ଲୋକଙ୍କୁ କୁହାଯାଇଛି ବୋଲି ଜୋଙ୍କ ଥାନାଧିକାରୀ ଯୁଗଳ କୁମାର ମଲ୍ଲିକ  କହିଛନ୍ତି ।