କାଶୀପୁର /ଟିକିରି ରୁ ବୈକୁଣ୍ଠ ଦୁରିଆ : କାଶୀପୁର ବ୍ଲକ ଟିକିରି ଥାନା ଅନ୍ତର୍ଗତ ମଙ୍କଡ଼ଝୋଲା ଗ୍ରାମରେ ଆଜି ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଘଟଣା ରେ ଉକ୍ତ ଗ୍ରାମର ଗୋଟିଏ ପରିବାରର ୪ ଜଣ ସଦସ୍ୟ ବଜ୍ରପାତ ର ଶିକାର ହେଇଥିବାବେଳେ ଘଟଣା ସ୍ଥଳରେ ଆମରି ମାଝିଙ୍କର ପୁତ୍ର ଆକାଶ ମାଝି(୬) ଙ୍କର ମୃତ୍ୟୁ ହେଇଯାଇଛି |ଝିଅ ବୈଶାଳୀ ମାଝି (୧୩)ଙ୍କୁ ଗୁରୁତର ଅବସ୍ଥା ମେଡ଼ିକାଲ ରେ ଭର୍ତ୍ତି କରାଯାଇଛି । ସେହିପରି ଆମରି ମାଝି ଓ ତାଙ୍କ ସ୍ତ୍ରୀ ଜିରିମେ ମଧ୍ୟ ଘଟଣାରେ ବହୁ ସମୟ ପର୍ଯ୍ୟନ୍ତ ଅଚେତ ହେଇଯାଇଥିବାବେଳେ ବର୍ତ୍ତମାନ ଉଭୟଙ୍କ ସ୍ଥିତି ସାମାନ୍ୟ ଥିବା ଜଣାପଡିଛି ।
ସୂଚନାଅନୁଯାୟୀ ଆମରି ମାଝି ବଙ୍କାମ ଗ୍ରାମପଞ୍ଚାୟତ ର ମାଙ୍କଡ଼ଝୋଲା ଗ୍ରାମରେ ସପରିବାର ରୁହନ୍ତି । ଘର ଠାରୁ ଅଳ୍ପ ଦୂରରେ ତାଙ୍କର ଚାଷ ଜମି ରହିଛି । ନିତି ଦିନ ଭଳି ଆଜି ଆମରି ତାଙ୍କ ସପରିବାର ଜମି କୁ ଯାଇଥିଲେ । ଦ୍ବିପହର ସମୟରେ ଅଳ୍ପ ବର୍ଷା ସହିତ ଘଡଘଡି ଆରମ୍ବ ହେଇଯାଇଥିଲା । ବର୍ଷା ସମ୍ଭାବନା ଦେଖି ସପରିବାର ଘରକୁ ଫେରୁଥିବାବେଳେ ବାଟରେ ଥିବା ଏକ ଆମ୍ବ ଗଛ ମୂଳରେ ବର୍ଷା ଦାଉରୁ ରକ୍ଷା ପାଇବାକୁ ଆଶ୍ରୟ ନେଉଥିବାବେଳେ ହଠାତ ଆମ୍ବ ଗଛ ଉପରେ ବିଜୁଳି ପଡିଯାଇଥିଲା । ଏଥିରେ ପରିବାର ସମସ୍ତ୪ ଜଣ ସଦସ୍ୟ ଅଚେତ ହେଇଯାଇଥିଲେ । କିନ୍ତୁ କୌଣସି ପ୍ରକାର ରେ ଆମରି ଓ ତାଙ୍କ ସ୍ତ୍ରୀ ଙ୍କର ଚେତା ଫେରିଲାବେଳେ ପୁଅ ଆକାଶ ଓ ଝିଅ ବୈଶାଳୀ ଚେତାଶୂନ୍ୟ ଥିଲେ । ଆମରି କୌଣସି ପ୍ରକାର ଗାଁ ଲୋକଙ୍କୁ ଖବର ଦେଇଥିବାପରେ ଆକାଶ ଓ ବୈଶାଳୀଙ୍କୁ ଚେତାଶୂନ୍ୟ ଅବସ୍ଥାରେ ଗୋବର ଲେପନ କରାଯାଇଥିଲା । ଏଥିରେ ବୈଶାଳୀର ଚେତା ଫେରିଲାବେଳେ ଆକାଶ ର ମୃତ୍ୟୁ ହୋଇଥିଲା । ତୁରନ୍ତ ବୈଶାଳୀ କୁ ପ୍ରଥମେ ଟିକିରି ଉପ ସ୍ୱାସ୍ଥ୍ୟ କେନ୍ଦ୍ର ରେ ନେଇ ପରବର୍ତ୍ତୀ ସମୟରେ କାଶୀପୁର ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ର ରେ ଭର୍ତ୍ତି କରାଯାଇଥିଲା। ବର୍ତ୍ତମାନ ଖବର ଲେଖାହେବ ବେଳକୁ ବୈଶାଳୀ ବିପଦ ମୁକ୍ତ ଥିବାବେଳେ ଆକାଶ ର ବ୍ୟବଛେଦ ହେଇପାରି ନଥିଲା ।
